Punktuasiya lotincha punctum so‘zidan olingan bo‘lib, nuqta

Tinish belgilarining qo‘llanishi
Nuqta

Nuqta quyidagi o‘rinlarda qo‘yiladi:

1. 
   Darak gap oxirida: Adabning yuqori bosqichi go‘zal xulqdir. (“Oz-oz o‘rganib dono bo‘lur”.)
   
2. 
   Tinch ohang bilan aytilgan buyruq gap oxirida: O‘zing himmatli bo‘l, ota-bobong himmatini so‘zlab mag‘rurlanma. (“Oz-oz o‘rganib dono bo‘lur”.)
   
3. 
   Remarka tipidagi gap oxirida: Zargarov. Tinch kelib ketadi degin? Shundoq bo‘lsa ham nasihat qilib, etini o‘ldirib, undan keyin meni chaqirgin. Men uyda bo‘laman. (Chaqmoqchi bo‘ladi.) (A.Qahhor.)
   
4. 
   Numerativlar bilan ko‘rsatilgan sanaluvchilar oxiriga: Gaplar tuzilishiga ko‘ra ikki xil bo‘ladi:
   

1. 
   Sodda gaplar.
   
2. 
   Qo‘shma gaplar.
   

5. 
   Harflar yoki raqamlar bilan ko‘rsatilgan numerativlardan keyin: Hozirgi o‘zbek adabiy tili unli fonemalari quyidagicha tasniflanadi:
   

A. Tilning gorizontal harakatiga ko‘ra.
B. Tilning vertikal harakatiga ko‘ra.
V. Lablarning ishtirokiga ko‘ra.

6. 
   Ayrim shartli qisqartmalardan keyin yozuv texnikasiga ko‘ra nuqta qo‘yiladi: A.Avloniy, A.Qahhor, A.Oripov va boshqalar.
   
7. 
   Sitataning manbaini ko‘rsatuvchi kiritmalar matn ichida yoki havolada berilsa, muallif nomidan so‘ng va oxirgi so‘zdan keyin nuqta qo‘yiladi: M.Asqarova. “Hozirgi o‘zbek adabiy tili” ma’ruza matnlari, Toshkent, 2001.
   

So‘roq belgisi
So‘roq belgisi quyidagi o‘rinlarda qo‘yiladi:

1. 
   So‘roq gap oxirida: Maktabda senga shuni ta’lim beradimi? Qani daftarlaring? (A.Qahhor.)
   
2. 
   Kim, nima, qaer, qanday, qaysi, qachon, nima qildi kabi so‘z va iboralar so‘roq ma’nosida qo‘llansa, ulardan so‘ng so‘roq belgisi qo‘yiladi: Ega kim?, nima?, qaer? so‘roqlarining biriga javob bo‘ladi.
   
3. 
   Taqrizlarda va sitatalarda biror so‘z yoki jumla gumon yoki anglashilmovchilik tug‘dirsa, bunday so‘z yoki jumladan so‘ng qavs ichida so‘roq belgisi qo‘yiladi.