P. Berdanova, P. Abdalieva, Sh. Oteniyazova Didaktika

Didaktika – bul pedagogikalıq pán bolıp, ol oqıtıwdıń teoriyalıq táreplerin úyrenedi. Hár bir oqıtıwshı didaktika tiykarların biliwi zárúr.
Didaktikanıń predmetin anıqlaw boyınsha túrli kózqaraslar bar.
Kópshilik alımlar oqıtıw ob'ekti dep oqıtıw procesiniń maqseti, mazmunı, nızamlılıqları, metodları hám principlerin kórsetedi.
Didaktika oqıtıwdı jámiyetlik tájiriybeni beriw quralı sıpatında túsindiredi. Oqıtıw procesinde jaslardı turmısqa tayarlaw ámelge asırıladı. Oqıtıw xızmetin shólkemlestiriwde oqıtıwshı - oqıwshı, oqıwshı – oqıw materialı, oqıwshı - basqa oqıwshılar ortasındaǵi qatnasıqlar payda boladı.
Ulıwma didaktikanıń predmeti sabaq ótiw (oqıtıwshı xızmeti) hám bilim alıw (oqıwshınıń úyreniw xızmeti)niń óz ara baylanıslılǵı esaplanadı.
Didaktikanıń wazıypaları tómendegilerden ibarat:

• 
  oqıtıw processleri hám olardı ámelge asırıw shártlerin táriyiplew hám túsindiriw;
  
• 
  oqıtıw procesin jáne de bekkemirek shólkemlestiriw, yaǵnıy, oqıtw sistemaları hám texnologiyaların islep shıǵıw;
  
• 
  oqıtıw procesi ushın tán bolǵan ulıwma nızamlılıqların anıqlaw, faktorların talqılaw.
  

Didaktika teoriyalıq hám bir waqıttıń ózinde ámeliy pán. Didaktikanıń ilimiyteoriyalıq wazıypası oqıtıwdıń processlerin úyreniw, onıń túrli tárepleri ortasındaǵı baylanıslardı, olardıń mazmunın ashıp beriw, rawajlanıw tendenciyaları hám keleshegin anıqlawdan ibarat.
Didaktikanıń túsinikler sisteması hám tiykarǵı kategoriyaları. Belgili pánge tiyisli bolǵan túsiniklerdi insaniyat tárepinen jámiyetlik rawajlanıw procesinde kóplegen bilimler sáwlelenedi. Bunday ilimiy túsinikler eki tiykarǵı toparǵa ajıratıladı:

1. 
   filosofiyalıq túsinikler;
   
2. 
   jeke ilimiy, yaǵnıy, belgili pánge tiyisli túsinikler.
   

Didaktika ushın “ulıwmalıq hám ayrıqsha”, “mazmun hám hádiyse”, “qarama-qarsılıq”, “baylanıslılıq” sıyaqlı basqa filosofiyalıq túsinikler de úlken áhmiyetke iye. Didaktikada qollanılatuǵın ulıwma pánge tiyisli túsinikler arasında “sistema”, “struktura”, “wazıypa”, “element” sıyaqlılar ayrıqsha orın tutadı. Pedagogikaǵa tán didaktikalıq túsiniklerge tómendegiler kiredi: “oqıtıw”, “sabaq beriw”, “bilim aliw”, “oqıtıw procesi”, “oqıw páni”, “oqıtıw mazmunı” hám basqalar.
Didaktikanıń tiykarǵı kategoriyaları tómendegilerden ibarat: sabaq ótiw, bilim alıw, oqıtıw, bilim, kónlikpe, uqıplılıq, oqıtıw maqseti, mazmunı, oqıtıw procesi, oqıtıw procesin shólkemlestiriw, oqıtıw túrleri, formaları, metodları hám quralları, oqıtıw nátiyjesi.