1-ma’ruza: Kirish bolalar adabiyoti fan sifatida, uning maqsadi va vazifalari. Reja

7-ma’ruza. Sulton Jo’ra va Zafar Diyor ijodining yetakchi mavzulari
Reja

1. 
   Sulton Jo‘ra hayoti va ijodi
   
2. 
   Shoirning adabiy merosi
   
3. 
   Sulton Jo‘ra – jangchi shoir sifatida
   
4. 
   Bolalar uchun yaratgan asarlari
   
5. 
   Zafar Diyor ijodi va hayoti
   
6. 
   Shoir adabiy merosi
   
7. 
   Zafar Diyor – iste’dodli bolalar shoiri
   
8. 
   Shoir ijodida xalq og‘zaki ijodi namunalarining o‘rni
   

Hozirgi zamon bolalar adabiyotining rivojlanishiga barakali hissa qo‘shgan Sulton Jo‘ra 1910 yilning 15 yanvarida Buxoro viloyatining Shofirkon tumanidagi Qag‘altom qishlog‘ida kambag‘al dehqon oilasida tug‘ildi. Yetti yoshda ota-onasidan yetim qolgan Sulton har kimlarning eshigida xizmat qildi. U dastlab boshlang‘ich maktabda o‘qib, 1924 yilda Buxoroga keldi va bu yerda erlar pedagogika bilim yurtiga o‘qishga kirdi, uni 1930 yilda bitirdi.

Sulton Jo‘ra 1931-1938 yillarda Buxoro pedagogika instutining ishchi fakultetida o‘qiydi. 1938-1941 yillarda Andijondagi o‘qituvchilar instituti va pedagogika bilim yurtida til va adabiyotdan dars berdi.
1942 yilda Sulton Jo‘ra harbiy xizmatga chaqiriladi. U dushmanga qarshi ham qurol, ham qalam bilan jang olib bordi. 1943 yilning 14 noyabrida Belorussiya tuprog‘ida nemis-fashist bosqinchilariga qarshi janglarning birida jangchi-shoir qahramonlarcha halok bo‘ldi.
Sulton Jo‘raning dastlabki she’rlari 1933 yilda Buxoro yosh shoirlarining “She’rlar” to‘plamida nashr etildi. Uning 1939 yilda “Fidokor”, 1941 yilda “Moskva” she’riy to‘plamlari, 1942 yilda “Iroda” nomli pesasi nashr etildi. Shoir vafotidan so‘ng 1951 yilda rus va o‘zbek tillarida “Tanlangan asarlar”, tinch qurilish yillar davrida iste’dodli shoirning “Havo rang gilam”, “Zangori gilam”, “Bruno”, “Parvoz”, “Qaldirg‘och”, “Tanlangan asarlar” kitoblari bosilib chiqdi.
Uning ikkinchi jahon urushi davrida yaratgan asarlarida fashist gazandalarining butun yovuzliklari ochib tashlanadi.
“To‘pchi Muhammad”, “Pulemyotchi ovozi”, “Chavandoz”, “Uch og‘ayni botirlar”, “Nayzamiz” (1941), “Qahramon Qo‘chqor” (1942), “Jahon seni olqishlar”, “Berlin aptekasida” (1943) she’rlari shular jumlasidandir.
Sulton Jo‘ra kattalar uchun jo‘shqin lirik she’rlar, yirik dostonlar yaratish bilan birga, bolalarga atab ham ajoyib asarlar yozdi.
Shoir-pedagog Sulton Jo‘ra bolalar uchun yozgan asarlarida baxtli bolalik, Vatanga muhabbat va dushmanga nafrat, mehnat ahllariga e’tiqod tuyg‘ularini ifodaladi. Ayni chog‘da, u yaxshi va a’lo baholarda o‘qish uchun kurash, rostto‘y va intizomli bo‘lish, madaniy va pokiza kiyinish, savodxon va chiroyli yozuv malakasini egallash kabi ta’lim-tarbiyaviy masalalarni ham badiiy vositalarda talqin etdi. Bunday g‘oyalar shoirning “Yozgi yomg‘irdan so‘ng” (1936), “Qizlar”, “A’lo” va “Yaxshi” ning mag‘tovi», “Zangori gilam” (1939), “Lola”, “Oy nechta?”, “Tinish belgilarining majlisi”, “Cho‘ntak”, “TSirkda” (1940), “Qarzdor”, “Qaldirg‘och”, “Yolg‘onchi”, “Dengiz tagida” (1941), “Sog‘inib” (1942), “Sog‘inchli salom”, “Salom xat” (1943) kabi asarlarida o‘z ifodasini topdi.
U o‘z asarlarida bolalar va maktab hayotini, ularning o‘qishi, ko‘cha va oilada o‘zini tutushini haqqoniy aks ettirdi. Shoir yosh kitobxonning diqqatini o‘ziga tortuvchi asarlar ijodkori sifatida tanildi.
Bolalar ilmiy-ommaviy mavzularda yozilgan san’at asarlarini ham sevib o‘qiydilar. Sulton Jo‘ra bunday mavzuda ham ancha asarlar yozdi. Shunday asarlardan biri “Oy nechta?”. Bunda shoir kichkintoylarning orzu-umidlarini xarakterli parcha-ona va bolalarning dialogi orqali ifoda etadi:
Ona dedi:
Yotinglar endi.
Faqat bitta osmonning oyi!
Katta bo‘lgach, aylanaylarim,
Oyning o‘zin minib ko‘rarsiz.
- O‘shanda-chi, oyijon, bizga
Katta toti olib berarsiz.
Mehnatkash xalq azal-azaldan jamoa bo‘lib, birlashib, bir-birlari bilan hamjihat, hamfikr bo‘lib umr kechirgan, jamoaga suyanish u bilan bamaslahat ish yuritish doimo omadlar kaliti bo‘lib kelgan. Bunday xol barcha katta-kichikka baxt, shodlik, omad keltirgan. Agar aksincha bo‘lsa, kishi omadsizlik, baxtsizlikka mubtalo bo‘lgan.
Bu g‘oya shoir Sulton Jo‘raning “Mamatning kechirmishi” asarining asosini tashkil etadi. Shoir Mamatning jamoadan, do‘stlaridan ajralib, yolg‘izlanib qolishini shirali til bilan tasvirlaydi. Ayniqsa, Mamatning ichki-ruhiy kechinmalari, ishyoqmasligi, yalqovligi, to‘ngligi orqasida darslardan qolog‘ bo‘lib, iztirob chekishini ishonarli aks ettirgan. Mana, hamma uxlagan, ammo tanho Mamat uyg‘og‘. Shoir uning ana shu dag‘iqalardagi qalb iztirobini, ruhan qiynalayotganligini, notinch ruhiy holatini sodda, ravon tasvirlaydi.
Shoir qolog‘lik sabablarini birovdan emas, balki qahramonning o‘zidan qidiradi va buni Mamatning o‘zini gapirtirish orqali ochadi.
Darsdan qolog‘ligi orqasida ruhan azob chekib, qiynalib yurgan Mamat o‘jarligi, o‘zboshimchaligini tan olib, do‘stlari yordamida oyog‘qa turib, endilikda astoydil o‘qishga ahd qiladi:
- Bo‘ldi... Men bas qildim yalqovlikni
Do‘stlarimday olay bilimni.