Microsoft Word kr dunyoning ishlari ziyouz com doc

www.ziyouz.com кутубхонаси 
31
тасаддуқлар, ғаламис дегани ўша замонлардаям бор экан-да! Ўртага ғаламис аралашиб икки 
юртнинг орасини бузибди. У юртнинг ичиқора одамлари ўз подшосини йўлдан урибди. «Бу 
юртда шунақанги яйловлар борки от миниб уч кун чоптирсангиз у бошидан бу бошига 
етолмайсиз», дебди. «Босиб олсангиз хазинангиз олтинга тўлади», дебди. Бу юртнинг ичиқора 
одамлариям ўз подшосини кўнглига ғулғула солибди. «У юртда шунақанги боғ-роғлар борки, 
жаннатга ўхшайди», дебди. «Босиб олсангиз хазинангиз олтинга тўлади», дебди. 
Eрмон бува носини тупуриб бирдан Тойга кўзи тушиб қолади. 
— Ия, қоравой, сизниям бурнингиз оқиб кетди-ю, артиб олинг, тасаддуқ! 
— Қўяверинг, бува! — дейди жўрабошимиз билағонлик қилиб. — Артгани билан фойдаси йўқ. 
Буники қайнаб чиқаверади. 
Той жаҳл билан «шилқ» этиб бурнини тортади. Зум ўтмай яна оқиб кетганига парво қилмайди. 
Эрмон бува бўлса берилиб ҳикоя қилади. 
— Шундоқ қилиб, у юртнинг подшоси ҳам, бу юртнинг подшоси ҳам лашкар тўплашга 
киришибди. Тағин қанақа лашкар денг! Ҳар биттаси менинг Олтмишвойимга ўхшаган норғил 
йигитлар эмиш. Йигитларнинг мўйсафид оталари, кекса оналари ғамбода бўлиб қолишибди. 
Урушдан кимга фойда-ю, кимга зиён, дейишибди. Уруш қилиб хазинасини бойитадиган 
подшолару боламизни ажалнинг оғзига юборадиган бизми, дейишибди. Аммо камбағалнинг 
додини ким эшитарди, тасаддуқлар! У юртнинг лашкари бу юртникига от сурибди. Бу юртнинг 
лашкари у юрт устига бостириб борибди. Шундоқ қилиб десангиз, қирғинбарот бошланибди. 
Не-не ойдек қизлар оёқости бўпти, бешикдаги болалар онасидан, оналар боласидан 
айрилибди. Попукдай қизлар, нозаниндай жувонлар, норасида болалар Худога нола 
қилишибди. «Подшолар бир-бирининг юртини босиб оламан деса бизда нима гуноҳ», дейи-
шибди. «Нимага бизни онамиздан жудо қиласан, акамиздан айирасан?» дейишибди. Лекин 
уларнинг ноласи Худога етиб бормабди. 
Eрмон бува жимиб қолади. Хазинасини олтинга тўлдираман деб уруш очган у юртнинг 
подшосини ҳам, бу юртнинг подшосини ҳам ёмон кўриб кетаман. Оналарни боласидан, 
болаларни онасидан жудо қилган у юртнинг ғаламис одамларини ҳам, бу юртнинг ғаламис 
одамларини ҳам йўқ қилиб ташлагим келади. 
— Ия, қоравой, иштонни кўтаринг, иштонни, — дейди у кулимсираб. — Булбулингиз кўриниб 
кетди-ку, тасаддуқ. 
Шоша-пиша иштонни кўтараман. 
— Баракалла, тасаддуқ! — дейди Эрмон бува жилмайиб. — Умрингиздан барака топинг... 
Шундоқ қилиб, қирқ йил қирғин бўлибди. У юрт ҳам, бу юрт ҳам вайронага айланибди. Ё 
тавбангдан кетай, тасаддуқлар, не-не дарёлар қуриб, не-не боғлар култепага айланибди. 
Борингки, йилт этган битта гиёҳ қолмабди. Тиккайган битта дарахт қолмабди. Жамики 
паррандалару даррандаларга қирон кепти. Охири дарахтлару ўт-ўланлар, дарёлару қушлар 
Худога нола қипти: «Урушни қиладиган-ку одамлар, бизда нима гуноҳ», дебди. «Сен бизни 
одамлар учун яратган эдинг-ку, нимага одамзод бизга қирон келтиради», дебди. «Одамзоднинг 
феъли шунақа ёмон бўлса биз нима қилайлик», деб йиғлашибди. Ана ўшанда Оллойи-
таолонинг қаттиқ қаҳри кепти. У юртни ҳам, бу юртни ҳам чўл-биёбонга айлантириб ташлабди. 
У юртда ҳам, бу юртда ҳам, биронта қимирлаган жон, на битта дарахт, на битта ўт-ўлан, на 
бир томчи сув— ҳеч нима қолмабди. Ўшандан буён офтоб ҳам шу юртларни четлаб ўтармиш. 
Шамол яқинига бормасмиш. Қуш учмасмиш. У юрт ҳам, бу юрт ҳам зимистонга айланиб қолган 
эмиш. 
Eрмон бува носини тупуриб чуқур хўрсинади. «Ана шунақа гаплар», дегандек маънодор бош 
чайқаб қўяди. 
— Мана, тасаддуқлар, пашист деганиям жазосини олди-ку. Мени Олтмишвойим ҳам пашистни 
жазосини бераман деб қилич ўйнатиб юрибди-да. Бўлмаса Азоб денгизда сузиш осонми! — У 
менга қараб кўзини қисиб қўяди. — Олтмиш акангизни-чи қиличи бор. Алпомишникига ўхшаб 

---

Дунёнинг ишлари (қисса). Ўткир Ҳошимов