Bilimlendiriw ministirligi

Kurs jumısınıń wazıypası
Kurs jumısınıń tiykarǵı maqseti joybarlaw máselelerin sheshiw, arxitektura – qurılıs jumısshı sızılmaların tayarlaw qaǵıydaları, materiallardı grafikalıq kórsetiw, túsindirme xatın tayarlaw, qabıllanǵan sheshimdi texnika-ekonomikalıq jaqtan tereńirek bahalawdı úyreniwden ibarat. Student óz betinshe joybarlaw processinde texnikalıq ádebiyatlar, belgilengen norma hám qaǵıydalar, óz betinshe islewde alınǵan bilimlerin tájriybede qollanıwdı kurs jumısın orınlaw barısında úyrenedi. Kurs jumısın óz betinshe orınlaw studentlerdiń teoriyalıq bilimlerin tereńlestiriwge hám bekkemlewge imkaniyat jaratadı.
Kurs jumısına qoyılatuǵın ulıwma talaplar hám dáslepki maǵlıwmatlar
Kurs jumısın orınlaw ushın dáslepki maǵlıwmatlar, joybaraw tapsırması oqıtıwshı tárepinen variant túrinde beriledi. Tapsırmada joybarlanatuǵın turaq jay imaratındaǵı kvartiralar sanı, túri, júk kóteriwshi diywal materialı, fundament, bastırmalar, qurılıs ornı haqqında maǵlıwmatlar keltiriledi.
Tapsırmada plan sxeması kórsetiledi.
Plan sxemada qabatlar, qabatlarda kvartira yamasa bólmelerdiń jaylastırılıwı hám olardıń ólshemleri haqqında ulıwma túsinikler beriledi. Plandı tolıq islep shıǵıw hám ólshemlerin normalastırıwdı student óz betinshe orınlaydı. Sáykes túrde fasad, qırqım arxitekturalıq hám konstruktiv sheshimleri belgilenedi. Tapsırmada kórsetilmegen element yamasa konstrukciyalar student tárepinen erkin qabıllanadı. Plandaǵı konstruktiv ólshemlerin belgilewde hám qabıllawda arnawlı texnikalıq ádebiyatlardan, sabaqlıqlardan, oqıw qollanbalarınan, norma hám qaǵıydalardan, kataloglardan, standartlardan, tiplestirilgen joybar hám bólimler albomınan paydalanıw maqsetke muwapıq.Koordinaciyalaw kósherleri jeke modul sistemasına muwapıq tańlanadı. Progressiv jergilikli pardozlaw materialları hám zavod sharayatında tayarlanatuǵın arxitekturalıq buyımları keń kólemde qolanılıwı tiyis.Joybarlanatuǵın turaq jay imaratınıń qala qurılısında jaylasıwın ámelge asırıw maqsetinde sekciyalar «Shegaralanǵan orientaciya» yamasa «Ayrım jerleri shegaralanǵan orientaciya»da joybarlanıwı tiyis.Turaq jay imaratları jerdiń ústińgi hám astıńǵı bólimleri, imarattıń tiykarǵı konstruktiv elementleri fundamentler, diywallar, qabatlar aralıq bastırmalar, ayrıqsha tayanıshlar, bastırmalar, terezeler, esikler, teksheler hám ishki peregorodkalardan ibarat. Birinshi qabatınıń polı qáddinnen tómende jaylasqan konstruktiv elementler-fundament, jer tóleler texnikalıq maqsetlerge mólsherlengen jer tóle diywalları imarattıń astıńǵı bólimi sanaladı. Birinshi qabattıń polı qáddinen joqarıda jaylasqan konstruktiv elementler imarattıń ústińgi bólimin quraydı. Fundamentler imarattıń jer astı bólimi bolıp, olar imarat awırlıǵın ózine qabıl etip, onı tiykarǵa uzatıwshı konstrukciya. Diywallar óz wazıypasına hám jaylasıwına qarap ishki hám sırtqı, bólmeni sırtqı ortalıq tásirinen qorǵawshı yamasa bólmelerdi bir-birinen ajıratıp turıwshı bolıp, bir waqıttıń ózinde olar júk kóteriwshi wazıypasında atqaradı.