Ибрайым юсупов ҳӘр кимниң ӨЗ

 
 
 
 

---

40 
 
БУЛ САМАЛДЫҢ ЕСПЕЙТУҒЫН ЖЕРИ ЖОҚ… 
Күншиллер хәм ғыйбаткешлер 
өтирикти шындай етип тоқып 
шығарады 
хәм 
ойлаған 
мақсетине ериседи. 
Амир Темур 
"Өсек хәм ғыйбатқа ҳеш қулақ аспа"
Деп билгишлер ақыл айтқан болады.
Бирақ ақыл басқа, өсек сөз басқа,
Ҳәр қайсысы өз жолынан барады. 
Өсек сөз дегениң ызғырық самал,
Бул самалдың еспейтуғын жери жок. 
Бийдай арасында ийтсийгек болар,
Ҳарам шөптиң өспейтуғын жери жоқ. 
Күншиллик—ғыйбаттың бузық анасы,
Дөҳмет—жала менен ойнастан туўған
Жалған менен ыраслықтың арасы
Билинбестей етип шебер тоқылған. 
Ғыйбат өз зәҳәрин иширсе езип,
Инсан кеўлин ғаплет думаны басқан
Жигитлер ең жақсы достынан безип,
Патшалар ең садық үәзирин асқан. 
"Өсек сөз ийеси қатынлар" десе,
Инанбаң! Өсектиң жынысы болмас
Еркеклер бар, ғыйбат отын үрлесе,
Ҳаял заты оған ерисе алмас 
"Аллаңды умытпа" деп жүрип олар,

---

41 
Ақбайталлық етип өсек тоқыйды
Қус туқымы болған менен қарғалар,
Жеркенбестен патас затты шоқыйды. 
2000-жыл. 
 
УЛЛЫ БАБАМЫЗДЫҢ РУЎҲЫ ШАД БОЛҒАЙ 
 
(Берунийдиң 1025 жыллығына) 
Бул жер тегин емес, бул муқаддес жер,
Ҳәзирети Хызрлы қырқ мәрте көрген
Еңбек еткенлерди емиземен дер,
Буған Дийқан баба нәпеси сиңген. 
Жайҳун суўларынан шөллери қанып,
Ырыс-несиби зыят дәраматлы жер
Улуғлардың киндик қанлары тамып,
Бесиги тербелген кәраматлы жер. 
Өткенлердиң исмин еслеп, яд етип,
Дуўа қылып, саўап етсең арзыйды
Уллы бабамыздың руўҳын шад етип,
Басқан изин даўам етсең арзыйды. 
Илим дүньясының бийик көгинде
Сиз жети жулдыздың бири болдыңыз
Пәрўаз еткен илаҳийлик шегинде,
Алымлар султаны, пири болдыңыз. 
Бүгин бурқып аққан Әмиў бойында
Еркин мустақиллиқ самалы есер 
Жаңа әўладлардың ақыл-ойында
Дана ўәсиятларың ядларға түсер. 
Қаншама тәкаббыр патшалар өтти,

---

42 
Жәҳәнди титиреткен даңқ-салтанаты.
Көби умытылды. Лекин әлбетте
Умытылмас Беруний бабамның аты. 
Мақтанаман бүгин бул алтын гүзде
Ўатанлас әўладың болғанлығыма.
Мың жылдан кейинги мерекеңизде
Сизди тәрийп етип турғанлығыма.