Bilimlendiriw ministirligi

Imarat fasadın sızıw
Fasadlardıń sızılmalarında imarattıń sırtqı kórinisi súwretlenedi. Bul sızılmalar arqalı imarattıń konstruktivlik hám arxitekturalıq elementleriniń jaylasıwı hám formalarına (tereze, esikler, balkonlar, sırtqı esik joqarısındaǵı karniz, morı hám samallatıw kanalları, balkalar hám t.b.) dıqqatımızdı qaratamız. Joybarlanıp atırǵan imarattıń sırtqı kórinisi onıń atqaratuǵın xızmetin ańlatadı. Imarattıń arxitekturalıq kórinisinde imarat bólimleriniń ólshemlerin hám aralıq qatnasların, tereze orınları hám aralıqları belgili tártipte tákirarlanıwların, balkonlardıń jaylastırılıwın hám onıń tosıqların durıs tańlap alıwımız kerek.Imarat fasadın sızıwda imarat planları hám qırqımlarınıń sızılmaları tiykar bolıp xızmet etedi. Fasadtı sızıw tómendegi tártipte alıp barıladı:
joybar kósherleri júrgiziledi hám imarattıń ulıwma sırtqı kórinisi sızıladı;
tereze hám esik orınları, balkonlar, sırtqı esik joqarısındaǵı karniz plitaları, fasadtıń basqa elementleri sızıladı.
terezeler ramaları, esikler, balkon, bastırmadaǵı morı hám samallatıw kanalları sızıladı.
fasadtıń qırqımlarǵa sáykesligi kórip shıǵıladı hám fasad sızıladı.
Fasadda ólshemler qoyılmay, tek ǵana múyeshlerde joybar kósherleri kórsetiledi. Sızılmanıń shetinde shepte yamasa ońda biyiklik belgileri, jer qáddi, cokol, terezenıń joqarı hám tómengi orınları, imarattıń basqa elementleriniń qáddi belgilep jazıp qoyıladı.Fasad shep hám oń tárepindegi kósherlerine sáykes túrde sızıladı. Mısalı: «1-13 kósherler boyınsha fasad».
Fasad M1:100

Túyinler sızılmaları
Tiykarǵı sızılmalardıń ayrım bólimlerin iri masshtabta kórsetiwge zárúrlik tuwılsa, túyin sızılmaları sızıladı. Túyinlerdi konstrukciyalaw sáykes joybar kósherin anıqlawdan baslanadı. Birinshiden túyindi anıq islep shıǵıwdı támiyenleydi hám ekinshiden onıń imarattaǵı jaylasıw ornı anıq boladı. Usı maqsette túyinlerde kerekli koordinatalar (kósherler hám biyiklik mánisleri) súwretlenedi. Túyinlerdiń tiykarǵı sızılması qaysı proekciyada bolsa, sonday etip súwretlenedi.