Microsoft Word qalbimizning nuri ziyouz com doc

 
USMON IBN AFFONNING O‘GITLARI 
Badr ibn Usmon, roziyallohu anhu, amakilaridan rivoyat qiladi: 
“Usmon ibn Affon, roziyallohu anhu, xalifa etib saylangach, masjidga chiqdi. Nihoyatda xafahol va 
yuzlari so‘lg’in edi. Rasulullohning, sollallohu alayhi va sallam, minbarlariga chiqib, Allohga hamd, 
Payg‘ambarimizga salovot aytgach, shunday dedi: 
— Siz o‘tkinchi bir hayot uyidasiz va umringizning qolgan qismi ham o‘tishini kutmoqdasiz. Shu 
holda hanuz o‘lim kelmay turib, ishlarning eng afzalini qilib olishga shoshiling. Bir qarabsizki, 
kutilmagan bir soatda ushlanib qolasiz. Unutmangki, bu dunyo yolg‘on va aldov ustiga bino bo‘lgan. 
“Bas, sizlarni dunyo hayoti sira aldab qo‘ymasin va sizlarni aldamchi (shayton) Alloh 
(kechiraveradi, degan aldov) bilan aldab qo‘ymasin” (Luqmon, 33, mazmuni). 
Sizdan avval o‘tgan kimsalarning holidan ibrat oling. So‘ng sa’y-harakat qiling va g’aflatda 
qolmang. Zero, siz g’aflatga tushib qolsangiz hamki, ishlaringizni hisob-kitob qilishda sira g’aflatga 
tushilmaydi. Dunyoda ekinlar ekib-o‘rgan, baland koshonalar qurgan va uzoq vaqt zavqu safo surgan 
dunyoning o‘g’illari, birodarlari bugun qaerda? Dunyo ularni yutib yubormadimi? Jalil Alloh dunyoga 
naqadar ahamiyat bermaganidek, siz ham shunday unga berilmang. Oxirat uchun harakat qiling. 
Alloh subqanahu va taolo dunyo hayoti haqida shunday tamsil qilgan: “(Ey Muhammad, odamlarga) 
dunyo hayoti misolini keltiring. (U) xuddi suv kabidirki, Biz uni osmondan yog’dirgach, 
(bahorda) u sababli yer o‘simliklari (bir-biriga) aralashib (qalinlashib) ketur, so‘ngra (kuzda) 
shamollar uchirib ketadigan xashakka aylanib qolur”. 
 
ABDULLOH IBN MAS’UDNING O‘GITLARI 
«Ham dunyo, ham oxirat uchun harakat qilmagan odamni xushlamayman. 
Orangizda tonggacha losh (o‘lik) kabi o‘rnidan qimirlamay yotadigan va tong otgach esa, olov 
pashshasi kabi u yoqdan-bu yoqqa sakraydigan kimsani ko‘rmayin. 
Dunyoning musaffoligi ketgan, oqavasi qolgan. O‘lim musulmon uchun sovg’adir. 
Ko‘pchilik yoqtirmaydigan o‘lim va kambag’allik qanday ajoyib narsalardir. Allohga qasamki, boylik 
ham, faqirlik ham bir ne’matdir. Qaysisi bilan imtihon qilinsam ham, xotirjamdirman. Boy bo‘lgan 
kezlar muhtojlarga yordam qilish, faqirlikda esa sabr etish fazilati bor. 
Banda imon cho‘qqisiga chiqmagunicha, uning haqiqatiga yetisholmaydi. Musulmon kambag’allikni 
boylikdan, pasayishni yuksalishdan afzal ko‘rmagunicha va uni maqtagan va yomonlagan kishilarni bir 
xilda ko‘rmagunicha imon cho‘qqisiga chiqa olmaydi. 
O‘zidan boshqa iloh bo‘lmagan Allohga qasamki, musulmon holda tong ottirib, kechqurun shu 
holda uyquga ketgan bandaga dunyoning musibatlari zarar bermaydi. 
Barchangiz mehmonsiz, qo‘lingizdagi dunyo moli esa omonatdir. Mehmon albatta bir kuni ketadi 
va omonat egasiga beriladi.
Haq og’irdir, biroq tomoqdan oson o‘tadi. Botil yengilgina, ammo kasallik keltirib chiqaradi. Necha-
necha insoniy orzu-istaklar borki, ularga ergashilsa, uzoq vaqt davom etguvchi xafagarchilik bilan 
nihoya topadi».