Joba: Ulıwma mağlıwmatlar

5.2-súwret. STN tipindegi transformatordıń sxeması:
I-baslanğısh oram, II-ekilenshi oram, 1-elektrod, 2-elektrod uslağısh, 3-kepserleniwshi metall, 4-regulyator.
Elektr duga menen kepserlewdiń qolda, yarım avtomat hám avtomat usılları bar.
Qolda kepserlewde hámme jumıslar (duga payda etiw, elektrodtı jılıstırıw hám basqa) qol menen orınlanadı. Qolda kepserlew postında elektrod uslağıshlar kómir elektrod ushın bólek hám metall elektrod ushın bir bólek boladı. Kepserlewde tok kúshi, kepserlenetuğın metalldıń qalıńlığı hám sostavına, tok túrine, elektrodtıń diametrine, birikpe túrine hám basqa faktorlarğa baylanıslı boladı.
Kepserlenetuğın metall qansha qalıń bolsa, elektrod diametri hám tok kúshi sonsha úlken boladı. Metall elektrod penen kepserlewde elektrod 15-20° qıya etip uslanadı. Kómir elektrod penen kepserlewde elektrod tok dereginiń teris polyusine jalğanadı.
Yarım avtomat kepserlewde kepserlew sımın (yaki elektrodtı) jılıstırıw mexanizaciyalastırılğan boladı, ıssılıq deregi bolsa qolda basqarıladı.
Avtomat kepserlewde barlıq jumıslar avtomatlastırılğan bolıp, kepserlewshi adamnıń wazıypası avtomatı iske túsiriw hám jumıs tamam bolğannan soń onı toqtatıwdan ibarat boladı.
Elektr-shlak usılında kepserlewde metallardıń biriktiriliwi kerek bolğan shetleri vertikal halatta bir-birinen málim bir aralıqta ornatılıp, shetleri mıstan tuwrı tórtmúyeshlik formasında ishi gewek etip islengen ıdıs penen oraladı, bul ıdıs suw menen suwıtılıp turıladı. Ídıstıń shetki aralığı flyus penen toltırıladı. Elektrod yaki elektrodlar menen tiykarğı metall arasında elektr duga payda etiledi hám bul duga ıssılığı esabına flyus erip, shlak payda etedi. Flyus erigennen keyin duga óshirilip, toktiń suyıq shlak arqalı metall tamanğa ótiwinde, Djoul`-Lenc nızamına muwapıq, ıssılıq ajıralıp shığadı hám temperatura 2000°S ğa deyin kóteriledi. Bul temperaturada elektrod sımı da, kepserleniwi kerek bolğan metall da erip, tigsiti toltıra baslaydı hám qatqannan keyin júdá bekkem kepserlengen birikpe payda etedi.
Elektr-shlak usılı qálegen qalıńlıqtağı metallardı kepserlewge imkan beredi hám júdá ónimli boladı.