Maqsad: V guruh kationlarining sifat reaksiyalarini bajarish uchun amaliy ko‘nikmalarini hosil qilish

5.4. Temir (III) kationining reaksiyalari
Uch valentli temir tuzlarining eritmalari sariq yoki qizil-qo'ng'ir rangli bo'ladi.
1.O'yuvchi ishqorlar temir (III) tuzlari bilan qizil-qo'ng'ir rangli kuchli kislotalarda eriydigan Fe(OH)₃ cho'kmani hosil qiladi:
Fe³⁺ + 3 ОН^-→ Fe(OH)₃↓
Alyuminiy, xrom va rux gidroksidlaridan farqli ravishda amalda Fe(OH)₃ ishqorlarda erimaydi. Temir (III) ioni Fe(OH)₃ shaklida pH~3,5 bo'lganda to'liq cho'kadi.

2. 
   Ammiak ham temir (III) tuzlari bilan qizil-qo'ng'ir rangli cho'kma hosil qiladi.
   
3. 
   Natriy atsetat sovuq sharoitda temir (III) ioni bilan qizil rangli kompleks birikma [Fe(CH₃COO)₆(OH)₂]⁺ hosil qiladi. Qizdirganda bu modda qizil-qo'ng'ir Fe(OH)₂CH₃COO cho'kma hosil qiladi.
   
4. 
   Natriy gidrofosfat temir (III) bilan sarg'ish rangli cho'kma - FePO₄ hosil qiladi.
   
5. 
   Natriy, kaliy va ammoniy karbonatlar temir (III) ioni bilan qo'ng'ir rangli (FeOH)₂(CO₃)₂ tarkibli kislotalarda eriydigan cho'kma hosil qiladi. Bu cho'kma qizdirganda gidroliz tufayli Fe(OH)₃ ga aylanadi.
   
6. 
   Ammoniy sulfid Fe³⁺ ioni bilan qora rangli Fe₂S₃ cho'kma hosil
   qiladi:
   

2Fe³⁺ + 3(NH₄)₂S → Fe₂S₃↓ + 6NH₄⁺
Bu cho'kma kuchli kislotalarda eriydi:
Fe₂S₃↓ + 6HC1 → 2FeCl₃ + 3H₂S↑
Reaksiyada vodorod sulfid (qaytaruvchi) hosil bo'lganligidan temir (III) temir (II) gacha qaytariladi va bunda erkin oltingugurt ajraladi:
2FeCl₃ + H₂S → 2FeCl₂ + S +2HC1
Umumiy holda Fe₂S₃ ning kislotalarda erish reaksiyasi quyidagi tenglama bilan ifodalanadi:
Fe₂S₃ + 4HC1 → 2FeCl₂ + 2H₂S↑+ S
Reaksiyani bajarish. Uch valentli temir tuzining 2-3 tomchi eritmasiga shuncha (NH₄)₂S eritmasi qo'shiladi.