Iqtisodiy protsessual huquqi yakuniy nazorat

40-kazus

Ishtixon tuman davlat soliq inspektsiyasi (bundan buyon matnda DSI deb yuritiladi) tumanlararo iqtisodiy sudiga ariza bilan murojaat qilib, qarzdor – «Al-Nosir» MChJ (bundan buyon matnda MChJ deb yuritiladi)ni bankrot deb topishni soʼragan.

Birinchi instantsiya sudining 2017 yil 4 iyuldagi hal qiluv qarori bilan MChJ bankrot deb topilib, tugatishga doir ish yuritish boshlangan.
Sudning 2017 yil 29 dekabrdagi ajrimi bilan taraflar oʼrtasidagi kelishuv bitimlari tasdiqlanib, bankrotlik ishi boʼyicha ish yuritish tugatilgan.
Viloyat prokuraturasi tomonidan kassatsiya protesti kiritilib, unda MChJning byudjetdan qarzlarini uning mol mulki hisobidan undirish choralari koʼrilmaganligi, kreditorlar oʼrtasidagi kelishuv bitimini imzolagan shaxslarning vakolatlari tekshirilmaganligi, u yuridik shaxs maqomiga ega boʼlmagan taraflar tomonidan imzolanmaganligi sababli, sudning 2017 yil 4 iyuldagi hal qiluv qarori hamda 2018 yildagi 29 noyabrdagi ajrimini bekor qilib, xoʼjalik ishini yangidan koʼrish uchun birinchi instantsiya sudiga yuborish soʼralgan.
Ishdagi hujjatlardan koʼrinishicha, Iqtisodiy nochor korxonalarni tijorat banklariga sotish boʼyicha Respublika komissiyasining 2017 yil 30 martdagi yigʼilishi bayoni bilan (2017 yil 12 aprelda 02-16-8 raqami bilan roʼyxatga olingan) oldin xususiylashtirilgan, faoliyat koʼrsatmayotgan, kam quvvat bilan faoliyat koʼrsatayotgan korxonalarga bankrotlik taomillarini qoʼllash taklif etilgan.