M. Dáwletov, Sh. Allaniyazova, D. Seytqasımov, A. Dáwletova

Sorawlar hám tapsırmalar:
1. Ákesi balasın miynet etiwge úyretiw ushın ne isledi?
2. Jumsawshı xojayın bala tuwralı ne oyladı?
3. Ákesi balasın qalay sınadı? Sol qatarlardı ertekten 
tawıp oqıp beriń.
4. Bala miynet etiwdi qalay úyrenedi?
5. Bala ne sebep ákesiniń qolına asıladı? Balanıń sózin 
tekstten tawıp oqıń.
6. Ertekti tásirli etip oqıp, mazmunın sóylep beriń. 
§ 29. Úlkemizdiń temir jolları
164-shınıǵıw. Tekstti oqıp shıǵıń. Mazmunın sóylep beriń.
Qarım-qatnas ushın eń arzan hám qolaylı bolǵan temir 
jollar uzaǵımızdı jaqın etpekte. 
Eń dáslepki temir jol 1950-jılı qurılǵan Chardjaw —
Qońırat temir jolı kóp waqıtlarǵa shekem qarım-qatnas hám 
júk tasıw ushın xızmet etti. 1967-jılı Qońırat — Beynew 
temir jolınıń qurılısı baslanıp, 1973-jılı paydalanıwǵa berildi. 
1970-jılları Qaraqalpaqstannıń ishinde temir jol qurılısı en 
jaydırıldı. Taqıyatas, Nókis hám Shımbay qalasına shekem 
temir jol salındı.
Házirgi waqıtta Ózbekstan aymaǵında temir jol qurılısı 
jáne de rawajlanbaqta. Tashkent — Samarqand jónelisindegi 

---

122
«Afrosiyob» jolawshı poezdı qatnap tur. Temir jollar arqalı 
tek jolawshı tasıp qoymastan, xalqımız ushın zárúr bolǵan 
júkler de alıp kelinedi.
165-shınıǵıw. Qosıqtı tásirli etip oqıń hám yadlap alıń. 
POEZD EMES, ELDIŃ DÁWLETI KELDI
Bul zaman jol salıp juldızǵa-ayǵa,
Ne isleymen dese qúdireti keldi.
Poezd qıshqırıǵı jańlap Shımbayda,
Búgin ullı toydıń sáwbeti keldi.
Táriypin aytayın bul kelgen zattıń,
Teplovozda kúshi altı mıń attıń,
Abadanlıq penen mádeniyattıń,
Aǵar bulaq ırıs-dáwleti keldi.
Sarras relsleri soldat qayıstay,
Ushqan qustan, esken jelden qalıspay,
Taw tiyeseń tartıp keter qalıspay, 
Ullı texnikanıń qúdireti keldi.
Shımbayda shay iship shıqsań esikten,
Poezd minip terbeleseń besikte,
Tek bolǵanı miner waqta keshikpeń,
Gudok shalsa, júrer múddeti keldi.
Ketseń bir kupede tórt adam bolıp,
Máskewge bararsań eki tań qonıp,
Poezd emes, aytsam ataǵın tolıq,
Zamannıń kóshpeli jánneti keldi.
Mıń alǵıs bul joldı salıp kelgenge,
Tulpardı noqtalap alıp kelgenge,
Zaman qádirin bilip dáwran súrgenge,
Shadlı turmıslardıń ziyneti keldi.
(I.Yusupov)

---

123
Sorawlar:
1. Dáslepki temir jol respublikamızda qashan salınǵan?
2. Temir jol respublikamızdıń qaysı rayonlarına shekem 
baradı?
3. Sizler temir jol transportı haqqında nelerdi bilesiz?