Мавзу: Мактабгача таълим муассасаларда

«ЧИВИННИ ТУТ!»

Болалар оралиғи узатилган қўл етадиган масофада давра қуриб турадилар. Тарбиячи доиранинг ўртасида, унинг қўлида узунлиги 1—1,5 м келадиган хивич, хивич учига қоғоздан ёки бошқа нарсадан ясалган чивин ип билан боғлаб қўйил­ган, у ипни болаларнинг бошидан сал юқорироқда айланти­ради. Болалар ўз устларидан ўтаётганда чивинни икки қўллаб тутмоқчи бўлиб сакрайдилар. Чивинни тутган бола: «Мен тутдим!» дейди. ўйин давом этади.

Ўйинда болалар сакраш пайтида даврани торайти­риб қўймасликлари учун уларни кузатиб туриш керак. Тарбиячи чивин боғланган ипни айлантирар экан, уни дам тушириб, дам кўтариб туради.
«ЧУМЧУҚЛАР ВА МУШУК»

Болалар майдоннинг бир томонига полга бир қатор қилиб қўйилган скамейкаларда ёки катта кубларда тикка турадилар. Булар томдаги чумчуқларни ифода этишади. Улардан нарироқда мушук (бирор бола) ухлаб ётган бўлади. Чумчуқ­лар сакраб пастга тушадилар, қанотларини ростлаб, ҳар томонга учиб кетадилар. Бироқ шу пайт мушук уйғониб қолади. У «миёв-миёв» дейди-да, тутган чумчуқларни ўз уйига олиб кетади. ўйин 5—6 марта такрорланади.

Болалар тиззаларини букиб, оёқ учида енгил сакрашла­рини кузатиб туриш керак.


«КУРК ТОВУҚ ВА ЖЎЖАЛАР»

Ўйинда қатнашаётган болалар жўжаларни, тарбиячи эса товуқни ифода этади. Курк товуқ ва жўжалар уйда бўлишади (устун ёки стуллар орасида 35—40 см баландликда арқонча тортилади, бу жой уй вазифасини ўтайди). Бир чеккада тасаввур қилинадиган қуш яшайди. Курк товуқ арқончанинг тагидан энгашиб ўтади ва болаларга дон қидириб кетади. Кейин «ку-ку-ку-ку» деб жўжаларини чақиради. Унинг овозини эшитиб, жўжалар ҳам арқонча тагидан ўрмалаб ўтишади ва югуриб товуқнинг олдига боришади. Ҳаммалари бирга ўйнайдилар, энгашадилар, чўнқайиб ўтирадилар, дон-дун қидирадилар. Тарбиячининг: «Катта қуш учиб келяпти», деган сўзларини эшитгач, ҳамма жўжалар тез қочиб кетади ва уйларига яширинади. Ўйин 3—4 марта такрорланади.

Жўжалар катта қушдан қўрқиб уйларига қочиб кетаётганларида болалар арқончага урилиб кетмасликлари учун тарбиячи уни кўтариб туради. Орадан бирмунча вақт ўтгандан сўнг, болаларнинг ўзлари ҳам товуқ ролини ўйнашлари мумкин.
«МАЙМУНЧАЛАР»

Тарбиячи болаларга биттадан ёки иккитадан гимнастика нарвончасига яқинлашишни таклиф қилади. Булар маймун­ча­лардир. Бошға болалар маймунчаларнинг дарахтлардан қандай қилиб мева теришаётганини ўтириб ёки тик туриб томоша қиладилар. Сўнгра дарахтга бошқа маймунчалар чиқишади.

Болалар нарвончага қўрқмасдан чиқиб-тушишни ўрганиб олганларидан кейин топшириқни мураккаблаш­тириш керак. Бунинг учун гимнастика нарвончасининг бир қисмидан иккинчи қисмига, яъни дарахтдан-дарахтга ўтиш таклиф қилинади.