Tabiiy gazdan foydalanish qoidalari 1-bob. Umumiy qoidalar

Vazirlar Mahkamasining 2018-yil 12-yanvardagi 22-son qaroriga
2-ILOVA
Tabiiy gazdan foydalanish
qoidalari
1-bob. Umumiy qoidalar
1. Ushbu Qoidalar O‘zbekiston Respublikasi Fuqarolik kodeksi, “Energiyadan oqilona foydalanish to‘g‘risida”, “Xo‘jalik yurituvchi subyektlar faoliyatining shartnomaviy-huquqiy bazasi to‘g‘risida”, “Tabiiy monopoliyalar to‘g‘risida”, “Iste’molchilar huquqlarini himoya qilish to‘g‘risida” O‘zbekiston Respublikasi qonunlari va boshqa normativ-huquqiy hujjatlarga muvofiq tabiiy gazni yetkazib berish va iste’mol qilish sohasidagi munosabatlarni tartibga soladi.
2. Ushbu Qoidalar tabiiy gaz ishlab chiqaruvchilar, gaz transporti va gaz ta’minoti tashkilotlari, iste’molchilar, qurilish-montaj, loyihalash, ishga tushirish-sozlash tashkilotlari, shuningdek, O‘zbekiston Respublikasi Bosh prokuraturasi huzuridagi Majburiy ijro byurosi (keyingi o‘rinlarda Byuro deb ataladi) tomonidan bajarish uchun majburiy hisoblanadi.
2-bob. Asosiy tushunchalar
3. Ushbu Qoidalarda quyidagi asosiy tushunchalar qo‘llaniladi:
avariya holatlarida gaz yetkazib berish jadvallari — avariya holatlarida yoki magistral va taqsimlash gaz quvurlarining texnologik ish rejimi buzilgan holatlarda, iste’molchilarni gaz tarmoqlaridan (qisman yoki to‘liq) uzib qo‘yish navbatini hisobga olgan holda, ularga tabiiy gaz yetkazib berish jadvallari;
Oldingi tahrirga qarang.
xatlov dalolatnomasi — gaz ta’minoti tashkiloti yoki Byuro vakili tomonidan iste’molchi ishtirokida iste’molchining tabiiy gaz iste’moli hajmini aniqlashga ta’sir ko‘rsatadigan barcha ma’lumotlari (nomlanishi, manzili va rekvizitlari, gazni hisobga olish pribori va gazdan foydalanish uskunasining texnik tavsiflari, gaz xo‘jaligining loyiha ma’lumotlari, rasmiylashtirish sanasidagi hisob-kitoblar holati, vakolatli organlar tomonidan tabiiy gazdan oqilona foydalanish bo‘yicha berilgan xulosalarning mavjudligi, shuningdek, maishiy iste’molchilar uchun yashovchilar, hayvonlar soni va isitiladigan binolar hajmi) aks ettirilgan holda tuzilgan hujjat;
(3-band O‘zbekiston Respublikasi Vazirlar Mahkamasining 2018-yil 20-oktabrdagi 838-sonli qaroriga asosan uchinchi xatboshi bilan to‘ldirilgan — Qonun hujjatlari ma’lumotlari milliy bazasi, 22.10.2018-y., 09/18/838/2077-son)