Joba: Ulıwma mağlıwmatlar

5.9-súwret. Kepserlew usılın tańlaw.
Qosımsha material (sım) diametri d nı 15 mm li qalıńlıqqa shekem bolğan metallardı kepserlewde tómendegi formuladan anıqlanadı: d=(S/2)+1, bull jerde S kepserlenip atırğan materialdıń qalıńlığı, mm. Oğan kepserlewde sım diametrin kepserlenip atırğan metall qalıńlığınıń yarımına teń etip alınadı. 15 mm den qalıń metallardı kepserlewde diametiri 6-8 mm li sımlar qollanıladı.
Kepserlew jalını.
Gazde kepserlewde gaz jalınınıń roli úlken, onı alıw ushın kislorod, acetilen, vodorod, tirolizli, tábiyiy gazlerden paydalanıladı. Gaz hám kislorodtıń qosılıp janıwınan mundshtukta gaz jalını payda etiledi. Gorelkağa birilip atırğan kislorod hám gazdiń muğdarına qarap normal, oksidlewshi yamasa uglerodsızlandırıwshı kepserlew jalının alıwğa boladı.
Normal jalındı kislorod muğdarınıń acetilenge kólemi jağınan qatnası β=1 bolğanda alıw múmkin, al ámelde kislorodtıń pataslanıwına qarap normal jalındı kislorodtıń kólemi β=1,1-1,3 teń bolğanda alıw múmkin. Normal jalın kepserlew vannasında metalldı oksidlendiriwge járdem beredi hám sıpatlı tigis alınadı.
Normal acetilen-kislorodlı jalın 3 zonadan ibarat boladı (5.10-súwret): yadro I, kepserlew zonası II hám fakel III. Yadro acetilenniń janıwınan payda bolğan bólekshelerden quralğan hám jarıq konus tárizli qabıqqa uqsaydı.

5.10-súwret. Acetilen-kislorodlı jalınnıń dúzilisi

Yadronıń uzınlığı gaz aralaspasınıń basımına baylanıslı bolıp, onı ağım tezligi qansha úlken bolsa, ol uzın boladı. Kepserlew zonasınıń reńi yadronikinen ayırılıp turadı, ol uglerod hám vodorod oksidlerinen quraladı.

Bul zonada yadrodan 3-5 mm uzaqlıqta eń joqarı temperatura (3000⁰C) payda boladı. Jalınnıń bull bólegi menen kepserlenip atırğan metalldı qızdırıw hám eritiw, uglerod hám vodrod oksidleri metallar oksidin tiklewi múmkin. Kepserlew zonasında kepserlew jumısı orınlanadı. Fakel kepserlew zonasınıń sırtında jaylasqan bolıp, ol gaz hám suw puwınan ibarat. Janıw processi hawadağı kislorod esabınan boladı.
Kepserlew jalını onıń forması hám reńine qarap sazlanadı. Bunda pasport boyınsha kislorod basımı hám gorelkanı tańlaw tiykarğı rol`di atqaradı. Basım úlken bolsa, jalın mundshtuktan tez shığıp erigen metalldı kepserlew vannasınan ısırıp shığarıwı múmkin. Basım kem bolsa janılğı aralaspası kemeyip jalın uzınlığı qısqaradı hám qayta soqqı payda bolıw qáwipi kelip shığadı. Normal jalın alınğanda yadro jarqın hám anıq boladı. Metall túrine qarap jalın tańlap alınadı.
Kepserlew jalınınıń tiykarğı kórsetkishi ıssılıq quwatı esaplanadı. Jalın quwatı dep 1 mm qalıńlıqtağı metalldı kepserlewge tuwrı keliwshi acetilen sarpına aytıladı hám l/saat ta ólshenedi, al salıstırma quwatı /saatmm de ólshenedi.


Qadağalaw ushın sorawlar:
1. Kepserlew dep nege aytıladı?
2. Kepserlewdiń qanday usılları bar?
3. Elektr duga menen kepserlewde qanday toklardan paydalanıladı?
4. Turaqlı tok deregi sıpatında qanday generatorlardan paydalanıladı?
5. Elektr duga menen kepserlewdiń qanday usılları bar?
6. Kepserlew metalı hám flyusler degende nenii túsinesiz?
7. Metallardı kislorod penen qırqıw degende neni túsinesiz?
8. Gaz jalınında kepserlew dep nege aytıladı?
9. Kepserldew sıpatı nege baylanıslı boladı?
10. Kepserlew usılların aytıp beriń?
11. Birikpe payda etiwde nelerge itibar beriledi?