Milliy manaviy yangilanish,yuksalish,taraqqiyot omili

7-Mavzu: Milliy ma’naviyat rivojlanish konsepsiyasi: nazariya va amaliyot.

1. Milliy ma’naviyat rivojlanish konsepsiyasining yaratilishi.

   
   

2. Ma’naviyat va milliy g’oya.

   
   

3. Milliy ma’naviyat rivojlanish konsepsiyasini xam nazariy, xam amaliy jihatdan boyitishning yangi bosqichi.

   
   

1. Milliy ma’naviyat rivojlanish konsepsiyasining yaratilishi. Har qanday islohot, jumladan, ma’naviyat sohasidagi islohotlar ham ilmiy-konseptual, nazariy va metodolo­gik yondashuvlar, tahlil va umumlashtirishlar qatorida katta mablag’ talab etadi. Chunki eski madaniyat, mafkura bilan bog’liq muassasalarning bir qismidan voz kechiladi, qolganlari qaytadan, yangi mafkuraviy va huquqiy asoslarda qayta tashkil qilinadi. Eng asosiysi - yangi voqelikka, yangi maqsadlarga, ideallarga, mafkuraga mos yangi muassasalar tizimi yaratiladi. Kadrlar tayyorlash tizimi ham mazmunan va tashkiliy jihatdan qayta ko’rib chiqiladi, qayta tashkil etiladi. Bular milliardlab so’m mablag’ni talab qiladi.
Adabiyot, san’at, tarix, falsafa, madaniyat tarixiga oid asarlar madaniy merosning avval xalqdan yashirilgan qismini tiklash, xalqqa yangi oliy maqsad va ideallarni, milliy g’oya va mafkurani etkazadigan nashrlarni, radio va teledasturlarni yaratish, chop etish, efirga uzatish yana milliardlab so’m mablag’ ajratilishini talab etadi. Agar etarlicha mablag’ ajratilmasa, e’lon qilingan oliy maqsadlar, g’oyalar qog’ozda qolib ketadi, amalga oshmaydi. Natijada, g’oyaning obro’yiga putur etadi, odamlar uni quruq shior, safsatabozlik sifatida qabul qila boshlaydi va davlatning bu boradagi siyosatiga ishonmay qo’yadi. SHu sababdan ma’naviyat rivojlanishi konsepsiyasining iqtisodiy jihatdan ta’minlanishi muhim masala edi.
Mustaqillikning dastlabki yillarida mablag’ etishmas, iqtisodiy ahvol ancha og’ir edi. Ammo ijtimoiy soha-ta’lim, sog’liqni saqlash, madaniyat va sport o’z holiga tashlab qo’yilmadi. Ma’naviyat yuksalishining iqtisodiy jihati qanchalik muhim bo’lmasin, konsepsiyani yaratishda sezilarli rol o’ynamaydi. Konsepsiya xalqning mentalitetini, asriy orzu-havaslarini, oliy ideallari va maqsadlarini hisobga olib shakllantirilishi lozim, u ma’naviyatimiz yuksalishi uchun ilmiy-intellektual asos, metodologik yo’riqnoma, yo’lchi yulduz bo’lishi kerak. Binobarin, konsepsiyaning tizim yaratuvchi bosh g’oyasi - milliy g’oya va milliy mafkurani ifodalashi zarur.
Ma’naviyatni rivojlantirish konsepsiyasi tub islohotlar nazariyasi doirasida milliy tiklanish va yosh avlodni mustaqillik g’oyalariga sodiqlik ruhida tarbiyalash zaruriyati va amaliyoti bilan chambarchasligida yaratildi. Chunki jamiyatning haqiqiy boyligi insondir, pirovard maqsadi esa munosib, farovon turmush kechiradigan komil insondir. Tarbiya borasida bu - sog’lom avlodni tarbiyalash zarurligini anglatadi. Shu sababdan sog’lom avlod uchun kurash, jismonan sog’lom, ma’nan etuk avlodni tarbiyalash islohotlar nazariyasining asosiy yo’nalishlaridan biriga aylandi. O’zbekistonning birinchi ordeni ham «Sog’lom avlod uchun» deb ataldi.
