7-Мавзу: Узатмалар ва Карданли узатма. Режа

Эластик кардан шарнирида валлар вилкалари ёки фланецлари эластик материалли элементлар орқали бириктирилади.
Бикр кардан шарнирлари, бириктирган валларининг бурчак тезликлари нисбатига қараб, бурчак тезликлари тенг бўлган ва тенг бўлмаган турларига бўлинади.
Бурчак тезликлари тенг бўлмаган бикр кардан шарнирининг тузилиши ва принципиал схемаси 11.3.-расмда келтирилган.

11.3.-расм. Бурчак тезликлари тенг бўлмаган бикр кардан шарнири таркиби: 1- вилка; 2- П-симон пластина; 3- чеклагич шайба; 4- крестовина; 5- кетинги вилка; 6- кетинги кардан вал; 7- игнали подшипник; 8- чеклагич халқа; 9- болт; 10- зичловчи халқа.

Кардан вилкасининг бир ярми 1 (3.14-расм) валга фланец ёки болт билан бириктирилади. Иккинчи қисми 5 валга 6 пайвандлаб бириктирилади. Крестовина 4 вилкаларга игнали подшипниклар 7 орқали шарнирли боғланади. Подшипникларнинг крестовина бармоқларида силжимаслиги учун чеклагич халқалардан 8 фойдаланилади.
Подшипниклар ишқаланувчи юзаларини мойлаш учун уларнинг ишчи қисмлари мой билан тўлдирилади. Ташқи муҳитдан ғилоф – сальник билан ёпилади.
Бурчак тезликлари тенг бўлмаган бикр кардан шарнирларидан валлар ўқлари орасидаги бурчак γ = 4º...20º бўлган ҳолларда фойдаланилади. Ўқлар орасидаги бурчак 4º дан кичик бўлиши кардан шарнирининг хизмат муддатини кескин қисқартиради.
Кардан валлар ҳар 90º айланганда крестовина текислиги кардан валлари ўқлар орасидаги γ бурчакка тенг қийматда тебранади. Бундай жараён етакчи кардан вали ўзгармас бурчак тезлиги билан айланса ҳам, етакланувчи кардан валини ҳар 90º да тезроқ ва секинроқ айланишига сабаб бўлади.
Етакланувчи кардан вали бурчак тезлигининг нотекислиги γ бурчакка боғлиқ. Бурчак катталашиши билан нотекислик ортади ва аксинча, камайиши билан кичиклашади.
Бурчак тезликлари тенг бўлган кардан шарнирлари (БТТШ) одатда олди етакчи ва бошқарувчи ғилдиракларга харакат узатишда қўлланилади. Бунинг асосий сабаби БТТШларининг 45º бурчакгача харакатни узатиши мумкин.
БТТШда етакчи ва етакланувчи валларнинг бурчак тезликларини тенг сақланиши, шарнирларда харакат узатиш ҳамиша валлар ўқлари орасидаги бурчакни бўлувчи биссектриса текислигида амалга оширилади.
БТТШниг конструкциялари шарчали ва муштчали бўлади.

11.4.-расм. Бурчак тезликлари тенг шарчали кардан шарнири: 1 ва 5 – кардан ярим валлари; 2 ва 4 – ариқчалар; 3 – тўртта момент узатувчи шарчалар; 6 – валларни марказлаштирувчи шарча; 7 ва 8 – шпилкалар.

Кардан шарнирининг валлари 1 ва 5 вилкалари билан яхлит тайёрланади. Вилкалардаги 2 ва 4 ариқчаларда тўртта момент узатувчи шарчалар жойлашган бўлади. Етакловчи вал 5 шлицали учи билан харакатни дифференциалдан олади. Ҳаракат вилка 4 ариқчаларидаги шарчалардан 3 иккитаси ва вилка 2 орқали етакланувчи валга 1 узатилади. Демак, харакат ёки куч, йўналишига қараб, узатилишида фақат иккита шарча иштирок этади. Марказлаштирувчи шарча 6 шпилкалар билан валлар ўқларининг бир нуқтада туташини таъминлайди. Марказлаштирувчи шарча 6 ва ариқчаларнинг 2 ва 4 шакли шарчаларнинг валлар ўқлари орасидаги бурчакнинг биссектриса текислигида жойланишини таъминлайди. Шунинг учун валлар бир хил бурчак тезлик билан айланадилар.