P. Berdanova, P. Abdalieva, Sh. Oteniyazova Didaktika

Zamanagóy sabaqlar tómendegi talaplarǵa juwap bere alıwı kerek:
ilimniń aǵla tabısları, pedagogikalıq texnalogiyalardan paydalanıw,
sabaqtı oqıw-tárbiyalıq process nızamları tiykarında shólkemlemtiriw; sabaqta barlıq didaktikalıq princip hám qaǵıydalardıń optimal qatnasıwın
támiyinlew; oqıwshılardıń qızıǵıwshılıqları, qábileti hám talapların esapqa alıw tiyka-
rında olar tárepinen bilimlerdiń puxta ózlestiriliwi ushın zárúr sharayatlardı jaratıw; oqıwshılar ańlay alatuǵın pánler aralıq baylanıslardı ornatıw; burın úyrenilgen bilim hám uqıplılıqlardıń sonday-aq oqıwshılardıń
rawajlanıw dárejesine súyeniw; shaxstıń hár tárepleme rawajlanıwın motivacyalaw hám jedellestiriw;
oqıw-tárbiyalıq xızmet hámme basqıshlarınıń logikalıǵı hám
emocionallıǵı; pedagogikalıq qurallardan nátiyjeli paydalanıw;
zárúr bilim, kónlikpe hám uqıplılıqlard, pikirlew hám xızmet racional
usılların qáliplestiriw; bar bilimlerdi bárqulla bayıtıp barıw zárúrligin payda etiw; hár bir sabaqtı puqta proektlew, jobalastırıw, diagnózlaw hám shamalaw.
Hár bir sabaq tómendegi úsh tiykarǵı maqsetke erisiwge baǵdarlanadı: oqıtıw, tárbiyalaw, rawajlandırıw. Áne usılardı esapqa alıp sabaqqa ulıwma talaplar didaktikalıq tárbiyalıq hám rawajlandırıwshı talaplarda anıq sáwlelenedi.
Didaktikalıq (yamasa tálim) talaplarǵa hár bir sabaqtıń oqıtıw wazıypaların anıq belgilew, sabaqtı xabarlar menen bayıtıw, social hám jeke zárúrliklerdi esapqa alıw menen mazmunın optimallastırıw, qabıl etiw eń jańa texnologiyalardı kirgiziw, hár qıylı formalı, metodlar hám kórinislerden ózine say túrde paydalanıw, sabaq dúzilisin qáliplestiriwge dóretiwshilik penen jantasıw, jámáátlik xzmet usılları menen birge oqıwshılardıń óz betinshe xızmetiniń hár qıylı formalarınan paydalanıw, operativ qayta baylanıstı támiyinlew, ámeliy qadaǵa-law hám basqarıwdı ámelge asırıw, ilimiy shama hám sabaqtı sheberlik penen ótkiziwdi támiyinlew sıyaqlılar kiredi.
Sabaqqa tárbiyalıq talaplar oqıw materialınıń tárbiyalıq múmkinshiliklerin anıqlaw, sabaqtaǵi xızmet, anıq erisiliwi múmkin bolǵan tárbiyalıq maqsetlerdi qáliplestiriw hám qoyıw, tek oqıw isleri maqsetleri hám mazmunınan tábiyǵıy ráwishte kelip shıǵatuǵın tárbiyalıq máselelerdi belgilew, oqıwshılardı ulıwma insanıylıq miyraslarǵa tárbiyalaw, turmıslıq áhmiyetke iye bolǵan sıpatlardı (tırısqaqlıq, tártiplilik, juwapkershilik, intizamlılıq, óz betinshelik, jumısqa qábiletlilik, itibarlılıq, hadallıq h.t.b.) qáliplestiriw, oqıwshılarǵa dıqqat itibarlı kózqarasta bolıp, pedagogikalıq ádep talaplarına ámel etiw, oqıwshılar menen birge islesiw hám olardıń tabıslarǵa erisiwinen mápdar bolıwdan ibarat.
Hámme sabaqlarda barlıq waqıtta ámelge asırılıp barılatuǵın rawajlandırıwshı talaplarǵa oqıwshılarda oqıw úyreniw xızmetiniń unamlı sıpatları, qızıǵıw, dóretiwshilik baslamashılıq hám jedellikti qáliplestiriw hámde rawajlandırıw, oqıwshılardıń qabıl etiw múmkinshilikleri dárejesin úyreniw, esapqa alıw, «rawajlanıwdıń jaqın zonasın proektlew», «ozıp ketiw» dárejesindegi oqıw shınıǵıwların shólkemlestiriw, rawajlanıwdıń jańa ózgerislerin xoshametlew, oqıwshılardıń intellektual, emocional, jámiyetlik rawajlanıwındaǵı «sekiriwlerdi» aldınnan kóre biliw, baslanıp atırǵan ózgerislerdi esapqa alıw tiykarında oqıw shınıǵıwların operativ qayta qurıw sıyaqlılar kiredi.