Ájiniyaz atındaǵı Nókis mámleketlik pedagogika institutı T. Т.Ótebaev, U. Q. Seytjanova, Т. A. Esemuratova

Temanı ózlestiriw ushın sorawlar
1.Pedagogikada qarım-qatnas qanday qásiyetlerdi ózinde kórsetedi?
2. Oqıtıwshınıń oqıwshılar menen ózara jaqın qarım-qatnasınan tiykarǵı maqset ne?
3. Pedagogikalıq qarım-qatnas funkciyalarına tárip beriń?
4. V.A.Kan-Kalik Oqıtıwshınıń pedagogik qarım-qatnası dizimin qanday jónelisler tiykarında táripleydi?
5. Qarım-qatnastıń hár bir basqıshında jas oqıtıwshı neni biliwıi kerek?
6. Shólkemlestiriwshi hám atqarıwshı oqıwshılar haqqında kóz qaraslarıńız?
7. Oqıtıwshınıń oqıwshılar menen pedagogikalıq qarım-qatnası qanday principlerde ámelge asırıladı?
8. Oqıtıwshınıń janlı qarım-qatnası qanday usıllar tiykarında qáliplestiriledi?
9. Pedagogikalıq hárekette oqıtıwshı qarım-qatnas arqalı qanday tálim hám tárbiyalıq funkciyalardı orınlaydı?
10. Oqıtıwshınıń pedagogikalıq tásir etiwshi usıllarına tárip beriń
11. Oqıtıwshınıń basshı sıpatında klass toparın basqarıwda qollanatuǵın qarım-qatnas usıllarına tárip beriń
12. Oqıtıwshı qarım-qatnasın támiyinleytuǵın tiykarǵı talaplar haqqında óz pikirińizdi aytıń.
Talabalardıń erkin tayarlawı ushın tapsırmalar
Tómendegi tema tiykarında reje dúziń hám óz pikirlerińizdi bildiriń “Ózbetinshe jumıs“ jazıń.
1.“Qarım-qatnastıń pedagogikalıq hám psixologiyalıq qásiyetleri”
2.“Demokratiyalıq jámiyette oqıtıwshı hám oqıwshı qarım-qatnası”


6-MODUL. OQÍTÍWSHÍNÍŃ PEDAGOGIKALÍQ TEXNIKANÍ QÁLIPLESTIRIW JOLLARÍ


5-TEMA. PEDAGOGIKALÍQ TAKT HÁM ETIKA

Oqıtıwshınıń oqıwshılar ortalıǵında óz-ara qatnasıqta bolıwı - júdá qıyın proces. Biraq, onıń pedagogikalıq iskerligi tikkeley oqıwshılar arasında alıp barıladı. Ózara qatnasıqlardı isenim hám doslıq sezimleri menen bekkemlep barıw oqıtıwshıdan saldamanlı psixologiyalıq tayarlıqtı talap etedi. Onıń ushın oqıtıwshı eń dáslep, túrli xarakterdegi oqıwshılardan ibarat bolǵan, klass jámáátin tez-tezden ózgerip turatuǵın pedagogikalıq jaǵdaylarǵa dárhal óziniń qatnasıǵın bildiriwi hám oǵan ádillik penen baha beriwi kerek. Ol oqıwshılar háreketlerin durıs ańlap jetiwi, jaǵdaylardı aldınnan kóre biliwıi, tárbiyalıq metodlardı óz ornında qollawı, oqıwshılar menen qatnasıqta awır, saldamanlıq, shıdamlılıq, milliy qádiriyat hám jasaw tárizimizden kelip shıqqan qayır-saqawat hám saqıylıq, adamgershilik hám miyrim-aqıbet sezimlerin kórsete alıwı shárt. Bul wazıypalar oqıtıwshınıń moynına júklenetuǵın hám ol boysınıwı kerek bolǵan pedagogikalıq takt dep atalatuǵın zárúr shárti bolıp esaplanadı.

Pedagogikalıq takt – oqıtıwshı etikalıq – ruwxıylıq júzin ashıp beretuǵın ólshem sezimi yaki etikalıq qaǵıydalarǵa boysınıwı.Pedagogikalıq takt oqıtıwshınıń oqıwshılar menen óz-ara qatnasıǵın shólkemlestiriwshi qural. Psixologiyalıq til menen aytqanda, takt- insannıń bir qáliptegi qáliplesken qıyallarında jámlengen jeke insanıy qásiyetleriniń jıynaǵı.
Pedagogikalıq takt ólshemleri oqıtıwshıdan eń dáslep joqarı insaniy pazıyletlerge iye bolıwın talap etedi. Tálim – tárbiya sistemasın reforma qılıwdıń tiykarǵı maqsetlerinen biri kámil insan tárbiyası bolıp, ol mámleket siyasatınıń eń joqarı jónelisi dep daǵazalanǵan. Ańı joqarı, ǵárezsiz pikirley alatuǵın, minez – qulqı menen basqalarǵa ibrat bolatuǵın bilimli, sawatlı jaslardı tárbiyalap kamalǵa jetkiziw oqıtıwshınıń moynında. Sonday aq, házirgi demokratiyalıq jámiyet oqıtıwshısınıń ózi eń dáslep bárkamal insan bolıwı, tamamlanǵan bilimler iyesi, óz kásibiniń jetik iyesi bolıwı zárúr. Oqıtıwshı minez – qulqında pedagogikalıq takt belgili bir múddette qáliplesip tamam bolatuǵın proces emes, onıń sebepleri hám jámiyettiń rawajlanıwı nátiyjesinde úziliksiz óz kórinisine iye bolıp baradı.