Ikki elning tanti

QADRDON SO‘QMOQLAR SHE’RIDAN TA’SIRLANIB! 
 
Yillar o‘tib keldim shu so‘qmoqlarga, 
Turnalar uchadi olis yoqlarga. 
Yoshlik paytlarim eslab, xotirlab, 
Sevinchdan yuragi, ko‘zlari porlab. 
Qo‘shni qiz oldimdan chiqib qolarday, 
Yana menga qarab jonim olarday. 
Qayta bola bo‘lib qolgim keladi, 
Qo‘shni qiz suhbatin olgim keladi. 
Biroq endi u yo‘q, olis yoqlarda, 
Paxtazorda uchrashgan paytlar yodlarda. 
Nechog‘lik dilimga yaqin bu so‘qmoq, 
Umr oqar suvdir, topmoq, yo‘qotmoq. 
Kapalak quvirdim, gullar terardim, 
Yo‘lda uchraganga salom berardim. 
Cholga salom bersam o‘sha so‘qmoqda, 
Meni tanimadi, buni bilardim... 
Chunki o‘zgarganman, ajinlar qator, 
Ana, ro‘paramda o‘sha qora tol. 
Bu umr suvdayin oqarkan do‘stim, 
Kimnidir yo‘qotdik, kimnidir topdik. 
Yuragda ajib bir hayajon ila, 
So‘qmoq mavzusini shu yerda yopdik. 
Agar eslay desam xotirlar qator, 
Sevgimdan esdalik o‘sha qora tol… 
Sarvinoz Masharipova,
Chet tillari fakulteti
20.15-guruh talabasi 

---

143 
EL FARZANDI 
Kezganmisiz, azim poytaxt 
Go‘zal shahru biyobonin. 
Qad rostlagan haykallari 
Adiblarning xiyobonin. 
“Rahmat, senga zamonim” deb
Turar chetda el farzandi. 
Ham o‘zbekning o‘g‘loni, ham 
Qoraqalpoq jigarbandi. 
Lermontovga dildosh edi, 
Otash yonar satrlarda, 
Adabiyot-la sirdosh edi 
She‘r oqardi tomirlarda. 
Nolalari qo‘bizlarda 
Oh urardi, chekib fig‘on. 
Qo‘shiqlari qalb so‘zlarda
Mavjlanardi, jo‘shar har on. 
El mehridan olib quvvat, 
Charchamasdi, tolmas edi. 
Millat uchun bir haqiqat: 
Tuproq – “Oltin qirg‘oq” derdi. 
Berdaqdan u bo‘lgan tomchi 
O‘zbeklarni og‘a etgan. 
Qoraqalpoq madhiyasin 
O‘z xalqiga bunyod etgan. 
Ko‘ring, chorlar, saksovullar, 
Chorlar Nukus tomonlari. 
Ibroyimin izlab hanuz 
“Esar , Jayhun shamollari”. 
Odinaxon Abdusamatova 
Tarix fakulteti 
21.119-guruh talabasi 

---

144