Bilimlendiriw ministirligi

Joybar eskizin sızıw
Kurs jumısın islep shıǵıwda joybar eskizi úlken áhmiyetke iye, sebebi óz waqtında qáteni dúzetiwge, anıq emes bólimi hám túsinbewshiliklerdi qara eskizde dúzetiwge imkániyat jaratıladı, joybarǵa quramalı qayta islew ózgertiwler kirgiziwdiń aldı alınadı. Joybardı qurawshı sızılmalar bir-birinen ajıratılǵan halda orınlanıwı kerek. Qabatlar planı, qırqım, fasad hám ayrım konstruktiv túyinler eskizi sızılıwı tiyis.
Imarat planın joybarlaw
Plannıń joybar eskizin islew tapsırmaǵa sáykes túrde QMQ 2.08.01-94 «Turaq-jay imaratlari» talapları menen tanısıwdan baslaw kerek. Berilgen plan sxemasına sáykes túrde dáslepki ústirtin rejelewdi orınlaw shárt. Bulardı ámelge asırıw maqsetinde tómendegi maǵlıwmatlarǵa súyenemiz.
Bólme eni onıń wazıypasına muwapıq belgilenedi. Jasaw bólmeleri eni 2,4 m den kem bolmawı kerek. Bólmeniń uzınlıǵı (terezeden ishki diywalǵa shekem bolǵan aralıq bolsa, kúndizgi jaqtılıq talabınan aralıq bastırma hám bastırma qurılmalarına baylanıslı bolıp, ámelde 4,8+6,6 m di qurawı múmkin. Bólme uzınlıǵınıń qatnası 1:1,5 hám 1:1,2 aralıǵında bolsa jaqsı qatnas esaplanadı.Turaq jay imaratınıń eni 10-15 metr qabıl etiledi. Tapsırmaǵa tiykarlanıp, ishki júk kóteriw diywalları boylama, kese yamasa tiplesken tárizde joybarlanadı. Planda júk kóteriwshi, óz-ózin kóteriwshi tiykarǵı diywallar, hám de peregorodkalar imarattıń bekkemliligin hám keńisliktegi turǵınlıǵın támiyenlewi kerek. Imarat planı eskizin islep shıǵarıw ushın sırtqı hám ishki diywallar hám de peregorodkalar qalıńlıǵın anıqlap alıwımız kerek. Sırtqı diywal qalıńlıǵı qısqı, zárúrli jaǵdaylarda bolsa jazǵı sharayat ushın teplofizikalıq esaplawlar boyınsha anıqlanadı. Ishki tiykarǵı diywal qalıńlıǵın konstruktivlik jaqtan, aralıq bastırma qurılmalarınıń ornatılıwın, samallatıw kanallarınıń jaylasıwın esapqa alǵan halda qabıllanadı.Sızılmada konstruktiv elementlerdi koordinaciyalaw kósherleri menen baylanıstırıw qaǵıydasına boysınıw kerek. Kese hám boylama júk kóteriwshi diywallı imaratlarda ishki diywaldıń geometriyalıq kósheri koordinaciyalaw kósheri menen birlestiriledi. Gerbish hám mayda bloklı yamasa tas diywallı imaratlarda sırtqı júk kóteriwshi diywalǵa plitalar jatqarılatuǵın bolsa, joybar kósherinen «200 mm» aralıqta, yaǵnıy tiykarǵı modul M=100 mm ge bólinetuǵın etip jaylastırıladı. Ishki hám sırtqı diywal ózin-ózi kóteriwshi bolsa joybar kósheri menen birlestiriledi. Imaratta joybar kósheri shtrix-punktir sızıq penen sızıladı hám arab cifrları yamasa latın álipbesiniń bas háripleri (Z, I, O, H háriplerinen basqa) diametri 6-12 mm li dóńgelek etip belgilenedi.