Oʻzbekiston respublikasining soliq kodeksi (Yangi tahriri) Oʻzbekiston Respublikasining

375-modda. Mulkiy daromadlar 
Mulkiy daromadlar tarkibiga quyidagilar kiradi: 
1) foizlar; 
2) dividendlar; 
3) mol-mulkni ijaraga berishdan olingan daromadlar; 
4) soliq toʻlovchiga mulk huquqi asosida tegishli boʻlgan mol-mulkni realizatsiya qilishdan 
olingan daromadlar. Mol-mulkni realizatsiya qilishdan olingan daromadlar mazkur mol-mulkni 
realizatsiya qilish summasining hujjatlar bilan tasdiqlangan uni olish qiymatidan oshgan qismi 
sifatida aniqlanadi. Mazkur qiymatni tasdiqlovchi hujjatlar mavjud boʻlmagan taqdirda, mol-
mulkni realizatsiya qilish qiymati, koʻchmas mulk boʻyicha esa - kadastr qiymati hamda 
realizatsiya qilish narxi oʻrtasidagi ijobiy farq daromad deb eʼtirof etiladi; 
5) sanoat mulki obyektlariga, seleksiya yutugʻiga oid patent (litsenziya) egasi boʻlgan soliq 
toʻlovchining patentdan boshqa shaxs foydasiga voz kechganda yoki litsenziya shartnomasi 
tuzganda olgan daromadi; 
6) royalti; 
7) ishonchli boshqaruvga berilgan mol-mulk boʻyicha ishonchli boshqaruvchidan olingan 
daromad; 
8) ushbu Kodeksning 324-moddasida nazarda tutilgan tartibda aniqlanadigan REPO 
operatsiyalari boʻyicha daromad; 
9) ushbu Kodeksning 327-329-moddalarida nazarda tutilgan tartibda aniqlanadigan, 
qimmatli qogʻozlar va (yoki) muddatli bitimlarning hosila moliyaviy vositalari bilan operatsiyalar 
boʻyicha daromad; 
10) ushbu Kodeksning VII boʻlimida belgilangan hollarda va tartibda nazorat qilinadigan 
chet el kompaniyasining foyda tarzidagi daromadi; 
11) ushbu Kodeksning 319-moddasiga muvofiq aniqlanadigan, oddiy shirkat shartnomasiga 
(birgalikdagi faoliyat toʻgʻrisidagi shartnomaga) muvofiq ishtirok etishdan olingan daromadlar; 
12) ushbu moddaning 1-11-bandlarida koʻrsatilmagan mulkiy xususiyatga ega boshqa 
daromadlar. 
376-modda. Moddiy naf tarzidagi daromadlar 

---

(1-q.)
Soliq toʻlovchi tomonidan moddiy naf tarzida olingan daromadlar, agar ushbu Kodeks 
369-moddasining ikkinchi qismida boshqacha qoida nazarda tutilmagan boʻlsa, quyidagilardan 
iborat: 
1) soliq agenti tomonidan soliq toʻlovchi manfaatlarini koʻzlab, tovarlar (xizmatlar), mulkiy 
huquqlar haqini toʻlash, shu jumladan: 
soliq toʻlovchining bolalarini maktabgacha taʼlim tashkilotlarida oʻqitish, tarbiyalash haqini 
toʻlash; 
(OʻzR 03.12.2020-y. OʻRQ-653-son Qonuni tahriridagi xatboshi) (Oldingi tahririga 
qarang) 
soliq toʻlovchilarga berilgan uy-joyning kommunal xizmatlar haqini, uy-joydan foydalanish 
xarajatlarini, yotoqxonadagi joylar haqini yoki ularning oʻrnini qoplash qiymatini toʻlash; 
sanatoriy-kurortlarda davolanish yoʻllanmalari qiymatini, dam olish, statsionar va ambulator 
davolanish haqini yoki ularning oʻrnini qoplash qiymatini toʻlash; 
soliq agentining soliq toʻlovchi daromadi boʻlgan boshqa xarajatlarini toʻlash; 
2) soliq toʻlovchining manfaatlarini koʻzlab tekin, shu jumladan hadya shartnomasi boʻyicha 
berilgan mol-mulkning va koʻrsatilgan xizmatlarning qiymati; 
3) tovarlarni (xizmatlarni) soliq toʻlovchilarga realizatsiya qilish narxi hamda shu 
tovarlarning (xizmatlarning) ushbu moddaning ikkinchi va uchinchi qismlariga muvofiq hisoblab 
chiqarilgan qiymati oʻrtasidagi salbiy farq; 
4) qonunchilikka muvofiq xodimlarga temir yoʻl, aviatsiya, daryo, avtomobil transporti va 
shahar elektr transportida yurish boʻyicha beriladigan imtiyozlar summasi; 
(OʻzR 21.04.2021-y. 
OʻRQ-683-son Qonuni tahriridagi band) 
5) jismoniy shaxsning soliq agenti oldidagi qarzining yuridik shaxs qarori bilan hisobdan 
chiqarilgan summalari; 
6) soliq agenti tomonidan toʻlovlar hisobiga toʻlanib, soliq toʻlovchidan ushlab qolinishi 
lozim boʻlgan, lekin ushlab qolinmagan summalar. 
(2-q.)
Soliq toʻlovchi tomonidan soliq agentidan tovarlar (xizmatlar) olingan taqdirda, ushbu 
tovarlarning (xizmatlarning) qiymati ularni sotib olish narxidan yoki tannarxidan kelib chiqqan 
holda aniqlanadi. 
(3-q.)
Soliq toʻlovchi tomonidan soliq agentidan aksiz toʻlanadigan tovarlar yoki qoʻshilgan 
qiymat soligʻi solinadigan tovarlar (xizmatlar) olingan taqdirda, bunday tovarlarning 
(xizmatlarning) qiymatida aksiz soligʻining va qoʻshilgan qiymat soligʻining tegishli summasi 
hisobga olinadi.