Ўйин қоидалари 2022/23 The International Football Association Board

ҚОИДА

ПЕНАЛЬТИ ЗАРБАСИ
Ўйинчи ўз жарима майдони ичида ёки 12, 13-Қоидаларда ёзилганидек ўйин ҳаракати жараёни сифатида майдондан ташқарида жарима зарбаси билан жазоланадиган қоидабузарликни содир этса, пенальти зарбаси белгиланади. Гол бевосита пенальти зарбасидан урилиши мумкин.

1. 
   Тартиби
   

Тўп пенальти нуқтасида қимирламасдан туриши керак ҳамда дарвоза устунлари, тўсини ва тури қимирламаслиги зарур.
Пенальти зарбасини бераётган ўйинчи яққол ажралиб туриши керак.
Ҳимояланаётган жамоа дарвозабони зарба берилгунга қадар зарба бераётган ўйинчи томонга юзланган ҳолда дарвоза чизиғида туриши керак ҳамда дарвоза устунлари, тўсини ёки тўрига тегинмаслиги лозим.
Зарба бераётган ўйинчи ва дарвозабондан бошқа ўйинчилар қуйидагича жойлашишлари керак:

• 
  Пенальти нуқтасидан камида 9,15 м (10 ярд) масофада;
  
• 
  Пенальти нуқтасидан орқада;
  
• 
  Майдон ҳудудида;
  
• 
  Жарима майдони ташқарисида.
  

Ўйинчилар ушбу қоидага мос равишда жой эгаллаганларидан кейин ҳакам пенальтини амалга ошириш учун ишора беради.
Пенальти зарбасини бераётган ўйинчи тўпни олдинга йўналтириши керак; тўп олдинга ҳаракатланиш шарти билан товон билан зарба беришга рухсат этилади.
Зарба берилиш чоғида ҳимояланаётган жамоа дарвозабони камида битта оёғи билан чизиқга тегиб туриши ёки чизиқ билан битта сатхда бўлиши керак.
Оёк билан зарба берилганидан кейин сезиларли ҳаракатланганда тўп ўйинда ҳисобланади.
Зарба берган ўйинчи бошқа ўйинчи тўпга тегмагунча яна тўпга тегиши мумкин эмас.
Тўп ҳаракатдан тўхтаганда, ўйиндан чиқганда ёки ҳакам ҳар қандай қоидабузарлик сабабли ўйинни тўхтатганида пенальти зарбаси якунланган ҳисобланади.
Ҳар бир бўлим ёки қўшимча вақтлар сўнгида пенальти зарбасини амалга ошириш ва якунлаш учун вақт қўшишга рухсат этилган. Агар вақт қўшиб берилса, зарба берилганидан сўнг тўп ҳаракатдан тўхтаса, ўйиндан чиқса, ҳимояланаётган жамоа дарвозабонидан ташқари ҳар қандай ўйинчи томонидан ўйналса (жумладан, зарба берган ўйинчини ҳам қўшганда) ёки ҳакам зарба берган ўйинчи ёки унинг жамоадоши қоидабузарлик содир этгани учун ўйинни тўхтатса, пенальти зарбаси якунланган ҳисобланади. Агар ҳимояланаётган жамоа ўйинчиси (дарвозабонни ҳам қўшганда) қоидабузарлик содир этса ва пенальти зарбаси ноаниқ бажарилган / дарвозабон тўпни қайтарган бўлса ҳам, зарба такроран берилади.

2. 
   Қоидабузарлик ва жазо
   

Ҳакам пенальти учун ишора берган захоти зарба берилиши керак. Агар зарба берилмаган бўлса, ҳакам пенальти учун яна ишора беришдан олдин интизомий чора қўллаши мумкин.