Oʻzbekiston respublikasining soliq kodeksi (Yangi tahriri) Oʻzbekiston Respublikasining

448-modda. Soliq toʻlash tartibi 
(1-q.)
Soliq davri mobaynida soliq toʻlovchilar soliq boʻyicha boʻnak toʻlovlarini toʻlaydi, 
bundan qishloq xoʻjaligi korxonalari, Oʻzbekiston Respublikasida faoliyatini doimiy muassasalar 
orqali amalga oshirayotgan Oʻzbekiston Respublikasining norezidentlari boʻlgan yuridik shaxslar, 
shuningdek dehqon xoʻjaliklari va qishloq xoʻjaligi yerlariga hamda tadbirkorlik faoliyati va 
(yoki) daromad olish uchun moʻljallangan, yashash uchun moʻljallanmagan koʻchmas mulk 
obyektlariga ega boʻlgan jismoniy shaxslar mustasno. 
(OʻzR 30.12.2022-y. OʻRQ-812-son Qonuni tahriridagi qism) (Oldingi tahririga qarang) 
(2-q.)
Boʻnak toʻlovlar miqdorini hisoblab chiqarish uchun soliq toʻlovchilar joriy soliq 
davrining 20-yanvaridan kechiktirmay, yangi tashkil etilganlari esa davlat roʻyxatidan oʻtkazilgan 
kundan eʼtiboran oʻttiz kundan kechiktirmay, suvdan foydalanish yoki suvni isteʼmol qilish 
joyidagi soliq organlariga moʻljallanayotgan soliq bazasidan (foydalaniladigan suv hajmidan) va 
belgilangan soliq stavkalaridan kelib chiqqan holda hisoblangan joriy soliq davri uchun soliq 

---

summasi toʻgʻrisidagi maʼlumotnomani taqdim etadi. Soliq boʻyicha majburiyatlari soliq davri 
ichida yuzaga kelgan soliq toʻlovchilar soliq summasi toʻgʻrisidagi maʼlumotnomani soliq 
majburiyati yuzaga kelgan sanadan eʼtiboran oʻttiz kundan kechiktirmay taqdim etadi. 
(OʻzR 
30.12.2022-y. OʻRQ-812-son Qonuni tahriridagi qism) 
(3-q.)
Ushbu moddaning ikkinchi qismiga muvofiq hisoblab chiqarilgan boʻnak toʻlovlar: 
soliq davrida soliq summasi bazaviy hisoblash miqdorining ikki yuz baravaridan koʻproqni 
tashkil etadigan yuridik shaxslar tomonidan (bundan aylanmadan olinadigan soliqni toʻlovchilar 
mustasno) - har oyning 20 sanasidan kechiktirmay yillik soliq summasining oʻn ikkidan bir qismi 
miqdorida; 
soliq davrida soliq summasi bazaviy hisoblash miqdorining ikki yuz baravaridan kamroqni 
tashkil etadigan, aylanmadan olinadigan soliqni toʻlovchilar boʻlmagan yuridik shaxslar, 
shuningdek aylanmadan olinadigan soliqni toʻlovchilar va yakka tartibdagi tadbirkorlar tomonidan 
- har chorak uchinchi oyining 20 sanasidan kechiktirmay yillik soliq summasining toʻrtdan bir 
qismi miqdorida toʻlanadi. 
(4-q.)
Soliq davri davomida moʻljallanayotgan soliq bazasi oʻzgarganda, soliq toʻlovchi 
soliq summasi toʻgʻrisida aniqlashtirilgan maʼlumotnoma taqdim etishga haqli. Bunda soliq 
davrining qolgan qismi uchun boʻnak toʻlovlarga soliqning oʻzgargan summasiga teng ulushlarda 
tuzatish kiritiladi. 
(5-q.)
Soliq davri uchun boʻnak toʻlovlar hisobga olingan holda soliqni toʻlash soliq 
toʻlovchilar tomonidan, bundan dehqon xoʻjaliklari mustasno, suvdan foydalanish yoki suv 
isteʼmoli joyida, soliq hisoboti taqdim etiladigan muddatdan kechiktirmay amalga oshiriladi. 
(6-q.)
Soliq davri uchun boʻnak toʻlovlar summasi soliq hisobotida koʻrsatilgan budjetga 
toʻlanishi lozim boʻlgan soliq summasiga nisbatan 10 foizdan ortiq miqdorga kamaytirilgan 
taqdirda, soliq organi boʻnak toʻlovlarni soliqning haqiqiy summasidan kelib chiqib, penya 
hisoblagan holda qaytadan hisob-kitob qiladi. 
OʻzR 30.12.2022-y. OʻRQ-812-son Qonuniga muvofiq yettinchi qismi yettinchi va 
sakkizinchi qismlar bilan almashtirilgan (Oldingi tahririga qarang) 
(7-q.)
Qishloq xoʻjaligi korxonalari tomonidan soliq davri uchun soliqni toʻlash quyidagi 
tartibda amalga oshiriladi: 
1-oktyabrga qadar - soliq organlari tomonidan aniqlangan yillik soliq summasining 70 foizi; 
15-dekabrga qadar - soliqning qolgan summasi. 
(8-q.)
Dehqon xoʻjaliklari, shuningdek qishloq xoʻjaligi yerlariga hamda tadbirkorlik 
faoliyati va (yoki) daromad olish uchun moʻljallangan, yashash uchun moʻljallanmagan koʻchmas 
mulk obyektlariga ega boʻlgan jismoniy shaxslar tomonidan soliqni toʻlash yilda bir marta, soliq 
davridan keyingi yilning 1-mayidan kechiktirmay amalga oshiriladi.