Joba: Ulıwma mağlıwmatlar

Kepserlew metalı hám flyusler..
Gaz jalını menen kepserlewde kepserlengen birikpeniń sapası kepserlew metalınıń jağdayı hám de ximiyalıq quramına hám tigis vannasınıń (tigsiti toltırıwshı suyıq metalldıń) sırtqı ortalıqtan qánshelli qorğalğanlığına baylanıslı. Kepserlengen birikpeniń sapalı shığıwı ushın kepserlew metalınıń ximiyalıq sostavı tiykarğı (kepserlenetuğın) metalldikine jaqın bolıwı, kepserlew metalı áste-aqırın bir tegis eriwi, átirapqa shashıramawı, gaz kóbiklerin payda etpewi, onıń beti taza bolıwı kerek. Kepserlew metalınıń diametri kepserlenetuğın metalldıń qalıńlığına baylanıslı boladı.
Kepserlengen birikpeniń sapasın jaqsılaw ushın flyuslerden paydalanıladı. Flyus isletiwden maqset tigis metalın qálpine keltiriw, onı metall emes qosımtalardan tazalaw hám suyıq metall betinde onı hawa kislorodı tásirinen saqlawshı shlak qabatı payda etiwden ibarat. Flyusler sıpatında kremniy oksidi, soda hám basqalar qollanıladı.


Metallardı kislorod penen qırqıw.
Kislorod penen qırqıw, janıw temperaturasına deyin qızdırılğan metalldıń kislorod ağımında janıwına tiykarlanğan.
Kislorod penen qırqıw processi tómendegiden ibarat. Qırqılatuğın jerdiń metalı kislorodqa qosılıp janatuğın dárejede gaz gorelkası menen qızdırıladı, sońınan qızdırılğan jerge kislorod ağımı jóneltiriledi.
Kislorod penen qırqıw ushın tiykarğı shártler tómendegilerden ibarat: metalldıń kislorodta janıw temperaturası eriw temperaturasınan tómen bolıwı kerek. Máselen, az uglerodlı polattıń kislorodta janıw temperaturası 1350°S, eriw temperaturası bolsa 1500°S ğa jaqın, demek bunday polattı kislorod penen ańsat qırqıw múmkin.
Janıw temperaturasında polattıń joqarı qatlamı janadı, bunda ajıralğan ıssılıq tómengi qatlamnıń janıwına járdem beredi. Solay etip, polat sırttan ishkerige qarap kúyip baradı, aqırında qırqılıp túsedi.
Shoyın, mıs hám alyuminiy birikpelerin kislorod penen qırqıp bolmaydı, sebebi olardıń eriw temperaturası kislorodta janıw temperaturasınan tómen.
Metallardı kislorod penen qırqıwda universal keskishten paydalanıladı. Bunday keskishlerde mundshtuktiń bir tesiginen acetilen-kislorod aralaspası, ekinshi tesiginen bolsa kesiwshi kislorod shığadı. Acetilen-kislorod jalınında metall janıw temperaturasına deyin qızdırıladı, kesiwshi kislorod bolsa metalldıń qızğan jerin jandırıp baradı, nátiyjede metall qırqıladı. Áne usınday keskishtiń dúzilisi 5.3- súwrette kórsetilgen.