1. Oqıw materialları

3-tema. Rawajlaniw filosofiyasi
Joba:

1. 
   Filosofiya tariyxında rawajlanıw haqqındaġı kóz-qaraslar evolyuciyası.
   
2. 
   Filosofiya nızamlarınıń tiykarġı formaları
   
3. 
   Kategoriya túsinigi hám olardıń túrleri
   
4. 
   Filosofiya kategoriyalarınıń klassifikaciyası
   

İnformaciya civilizaciyası dáwirine qádem qoyıp atırġan házirgi zaman adamı ushın jedel pátlerde ózgerip atırġan dún`ya haqqındaġı túsinik onıń dún`yaqarasınıń ajıralmas quram bólegi. Biraq rawajlanıp atırġan dún`yanıń bir pútin teoriyalıq obrazın jaratıw – awır hám mashaqqatlı wazıypa. Onı sheshiwdiń filosofiyalıq jolı eki yarım mıń jıl burın baslanġan bolıp, sonnan berli ótken dáwir dawamında rawajlanıw filosofiyası qáliplesken hám basqıshpa-basqısh hár tárepleme islep shıġılġan. Filosofiyanıń bul bólimi rawajlanıw mashqalasın túrli kóz-qaraslardan úyreniwshi koncepciyalardı óz ishine aladı. Olardıń arasında dialektika, metafizika hám sinergetika ayrıqsha orın iyeleydi. Olardan ásirese keń tán alınġanı hám jetik islep shıġılġanı dialektika bolıp tabıladı. Sol sebepli bul bólimde oġan tiykarġı itibar qaratıladı. Dialektikanı biliw, onıń principleri, nızamları hám kategoriyalarınan dóretiwshilik penen paydalanıw hár qanday tarawdıń qánigesiniń konkret dún`yaqarası hám metodologiyalıq tártibiniń áhmiyetli shárti esaplanadı.

Dialektika ne, onıń mazmunı neden ibarat, rawajlanıwdıń dialektikaġa al`ternativ qanday koncepciyaları bar?
Dialektikanıń tariyxıy formaları hám ózgeshelikleri. «Dialektika» (grek. dialektike – sáwbet qurıw iskusstvosı) sóziniń «dialog» (grek. dialogos – eki yaki bir neshe sáwbetleslerdiń sóylesiwi) sózi menen ulıwmalıq aspektleri kóp. Dáslep dialektika tartısıw, diskussiyaġa kirisiw iskusstvosı sıpatında túsinilgen, bunda pikirler, kóz-qaraslar qarama-qarsılıġı quralında haqıyqattıń túbine jetiw maqsetinde mashqalanı óz-ara mápdarlıqta talqılawġa qaratılġan diskussiya kózde tutılġan. Dialektikalıq – bul soraw beriw hám juwap qaytarıwġa usta adam, dep esaplanġan.