Jalil rahmat

17.01.2009.

Ko`klam qo`shig`i

Yog`ar bo`lsa bahorning sel yomg`irlari,

Tebranadi ona zamin tomirlari,
Boychechakka to`lar Boysun, Zominlari,
Shudring bo`lib qo`nsam deyman ularga men.

Ko`k yalpizlar ifori xush nahrlarda,

Shalolalar oqqan tog` yon-bag`rlarda,
Qulunchalar quvlashgan qir, adirlarda,
Kuygan ko`nglim ko`msam deyman kuylarga men.

Ko`klamini sizu bizdan ko`proq kutgan,

Subhning salqin sabosida titroq tutgan,
Kapalakka mehr ila yaproq tutgan,
Havas qildim har bir giyoh, gullarga men.

Ko`ksimda sof his-tuyg`ular jo`sh urgan payt,

Yo Xudoyim, yonimda kim do`st turgan, ayt,
Jalil Rahmat bag`ishladim besh-olti bayt,
Olloh ishqin olov bilgan qullarga men.

* * *
Ashklarim ko`zimga yetar,

G`ashlarim bo`zimga yetar,
O`z g`amim o`zimga yetar,
Menga ortiq dard kerakmas.

Qalbi bir gul yaproq o`zim,

Qadri bir pul tuproq o`zim,
Dog`da qolgan ko`proq o`zim,
Menga ortiq gard kerakmas.

Tilmochlarga bu bir tilsim,

Kimligimni Xudo bilsin,
Yaxshilardan duo bo`lsin,
Menga ortiq gap kerakmas.

* * *
Xudodan xurram ishq xumorin so`rab,

Eng toza tuyg`ular tumorin so`rab,
Ilhom parilari ro`molin so`rab,
Yuragim toqiga taqgim keladi.

Sevgi qudratini sof dilda ko`rib,

Sog`inch suratini sohilda ko`rib,
To`lqinlar shiddatin Tohirda ko`rib,
Mening ham sandiqda oqgim keladi.

Bolam bilmay, onam bildi qadrimni,

Tikanlar tirnadi, tildi qalbimni,
Ehtimol egallar erta qabrimni,
Vujudim olovda yoqgim keladi.

Sirdoshim, kel qo`yay sirimni ochib,

Qay banda qutulgan taqdirdan qochib,
Ko`ngil ko`zgusidan yog`dular sochib,
Borliqqa bearmon boqgim keladi.
* * *
Shoh bo’lsang shoshilib, shoning dog’ etma,
Nomarddan non tilab, noming dog’ etma,
To’rt kunlik dunyoda to’zg’ib ketarsan,
Joning qalqib turgan joming dog’ etma.

* * *
Toparingda uy to’lib, do’st-yor kelar,

Yuking yerda qoldirmay, yuz bor kelar,
Gar yo’qotsang, yondashmaslar yoningga,
Dunyo ko’zga, do’pping boshga tor kelar.

* * *
Biri mizg’ib turib, moling ovlaydi,

Biri izg’ib yurib, izing kovlaydi,
Har ikkisi bitta o’rmon ichida,
Yo’lbarsman deb, mushukday miyovlaydi.

* * *
Qulluq qilar, xushomadni xush ko’rar,

O’zni, go’yo begunoh bir qush ko’rar,
Do’stingman deb, suyab turib o’ngida,
Qoqilishing har kecha bir tush ko’rar.

* * *
Otda yursang, ortingdan tosh otarlar,

Yayov qolsang, yarim yo’lda qoparlar,
Gap qilishib gadoni ham, shohni ham,
So’ng, suyunchi istab, to’rt yon choparlar.

* * *
Dunyo o’zi sir talashgan bir bozor,

Biri sotsa, ikkinchisi xaridor,
Dovdirama, ko’z-ko’z qilib davlating,
Har bandaning kami bitta qarzi bor.
* * *
Oydir husni, guldir jismi,
Husni guldir, jismi otash,
Guldir jismi, otash ismi,
Jismi otash, ismi Mohvash.

* * *
Sanam sochi anbar isi,

Sochi anbar, isi sarxush,
Anbar isi, sarxush kishi,
Isi sarxush, kishi behush.

* * *
Kimdir yuksak, mag’rur qoyaga o’xshar,

Kimlardir bir umr soyaga o’xshar,
Kimningdir sotgani quruq safsata,
Kimningdir har so’zi g’oyaga o’xshar.

* * *
Gumrohga chiroyli gulday bu dunyo,

Aqli butunga bir pulday bu dunyo,
To’zonda to’zg’igan kulday bu dunyo,
Nafsi badni qilar qulday bu dunyo.

* * *
Achinib boqmang unga, nochor, ko’ngli yarim deb,

Mehr topsa bir chimdim, to’lib qolar ko’ngil ham.
Shukr qilib yashar u, yolg’izgina tangrim deb,
Yaproq yozar intilib, quyosh nuriga gul ham.

Nojo’ya bir so’z aytsa, yonidagi hamrohi,

Butun turgan bag’ri ham, sinib qolar o’sha chog’.
Kimga yetib, kimlarga yetmay qolganda ohi,
Tag’in ko’ngli yarim u, ko’ksi qo’sha-qosha dog’.

* * *
Samimiyat eshigin ochib,

Ko’ngil so’rab, keldi bir do’stim.
Ostonamga nur kirdi oqib,
Osmon qadar yuksaldi ko’ksim.

Yaproq yozib ko’karmoq uchun,

Suv icharmish ko’ngil-ko’ngildan.
Bugun seni sog’inganim chin,
Dildan suhbat quraylik bir dam.