P. Berdanova, P. Abdalieva, Sh. Oteniyazova Didaktika

Kónlikpe hám uqıplılıqlardı islep shıǵıw hám bekkemlew sabaqları bilimlerdi bekkemlew sabaqları menen baylanıslı boladi. Bul process bir neshe arnawlı sabaqlar barısında ámelge asırıladı. Basqa sabaqlarda jańa temalardı úyretiw dawam ettiriledi. Sonıń menen birge dáslepki shınıǵıwdı orınlaw jumısları balalar tárepinen muǵállimniń járdeminde hám olar tapsırmanı qalay túsingenligi dáslep anıqlap tekseriw menen orınlansa, keyinirek qay jerde qanday qaǵıyda qollanılıwın oqıwshılardıń ózleri belgileydi. Olar hár qıylı jaǵdaylarda uqıp hám kónlikpelerin qollanıw sonıń ishinde turmıslıq ámeliyatta qollanıwdı ózlestirip alıwı kerek.
Ulıwmalastırılǵan sabaqlar (bilimlerdi ulıwmalastırıw hám sistemalastırıw) aldıńǵı ótilgen materiallardan eń áhmiyetli sorawlar qayta tákirarlanatuǵın hám sistemalastırılatuǵın, oqıwshılar bilimlerinde bar bolǵan kemshilikler tolıqtırılatuǵın hám úyrenilip atırǵan kurstıń áhmiyetli ideyaları ashıp beriletuǵın sabaqlar bolıp esaplanadı. Ulıwmalastırılıwshı sabaqlar tema, bólim hám oqıw kurslarınıń juwmaǵında ótkiziledi. Tákirarlaw hám ulıwmalastırıwdıń ózi gúrriń, qısqasha xabarlar, sabaqlıqtı oqıp beriw yamasa oqıtıwshınıń oqıwshılar menen sáwbetlesiwi formasında ótkiziliwi múmkin.
Tekseriw (qadaǵalaw) sabaqları muǵállimge oqıwshılardıń belgili tarawdaǵı bilim, uqıp hám kónlikpeleriniń qálipleskenlik dárejesin, oqıw materialın iyelewdegi kemshiliklerin anıqlaw, sonday-aq, náwbettegi tapsırmalardıń orınlanıw jolların belgilep alıwǵa járdem beredi. Tekseriw sabaqları oqıwshıdan usı tema boyınsha onıń hámme bilim, kónlikpe hám uqıplılıqların qollanıwın talap etedi. Tekseriw awızeki yamasa jazba túrde ámelge asırılıwı múmkin.
Joqarıda kórsetilgen barlıq sabaqlardıń májbúriy elementi shólkemlestiriw hám juwmaqlaw basqıshı bolıp esaplanadı. Shólkemlestiriw basqıshı maqsetlerdi qoyıw hám olardıń oqıwshılar tárepinen qabıl etiliw sharayatların támiyinlew, jumıs sharayatın jaratıw, oqıw xızmeti motivlerin aktuallastırıw hám materialdı qabıl etiw, ańlaw, eslep qalıw boyınsha beriletuǵin kórsetpelerdi qáliplestiriwdi názerde tutadı. Sabaqqa juwmaq jasaw basqıshında maqsetlerge erisiw jazıp barıladı. Olarǵa erisiwde hámme yamasa jeke oqıwshılardıń ayrıqsha qatnasıwı belgilenedi, jumısları bahalanıp perspektivaları belgilenedi.
Oqıtıwdıń shólkemlestiriw forması sıpatında sabaq dinamikalıq hádiyse bolıp esaplanadı. Ol pedagogikalıq processtiń bir pútinligin támiyinleydi hám oqıtıw, tárbiyalaw, rawajlandırıw wazıypalarınıń unamlı sheshimin tabıwǵa múmkinshilik beredi.
Sabaq rawajlanıwınıń tiykarǵı tendencyaları sabaqqa bolǵan talaplarda óziniń anıq sáwleleniwin tabadı.