Dilnoza abduhamidova, Navoiy viloyati. [phone]

9.06.16 13:30
***
Бошингда мингта ўй, минг битта ташвиш,
Шошилиб боряпсан ўз даланг томон.
Ҳали шафақларнинг ороми узун,
Сени жим кузатиб турибди осмон.

Кетмонинг мудрайди елкангда ҳануз,

Чайқалиб қўяди лолақизғалдоқ.
Дуолар қиласан, содда, самимий,
Сочларингдек оқ-у кўнглингдек оппоқ.

Ҳали қўрасида ухлар қўзилар,

Шарқироқ сойларнинг сокин овози.
Ором оғушига ўраниб олган,
Ўша чигирткалар тинмаган сози.

Эгилиб турибди тоғлар пойингда,

Чалмади тириклик ҳануз ҳам бонгни.
Дўппингда жилмайиб турган умид-ла,
Ота, йўл-йўлакай уйғотгин тонгни.


15:55 4.05.16


Опам Ҳулкар Ғаффоровага
Навоийдан Хатирчига ижодий сафарга борар чоғ.
Юрагим шодлик-ла ёнингга учиб,
Боряпти кутиб ол, эй содда қишлоқ.
Шаҳарнинг шовқинли кўчаларида,
ахир соғинганман сени кўп, узоқ.

Қўлларин силкийди таниш тераклар,

Буғдойзорлар турар эгик, солланиб.
Қуёшнинг тафтидан маржон жилғалар,
Кўзни қамаштириб турар товланиб.

Пахта эгатларда букилган беллар,

лойсувоқ томларда унган лолалар.
Югурар чанг кўча чангларин қучиб,
Юзига лой чаплаб олган болалар.

Ота, кетмонингиз қўйинг бир четга,

Бир пас тиним беринг Ернинг жонига.
Солиб олдим қувонч, бори севинчни,
Юракнинг тугилмас дастурхонига.

9:10 7.05.2016

ҚИШЛОҚ

Қайдадир итларнинг узоқ увлаши,

Хўрозлар қичқирар тинч қўноғида.
Дунёнинг туғилар янги умиди,
Уйғонса қуёшнинг ол яноғида.

Эриниб кўзини ишқалайди тонг,

Содда одамлардан туриб бироз кеч.
Онам, меҳр тўла қалаблари билан
Саҳар нон ёпишин канда қилмас ҳеч.

Қир санаб боряпти чўпон таёғи,

Қўйлар боши сарак елга ҳамоҳанг.
Тоғлар ҳаяжонда, завқланар олам,
Какликлар сайроғи ажиб бир оҳанг.

Мен эса шошаман тўртта шеъримни,

Орқалаб шаҳарнинг тош кўчасига.
Негадир овора бўлиб юрибман,
Киролмай кўнгилнинг бош кўчасига.

Ўйларга ўраниб чарчаган бекат,

Хуш қол болалигим улғайган ўтлоқ.
Меҳр тугунчасин тугиб қўлимга,
Онамдек кузатар, самимий қишлоқ.