Mamlakat, millat kelajagi sog’lom avlodga, barkamol avlodga bog’liq. Keyinchalik mamlakatimizda ko’proq bar­kamol avlod tushunchasi qo’llanila boshladi. Chunki Kadrlar tayyorlash milliy dasturiga va ma’naviy-ma’rifiy masalalarga bag’ishlangan chiqishlarida, asarlarida bi­rinchi Prezidentimiz Islom Karimov barkamol avlod tushunchasini asosiy tayanch tushuncha sifatida qo’llagan edi. Barkamol avlod tushunchasi ilmiy-ma’rifiy, madaniy merosimizda qabul qilingan «komil inson» tushunchasiga yaqin, uni alohida shaxsga nisbatan qo’llanish shakli edi. Yosh avlod tarbiyasiga ustuvor e’tibor berish, birinchidan, islohotlar nazariyasidan, ikkinchidan esa mamlakatning, millatning ertangi kelajagi to’g’risida qayg’urishdan kelib chiqadi. Ushbu nazariya asoslari yaratilishiga bag’ishlangan dastlabki asarlardan biri «O’zbekistonning o’z istiqlol va taraqqiyot yo’li» risolasidayoq e’tirof etiladi: O’zbekistonni yangilash va rivojlantirish- ning o’z yo’li to’rtta asosiy negizga asoslanadi.
Milliy maktabimizdagi ta’lim-tarbiya nafaqat o’sha to’rt negizga tayanadi, shuningdek, ular yosh avlodning e’tiqodiga va amaliy intilishlariga aylanishi lozim. Asarda bu tushunchalarning hamda ma’naviyat tushunchasining mazmuni talqin qilinadi, xalqning ma’naviy ruhini mustaqkamlash, milliy madaniyatning o’ziga xosligi, ta’lim, ilm-fandagi milliy an’analarni tiklash va zamon talablarida rivojlantirish islohotlar uchun, mustaqil taraqqiyot va kelajak uchun qanday ahamiyatga ega ekanligi ochib beriladi.
Kommunistik mafkuraning uzoq yillar davomida shakllangan andozalari, aqidaviy g’oyalari, shiorlari, «dohiylar» asarlari va kompartiya hujjatlari, ko’rsatmalari kabi «ilk manbalari» bor edi. Milliy istiqlol g’oyasi va mafkurasining esa xalqimiz madaniy merosidagi va ma’naviyatidagi, zamonaviy hayotidagi manbala­ri, asosiy tushunchalari va tamoyillari aniqlanishi, bir so’z bilan aytganda, ilmiy metodologik, didaktik asoslari va konsepsiyasi yaratilishi kerak edi. Davra suhbatlarida, ilmiy munozaralarda, ko’plab chop etilayotgan maqolalarda jo’yali fikrlar, qiziq mulohazalar bi­lan bir qatorda, ba’zi bir o’ta jo’n yoki ilmiy jihatdan asossiz, balandparvoz gaplar ham ancha-muncha aytildi. Ayrim qiziqqon olimlar hatto milliy g’oya va mafkuraga rasmiy davlat maqomi berish kerak, degan fikrlarni bildira boshladilar. Ba’zi birlari bizning tarixiy va madaniy ildizlarimiz chuqur, ma’naviyat sohasida G’arbdan o’rganishning zarurati yo’q, G’arb mamlakatlari ma’naviyati inqirozni boshdan kechirmoqda, unda degu­manizatsiya jarayoni boshlanganiga ancha bo’lgan, biz ma’­naviyat sohasida faqat o’z kuchimizga tayanishimiz kerak, qabilidagi milliy mahdudlikka moyil mulohazalar yuritdilar.
Sovet mafkurasidan, sotsializmning ba’zi bir salbiy merosidan, soxta qadriyatlaridan qutilish, tozalanish bahonasida, ayrim haqiqiy qadriyatlar yo’qotila boshladi, rus tilini va madaniyatini inkor qilish kuchaydi. Hatto Rossiyaning o’zida bunday siyosiy va madaniy-ekstremistik qarashlar ancha tarqaldi. Masalan, butun dunyo tan olgan buyuk yozuvchi Maksim Gorkiyga Moskvada qo’yilgan haykal demon­taj qilindi. Haykal faqat 2017 yil avgustda o’z joyiga qaytarildi. Ayrim davlatlarda siyosiy va madaniy eks­tremizm oqibatida o’ta o’ng radikal kuchlar, xususan, neofashistlar paydo bo’lishiga olib keldi.
O’ngga yoki so’lga, radikalizmga yoki konservatizmga, milliy maxdudlikka og’ib ketmaslik, milliy tiklanishning fikrlar va qarashlar xilma-xilligiga asoslangan barqaror ijtimoiy-madaniy taraqqiyot yo’liga tushib olishi uchun ma’naviyatni rivojlantirish yo’llarini puxta belgilab oLysh kerak edi. O’zbekistonda ham dunyoviy va diniy radikalizm shaklidagi siyosiy va madaniy ekstremizmni qo’llab-quvvatlovchilar bor edi.