Технологик труба ва уларнинг элементларини хисоблаш ва лойихалаш

Трубалар, бирлаштириш деталлари, компенсаторлар ва таянчлар. Технологик қувурларда пайвандланган ва чоксиз пўлат трубалар кўп миқдорда ишлатилади. Пайвандланган трубалар бўйлама ёки спиралсимон чокли бўлади ва уларнинг пухталиги чоксиз трубаларникидан анча паст. Чоксиз трубалар асосан заҳарли, портловчи ва коррозион фаол моддалар учун қолган ҳолларда эса – пайвандланган трубалар қўлланилади.
Трубалар турли маркали пўлатлардан ясалади. Кенг кўламда қўлланиладиган трубалар Ст.10 ва Ст.20 маркали пўлатдан, махсус трубалар эса – легирланган, юқори легирланган, кислота ва иссиқликка бардошли пўлатлардан ясалади. Ундан ташқари, чўян, мис, латунь, кўрғошин, керамика, алюминий, титан, шишапластик, шиша, фарфор, пластмасса ва бошқа материаллардан тайёрланиши мумкин. Ҳозирги кунда рангли металл ва қўрғошиндан ясалган трубалар пластмассадан ясалган трубаларга алмаштирилган. Охирги пайтда винипласт, фаолит, полиэтилендан ясалган трубалар кенг кўламда ишлатилмоқда. Бу трубалар агрессив муҳитларга ўта бардошли, лекин муҳит температураси ортиши билан қўллаш чегараси камаяди. Масалан, винипласт трубаларни 40^oС гача, полипропилен трубаларни 100^oС гача ва фаолитдан ясалган трубаларни 110^oС гача қўллаш мумкин.
Ҳозирги кунда кимё ва бошқа саноатларда титан трубалар кенг кўламда ишлатилмоқда. Худди шундай, ички қисми полиэтилен, винипласт, эмаль, шиша ёки резина билан қопланган трубаларни ишлаб чиқариш яхши йўлга қўйилган.
Коррозион фаол муҳитларга нисбатан кимёвий бардош, кичик солиштирма оғирлик, тайёрланиши осон бўлишига қарамасдан, полимер материаллардан ясалган труба қувурлари кам қўлланилмоқда чунки мустаҳкамлиги паст. Полимер труба муҳитнинг температураси ошишига жуда сезгир, чунки мустаҳкамлиги кескин равишда камаяди. Ҳозирги кунда винипласт трубалар кўп ишлатилмокда. Улар диаметри 10-250 мм ва узунлиги 300-1500 мм ли қилиб ишлаб чиқарилмоқда ва 0,25 МПа босимга бардош беради. Винипласт трубаларни букиш учун ичи қум билан тўлдирилади ва 130-145^оС да ишлов берилади. Бундай трубаларни пайвандлаш 200-210^оС ли иссиқ ҳаво оқимчаси ёки газ алангасида амалга оширалади. Полиэтилен труба юқори эластикликка эга ва қурилиш-монтаж майдончаларига катта ўрамларда келтирилади.
Полипропилен трубалар юқори температурага бардош бера олади ва температураси 150^оС ва босими 1,6 МПа ли муҳитларни узатиш учун қўлланилади.
Охирги йилларда фторопласт-4, шиша пластик, шиша толали анизотроп материалларни қўллаш оммавий тус олмоқда. Муҳит босими 0,4 МПа да шиша трубалар яхши эксплуатацион хоссаларга эга. Шиша труба қувурлар деталлари пайвандлаш ёки махсус резина халқали фланецлар ёрдамида бирлаштирилади.
Бирлаштирувчи деталларга турли конструкцияли тирсаклар, бир диаметрдан иккинчисига ўтувчи мосламалар, тройниклар ва бошқалар киради. Одатда, труба қувурларининг элементлари (тирсаклар, трубалар) бир-бирига пайвандлаб бирлаштирилади.
Агарда, трубаларни пайвандлаш мақсадга мувофиқ бўлмаса, унда трубалар фланецли бирикмалар ёрдамида бирлаштирилади. Кўпинча, пайвандланган фланецлар қўлланилади. Резьбали фланецлар асосан юқори босимли труба қувурларида ишлатилади.
Маълумки, атроф муҳит ва труба орқали узатилаётган муҳит температуралари ўртасидаги фарқ катта бўлса, труба қувурлари температура деформациясига дуч келади. Одатда труба қувурлари узун бўлади ва ишлаб чиқаришда умумий температура деформациясининг миқдори катта бўлиши мумкин. Натижада, труба узилиши ёки шишиб қолиш ҳоллари рўй беради. Шу сабабли, ушбу деформацияларни компенсация қилиш зарур.
Технологик труба қувурларидаги температура деформацияларини бартараф қилиш учун П-симон, линзали, тўлқинсимон ва сальникли компенсаторлар ишлатилади.
Труба қувурларининг диаметридан қатъий назар ер устидаги конструкцияларда П-симон компенсаторлар жуда кўп ҳолларда қўлланилади (1 - расм).