3-Mavzu. Dorixona gigiyenasining umumiy asoslari. Kimyo-farmatsevtika korxonalarida yoritilganlik Ma’ruzaning maqsadi

Bino devorlarining rangi. Qora ranglar yorug‘likni yutishi, och ranglar esa qaytarishi (aks ettirishi) ma’lum. Oq rangga bo‘yalgan devorlar ularga tushadigan nurlarning 80% ga yaqinini qaytaradi, sariq rangi 40% ga yaqinini, ko‘k rang 25% ga yaqinini va jigar rang 13 % qaytaradi.
Yorug‘likni to‘sib qo‘yadigan buyumlar. Xonadagi buyumlar (derazaga qo‘yilgan gullar, deraza pardalari va b.), shuningdek, derazasi oldida turgan narsalar (baland daraxtlar, binolar va boshqalar) yorug‘likni to‘sib qo‘yishi mumkin. Chunonchi, derazalarga tutiladigan to‘r pardalar 40% gacha va bundan ortiqroq yorug‘likni yutib qola oladi. Yorug‘lik to‘silib qolmasligi uchun binoning tashqarisida, derazalar oldida turadigan narsalar kam deganda o‘zining bo‘yiga ikki baravar keladigan masofada derazalardan nari bo‘lishi kerak.
Xonalarning eni (chuqurligi). Xonaga yorug‘lik tik derazalar orqali bir yon tomondan tushadigan bo‘lsa, derazadan uzoqlashilgan sayin yorug‘lik darajasi kamayib boradi. Xonaning derazali devoridan eng uzoqdagi qismlariga ham yaxshiroq yorug‘ tushadigan bo‘lishi uchun derazalarning ustki chetlarini imkoni boricha yuqoriroq ko‘tarish kerak.
Yorug‘lik xonaning bir yon tomonidan tushadigan bo‘lsa, xonaning chuqurligi (derazali devorning ro‘parasidagi devorgacha bo‘lgan masofa) poldan derazaning yuqori chetigacha bo‘lgan masofadan ikki baravar ortiqroq bo‘lishi kerak deb hisoblanadi. Chunonchi, derazalarniig ustki chetlari poldan 3,5 m balandda turadigan bo‘lsa, xonaning chuqurligi 7 dan ortmasligi kerak.
Ravshanki, yorug‘lik ikki tomonidan yoki bir yon tomoni hamda tepasidan, ya’ni aralash tushadigan xonalarga bu qoidani tadbiq qilib bo‘lmaydi.
Derazalarning yorug‘lik tushadigan yuzasi. Xonalarning yoritilishi derazalarning oyna bilan qoplangan (yorug‘lik tushadigan) yuzasining katta-kichikligiga, ya’ni yorug‘lik tushadigan yuzalarning yig‘indisiga bog‘liqdir. Yorug‘lik tushadigan joylarning yetarli-yetarlimasligi to‘g‘risida yorug‘lik koeffitsienti miqdoriga qarab fikr yuritiladi.