Microsoft Word kr dunyoning ishlari ziyouz com doc

www.ziyouz.com кутубхонаси 
51
Атрофдаги ҳангоматалаб томошабинлар хахолаб кулишди. Ойим мулзам бўлиб секин бурилди. 
— Сўраб-сўраб Маккани топган экан, амаллаб топиб олармиз. 
Икковлашиб яна ўша захкаш, икки четида қоп-қора сув жилға бўлиб оқаётган кўчага кирдик. 
Оёқда зўрға турсам ҳам, дам олайлик деб ойимга хархаша қилишга қўрқар эдим. Бояги 
одамнинг гапи ойимни хафа қилганини билиб турардим. Юриб-юриб яна ўша омонат 
панжарали ёғоч кўприкдан ўтдик. 
Ойим рўпарадан келаётган, сумка кўтарган хотинни тўхтатди. 
— Жон синглим, бир нарса сўрасам майлими? Шу ерликка ўхшайсиз. — Ойим унинг қўлидаги 
сумкасига, байрам бўлсаям ясанмасдан эскироқ қарғашойи кўйлак кийганига қараб, шу ерлик 
деб гумон қилган бўлса эҳтимол. 
Хотин шошилиб турган экан шекилли, «гапингизни айтинг» дегандек қошини чимирди. 
— Башоратхонни танимайсизми? — деди ойим шоша-пиша. — Эри пераводний. Ашхободда... 
— Нимага эди? — деди аёл ойимнинг гапини бўлиб. 
Ойим унинг кўзига тикилиб қаради-да, кўнглида умид уйғонди шекилли, овози дадиллашди: 
— Керак эди-да. Эрталабдан бери қидирамиз, айланай. Билмаган жойнинг кўчаси кўп, деб 
шуни айтар эканда. 
Аёл ойимга тикилиб туриб негадир овози титраб кетди. 
— Сиз... Сиз кими бўласиз? — деди секин. 
— Онасиман, айланай, онасиман! 
Аёлнинг қўлидан сумкаси тушиб кетди. 
— Ойижон! — деди илтижоли оҳангда. — Ойижон! Ўзингизмисиз? — Шундай дедию ойимни 
қучоқлаб олди. Ўша заҳоти кўзидан тирқираб ёш чиқиб кет-ди.— Ўша мен... Менман... 
Қизингизман... Ойижон... Билувдим, топиб келишингизни билувдим. Билувдиму ишонмовдим. 
Аммам айтсалар, ишонмагандим! 
У ҳадеб ойимни ўпар, нуқул битта гапни қайтарарди. 
— Ишонмовдим... 
Кейинги дақиқада мени ердан даст кўтариб олди-да, кўзимдан, юзимдан ўпа бошлади. 
— Ўзимнинг укамдан ўргилай, укажонимдан айланай. 
Димоғимга бинафша ҳиди урилди. У бақувват қўллари билан мени маҳкам қучоқлаб олган, 
ёшли кўзлари билан қайта-қайта кўзимга термилиб қарар, нуқул ўпар эди. Шундагина унинг 
катта хотин эмас, ёшгина эканлигини, аллақаери уйдаги опамга ўхшаб кетишини пайқадим. 
Башор опа бир қўлида мени кўтарганча эгилиб, иккинчи қўли билан сумкасини ердан олди. 
— Қўйинг, — деди ойим унинг билагидан тутиб. — Ёш боламас, ўзи юради. Шу кузда мактабга 
боради-ку. 
— Нега қўярканман?! — Башорат опам бинафша ҳиди анқиб турган бошини яна юзимга босди. 
— Укажонимни нега қўярканман?! Ўзим зўрға топиб олдим-ку! 
Кап-катта бола опамнинг қўлида кетаётганимдан, ботинкам кўйлагини лой қилиб юборганидан 
уялиб типирчиладим. 
— Тушаман! 
Йўқ, опам қаттиқроқ бағрига босди. 
— Тушмайсан. Чарчаб қопсан, укам. Кўриб турибман. 
Башорат опам шахдам-шахдам қадам ташлар, ойим унга аранг етиб борар, икковлари 
ҳаяжондан энтикиб, гаплашиб боришарди. 
— Танимай қолганимни қаранг, қизим. Ўзиям сизни бир марта кўрувдим-да... Анча бўп кетди. 
Ўшанда жамалаксоч қизча эдингиз. 
— Мен ҳам аввалига танимадим... Қаранг, ойижон, сира ишонмовдим. 
Опамнинг уйи чиндан ҳам кўприк яқинида экан. Бироқ, яна битта тор кўчага кириш эсимиздан 
чиқибди. Ўша тор кўчадан ўтиб, кафтдеккина ҳовлига кириб қолдик. Ҳовли ўртасида бир туп 
тут бор эди. Тут ҳали пишмаган, аммо анча оқариб қолган, шохига беланчак илиб қўйилибди. 

---

Дунёнинг ишлари (қисса). Ўткир Ҳошимов