Gara Seýitliýew Saýlanan eserler

ADAM WE
ÝAGŞY NIÝET
Awçy dostum, atma ýaşylbaşlary,
Açgöz bolmak adamzada ýaraşmaz.
Matama batyrma saýrak guşlary,
Ölüm düşse, saýrak guşlar saýraşmaz.

---

275
Belki, seň atjagyň eziz enedir,
Çagalary garaşýandyr çöllerde.
Enä zulum etmek külli günädir,
Goý, gelin ýaşylbaş ýüzsün köllerde.
Awçy dostum, atma ýaşylbaşlary,
Gan düşmesin mawy kölüň gözüne.
Ganatly döräpdir dünýäň guşlary
Uçup seýl etmäge dünýäň ýüzüne.
Ganatly döräniň gyrma ganatyn,
Ýaşabilmez guş ganatdan aýrylsa.
Bilýär olar adamzadyň gudratyn,
Ýaşabilmez adamzatdan aýrylsa.
Awçy, dostum, taşla elden goşany,
Tomaşa et balyjaklaň, oýnuna.
Ýagşy niýet ― ýaşylbaşlaň ýaşany,
Ýaman niýet ― nadanlaryň boýnuna.
Ürküzme wepaly eziz guşlary,
Seni dosty saýýar, gitmän daşyndan.
Awçy dostum, atma ýaşylbaşlary, 
Atsaň-da gör, aýlanyp dur başyňdan. 

---

276
ADAM WE ADAMYŇ BORJY
Olaryň toýunda hemmämiz bardyk.
Hemmämiz el çarpyp şat gutlaýardyk,
Ol toýda hemmämiz kän şerap içdik.
Gözel tostlar aýdyp, gezegne joşduk.
Hatda käbirimiz goşgy hem goşduk
Ol iki juwanyň päk söýgüsine.
Özlerem geň galdy öz öwgüsine.
Soňra biz nätdik?
Dargadyk gitdik.
Ne myhman çagyrdyk,
Ne myhman gitdik.
Ne- de habar tutduk
Olaryň ýaşaýşyndan.
Ol juwanlar geçirmändir başyndan
Durmuşyň iň sada çetinligini.
Durmuşyň iň sada çetinligini.
Olar çişiripdir hyýallarynda.
Hiç zadyň üstünde aralarynda
Kiçijik dawalar çykyp başlanda.
Hiç biri olaryň giňlik etmändir.

---

277
Gyz gyşyk gürrüňi orta taşlanda
Oglan hem jogabyn bermän ýatmandyr.
Artypdyr gün-günden öýkäniň sany,
Gyzypdyr gün-günden juwanlaň gany.
Hiç zadyň üstünde ýüzün sowuşyp,
Hiç zadyň üstünde çäýnek döwüşip,
Ýykypdyrlar bir-birlerniň göwnüni,
Ýakypdyrlar bir-birlerniň ýüregni.
Ynsanyň ýüregi näzik aýnadan,
Her çäýnek döwlende bir çat açypdyr,
Günleriň birinde açyk aýnadan,
Ol öýdäki bagt guşy uçupdyr...
Arman, şonda açyk duran aýnadan
Gidip barýan bagty birimiz saklap,
Ýaşlara ýene-de tabşyran bolsak,
Söýgüli ýürekleň döwgün seýikläp,
Mäkäm bir-birine gowşuran bolsak.
Onda olar gelmezdiler bu ýere.
Bu ýer nire?
Bu ýer ― sud.
Galan pursat bäş minut.
Häzir sorag başlanjak,
Iki aşyk ýürekden.
Häzir ykbal çöşlenjek.
Ine, şo sebäpden men

---

278
Aklawçydan öň,
Garalawçydan öň,
Ilki özümizden,
Soňra hem sizden
Soraşmak isleýän rugsat berseňiz,
Nirde bolduk biz?
Biziň hemmämiz
Şol toýda bardyk.
Soň näme üçin söýgini goramadyk?
Söýgini goramaly, söýgüsiz öý betbagt.
Hiç kim şuny ýadyndan çykarmasyn hiç wagt!