Йод танқислиги холатлари (йтх ) ҲАҚидаги викториналар

ЙОД ТАНҚИСЛИГИ ХОЛАТЛАРИ (ЙТХ ) ҲАҚИДАГИ ВИКТОРИНАЛАР

1. Йод етмаса танада Рўй берар қандай холат? Танадаги қай аъзо – Катталашар бағоят. 2. Қайси маҳсулотларда – Йод миқдори кўп бўлар? Қанча миқдор ейилса – Соғлик учун “хўп” бўлар? 3. “Элементлар жадвали”да Ҳар модданинг ўрни бор, Айтингчи, йод “жадвалда”^1 Қайси ўринда номдор? 4. Болаларга^2 бир кунда Қанча йод зарур эрур? Қанча хурмо ейилса – Йод миқдори соз бўлур? 5. Йод миқдорин танада – Меъёрда ушлаш учун, Айтинг, қандайин дори – Кўрсатади ўз кучин? 6. Маълумки, таомларда – “Ош тузи”эрур муҳим. Ош тузин қайси нави – Фойдали эрур муқим? 7. Айтинг, йод танқислиги – Қайси ёшда кўп хавфли? Қайси маҳсулотларнинг – Кўпроқ тегади нафи.

8. Хомиладор аёлга – Зарурми йод моддаси? Хомилага – зиённинг – Неларда ифодаси. 9. Йоди камроқ онадан – Гар туғилса чақалоқ, Қандайин касалликлар– Бўлишини санаб боқ. 10. Айтинг, кретинизм – Қандай касаллик эрур? Қандайин кўринишда Касаллик содир бўлур? 11. Болада йод миқдори Гар кам бўлса нормадан, Қандай касалликларни – Топиш мумкин боладан? 12. Инсон умр давомида Қанча йод қилар қабул? Балансни сақлаш учун Неларни еган маъқул? 13. Одамларга бир кунда Қанча миқдор йод керак? Хомиладор аёлга, Қанчадир у – бер дарак? 14. Одамда йод кам бўлса– Рўй берар қандай холат? Неларда билинади, Турларин бизга англат?

ЙОД ТАНҚИСЛИГИ ХОЛАТЛАРИ (ЙТХ) ҲАҚИДАГИ ВИКТОРИНАЛАРНИНГ ЖАВОБЛАРИ
1. Дармонсизлик, хотиранинг заифлашиши кузатилади. Қалқонсимон без катталашиб–“буқоқ” хосил бўлади. 2. Хурмо, олма, помидор, картошка, сабзи, пиёз, нўхат, мош, гуруч, мол ва қўй гўшти, балиқ, тухумда йод миқдори анча кўп. Лекин организмга кифоя бўлиши учун бу маҳсулотлардан жуда кўп истеъмол қилиш лозим. 3. Йод элементи элементларнинг даврий системаси жадвалининг 53 –ўрнида туради. 4. 7–12 ёш болаларга бир кунда 120 мкг йод керак бўлади, уни қоплаш учун масалан, 1 кунда 4 кг дан кўпроқ хурмо ейиш керак бўлади(Бу эса мумкин эмас!) 5. 1–кунда 1–таблеткадан “Йодамарин”истеъмол қилиш керак бўлади. 6. Танадаги йод балансини нормада ушлаб туриш учун “Йодланган ош тузи”ни ишлатиш керак. 7. Йод танқислиги, айниқса, ёш болалар учун хавфлидир.Йод танқислиги – буқоқ, миянинг қайта тикланмайдиган жарохатлари ва репродуктив саломатликнинг бузилишигача бўлган кенг қамровли касалликларни ўз ичига олади, интеллектуал потенциални сусайтириб юборади. Йод танқислигининг олдини олишда 2 ва 5 лардаги моддаларга қўшимча – денгиз маҳсулотлари муҳим ахамиятга эга. 8. Йод танқислиги ҳомиладорлик даврида бола танлаш, боланинг ўлик тўғилиши ёки боланинг турли нуқсонлар билан туғилишига сабаб бўлиши мумкин. 9. Йод танқислиги холати кузатилган онадан ақлий ва жисмоний заиф, қалқонсимон без касаллиги (туғма)ва кретинизмга чалинган бола туғилиш мумкин. 10. Кретинизм йоднинг жуда оғир даражадаги сурункали етишмовчилиги билан боғлиқ туғма касаллик бўлиб, у паканалик, жисмоний нухсонлар ва ақлий камчиликда намоён бўлади. 11. Йод танқислиги кузатилаётган болада рухий ва жисмоний ривожланишнинг ортда қолиши, бўйнинг секин ўсиши, маълумотлар қабул қилишнинг секинлашуви, хотира ва фикрлаш жара-ёнининг ёмонлашишида кузатилади. 12. 3–5 грамм. Хурмо, олма, ёнғоқ, помидор, картошка, сабзи, пиёз, нўхат, мош, гуруч, мол ва қўй гўшти, балиқ, тухум ҳамда денгиз маҳсулотларидан истеъмол қилиб туриш зарур.
13. 120 мкг – 7 – 12 ёш болага,
150мкг – 12 ёшдан катталарга,
200мкг – ҳомиладор аёл учун кунлик норма ҳисобланади.
1мкг = 1_гр:1000000 .
14. Буқоқдан ташқари ақлий ва жисмоний қобилият сусаяди, тез чарчайди, мия тормозланади, апатия, депрессия ҳолатлари кузатилади, баъзан уйқучан бўлиб қолади.