«Bayanlar toplamı» mbs ha’m u’zliksiz oqıw bag’darlamasındag’ı oqıwshılardın’ baylanıslı so’ylewin o’siriwge tiyisli talaplardan kelip shıqqan halda du’zildi. Toplamdag’ı tekstler tematikalıq ta’repten ra’n’be-ra’n’

Tırna ha’m tu’lki
1-su’wret. Tu’lki Tırnanın’ u’yine miymang’a keldi. Tırna og’an awzı kishkene gu’zede awqat qoydı. Tu’lkinin’ tumsıg’ı gu’zege sıymadı. Tu’lki ash qaldı.
2-su’wret. Tırna Tu’lkinin’ u’yine miymang’a bardı. Sum tu’lki og’an tarelkada awqat qoydı. Tırna jey almadı. (33 so’z)

Tekst bo’limleri ta’rtibi buzılg’an halda klass jazıw taxtasına jazıladı ha’m jawıp qoyıladı. Oqıtıwshı na’wbet penen su’wretlerdi oqıwshılarg’a ko’rinetug’ın jerge qoyadı. Oqıwshılar su’wret mazmunın anıqlaydı. Su’wretlerdi ta’rtibi boyınsha aytıp beredi. Sonnan son’ tekst ashıladı, oqıwshılar ha’r bir bo’limin dawıs shıg’arıp oqıydı ha’m birgelikte qaysı bo’lim, qaysı su’wretke tiyisli ekenligin, olardı qanday jaylastırsa mazmunlı gu’rrin’ payda bolıwın aytadı. Izbe-iz (na’wbet penen) berilgen su’wretlerge at qoyılsa reje payda bolıwı tu’sindiriledi. Payda bolg’an reje analiz qılınadı.

Reje:
1. Nege sum tu’lki delingen?
2. Ne ushın Tu’lki ash qaldı?
3. Nege gu’rrin’ «Tırna ha’m tu’lki» dep ataladı?
Imla: sum, jey almadı so’zleri u’stinde islenedi. So’zlik tayarlıq ushın jazıw taxtasında jazılg’an, tekstte ushırag’an so’zlerdi buwıng’a bolıp oqıtıw ha’m olardı tiyisli su’wrettin’ janına jazıw lazım.


Ag’a-qarındas
1-su’wret. Ilyas ha’m onın’ qarındası Nilufar bag’da aynalıp ju’r edi. Olar qar u’stinde halsız jatqan qustı ko’rip qaldı.
2-su’wret. Nilufar qustı qolına ko’terip aldı. Ag’a-qarındas qustı u’ylerine alıp ketti.
3-su’wret. Ba’ha’r keldi. Ku’n ısıdı. Olar qustı ushırıp jiberdi. (36 so’z)


Imla: So’z aqırında u’nli ha’m u’nsiz dawıssızlardın’ imlası (ko’rip, ushırıp) esletiledi ha’m qarındası, ag’a-qarındas so’zleri kartong’a jazılıp ko’rinetug’ın jerge ildirilip qoyıladı.
Tekst bo’limlerinin’ izbe-izligi (ta’rtibi) buzılg’an halda jazıw taxtasına jazıladı. Oqıtıwshı su’wretlerdi na’wbeti menen jazıw taxtasına ildiredi. Oqıwshılar su’wretlerdi ko’rip, ha’r bir su’wretke tiyisli bo’limlerdi anıqlaydı ha’m ta’rtibine sa’ykeslep bo’limlerge tsifr qoyadı (Bul jumıstı bir oqıwshı orınlaydı). Oqıtıwshı oqıwshılardın’ gu’rrin’di qalay tu’singenin biliw maqsetinde to’mendegi sorawlardı beredi:
- Nilufar qustı ne qıldı?
- Olar qustı qashan ushırıp jiberdi?
Oqıwshılar gu’rrin’di jazıwdan aldın tu’sinikli oqıp, qayta bayanlaydı. Tekst jawılıp, oqıwshılar o’z betinshe bayan jazadı.