Strategiyaliq basqariw. Boston modeli

Finanslıq maqsetler májbúriy, sebebi, finanslıq qarjılar jetispese kompaniya tómen awhalǵa túsip qaladı.
Strategiyalıq maqsetler kompaniyanıń bazardaǵı báseki ornın kúsheytiriwge qaratıladı. Finanslıq maqsetler payda kólemi, qarjılardan qaytım, naq pul túsimi, dividendler sıyaqlı kórsetkishlerdi kóbeytiriwge qaratıladı. Strategiyalıq maqsetlerge bolsa firmanıń básekige shıdamlılıǵın asırıw, sonıń nátiyjesinde rawajlanıwdıń joqarı templerine, bazardaǵı salmaǵın asırıwǵa, tómen qárejetlerge erisiwge, firmanıń abıroyın arttırıwǵa qaratılǵan boladı.
v) Maqsetler - bul nátiyjeler, strategiya bolsa olarǵa erisiw jolı. Strategiyanı anıqlaw ushın kárxananıń ishki jaǵdayı sırtqı faktorlar úyreniliwi kerek. Kompaniyanıń strategiyası ádette tómendegilerden ibarat boladı:
1) tereń oylanǵan, maqsetke qaratılǵan háreketler;
2) waqıyalardıń kútilmegen rawajlanıwı hám kúsheygen báseki gúresine juwap beriw;
Strategiya - bul tek ǵana menejerler aldınıraq oylap shıqqan háreketler emes, bálki kútilmegen jaǵdaylarda kiritiliwi kerek bolǵan dúzetiwler. Strategiyanı islep shıǵıw ushın isbilermenlik qábileti hám pikirlewdiń strategiyalıq túri bolıwı kerek. Strategiyanı islep shıǵıw menejerdiń isbilermenlik qábiletine baylanıslı.
Menejerdiń isbilermenlik qábiletin belgilew kriteriyası onıń jańa strategiyalıq múmkinshiliklerin kórip biliwi hám jańalıqlarǵa talpınıwshańlıǵında. İsbilermenlik qábiletine iye bolǵan menejerler ádette birinshi qaldırǵashlar boladı. Olar jańalıqlardı tez ózlestirip aladı, táwekelshi boladı hám keskin jańa strategiyalar jaratadı.
Kompaniya strategiyasına dúzetiwler kiritiw normadıǵı ápiwayı jaǵday esaplanadı. Geyde strategiyaǵa ózgertiriw kiritiw zárúr bolıp qaladı. Kemnen-kem jaǵdaylarda ǵana kompaniya strategiyası waqıt sınawınan óte aladı. Strategiyanı qanday qılıp jaqsılaw múmkin, degen soraw menejerdi hesh qashan tárk etpewi kerek. Sonıń ushın strategiyanı islep shıǵıw dinamikalıq protsess esaplanadı.
Kompaniya strategiyası bir qatar sorawlarǵa juwaplardan ibarat boladı. Bul sorawlar tómendegilerden ibarat:
- isti qanday rawajlandırıw kerek?
- klientlerdi qanday qılıp qanaatlandırıw kerek?
- básekishilerden qanday qılıp ozıp ketiw múmkin?
- ózgeriwsheń bazar sharayatlarına qanday juwap beriw kerek?
- kompaniyanıń ayırım funktsional bólimlerin qanday basqarıw kerek?
Strategiyalıq kóriw hám kompaniya missiyasın islep shıǵıw, maqsetlerdi anıqlaw hám strategiyanı tańlaw - bul kompaniyanıń rawajlanıw baǵdarın belgilewdegi tiykarǵı wazıypalar. Keshigip dúzilgen strategiyalıq rejeler yaki óz waqtında kiritilmegen dúzetiwler hesh qanday nátiyje bermeydi.
g) Strategiyanı ámelge asırıw isleri administrativlik wazıypalarǵa kirip, tómendegilerden ibarat boladı:
- strategiyanı tabıslı orınlaw ushın shólkemlesken múmkinshilikler jaratıw;
- qarjılardı paydalı jaylastırıw ushın byudjetti basqarıw;
- firma strategiyasın ámelge asırıwdı támiynleytuǵın siyasattı belgilew;
- xızmetshilerdiń jánede nátiyjelirek islewi ushın xoshametlew;
- erisiletuǵın nátiyjeler hám sıylıqlar kólemin bir-birine baylanıstırıw;
- kompaniyada belgilengen wazıypalardı orınlaw ushın qolaylı ortalıq jaratıw;
- kompaniya personalın támiynlewshi ishki jaǵdaylardı jaratıw, yaǵnıy hár bir personaldıń strategiyalıq rolin nátiyjeli orınlaw jaǵdayların jaratıw;
- isti turaqlı jaqsılaw ushın eń aldıńǵı tájiriybelerden paydalanıw;
- ishki basshılıqtı támiynlew;
d) Joqarıdaǵı 4 wazıypalar bir neshe márte qayta kórip shıǵıladı, sebebi jańa júzege keletuǵın jaǵdaylar dúzetiwler kiritiwdi talap etedi. Ótken tájiriybeler hám kompaniyanıń keleshek maqsetlerine ózgertiwler kiritiliwi múmkin. Strategiyanı tabıslı ámelge asırıw jolların aqtarıw turaqlı esaplanadı. Strategiyanı ámelge asırıwda geypara bólimler kereksiz bolıp, olardı ózgertiriw kerek boladı.