Технологик труба ва уларнинг элементларини хисоблаш ва лойихалаш

Фланецли бирикмалар. Конструкциясига қараб фланецлар патрубка ёки қобиққа маҳкамланади. Ўзаро фланецлар зичловчи қистирма ёрдамида бириктирилади. 5 - расмда фланецларни патрубкага пайвандлаш усуллари кўрсатилган.
Энг оддий – ясси пайвандланган фланецлар бўлиб, температура 300^оС ва шартли босим 2,5 МПа гача бўлган шароитда ишлатилади. Учма-уч пайвандланган фланецлар исталган босим ва температурали муҳитларда қўлланиши мумкин. Халқада эркин айланувчи фланецлар шартли босим 2,5 МПа гача бўлган шароитларда ишлатилади.

5 - расм. Фланецлар конструкцияси.
а – ясси пайвандланган; б – учма-уч пайвандланган;
в – пайвандланган ҳалқада эркин айланувчи.

6 - расм. Фланецлар бирлашувчи юзаларининг шакллари.
а – ясси ; б – бўртиқ-ботиқ; в – шип-паз.

6 - расмда фланецларнинг бирлашувчи юзаларининг энг кўп қўлланиладиган шакллари кўрсатилган.

Ясси юзали, тўртбурчак кўндаланг кесимли қистирмали фланец бирикмаси шартли босим 2,5 МПадан ошмаган шароитларда ишлатилади. Ботиқ-бўртиқ юзали, тўртбурчак кўндаланг кесимли қистирмали фланецлар (б) эса – 4 МПа гача; шип-паз юзали, тўртбурчак ёки думалоқ кўндаланг кесимли қистирма билан зичланган фланецлар (в) эса – 6,3 МПа гача бўлган ҳолатларда қўлланилади. Агар, босим 6,3 МПа дан ортиқ бўлса, эллипс ёки саккиз бурчак кўндаланг кесим шаклли метал қистирмалар ишлатилиши зарур; бундай ҳолларда фланец бирлашувчи юзаларида бир хил, қистирма шаклига мос ариқчалар қилинади.
Агар эксплуатация шартлари бўйича қистирма қўллаб бўлмаса, унда фланецлар бирлашувчи юзалар орасини зичлаш махсус усулда амалга оширилади. Бунда бирлашувчи юзаларга маълум шакл ва алоҳида механик ишлов (шлифовка) берилади. Ушбу юзалар ясси, сферик ёки конуссимон бўлиши мумкин.
Қистирмалар турлари. Фланецли бирикмани зичлаш учун, одатда, улар орасига қистирмалар ўрнатилади. Қистирма пластик, эластик, муҳитга бардошли, эксплуатация даврида мустаҳкам ва узоқ муддат хизмат қилиши керак. Қистирма материали ва тури эксплуатация шароити–босим, температура ва муҳит хоссалари асосида танланади. Қистирма ўлчами ва шакли фланецларнинг бирлашиш юзаси шаклига боғлиқ.
1 -жадвалда қурилмасозликда ишлатиладиган қистирма материаллари келтирилган.
1 жадвал

Т/р	Материал	Параметрларнинг тавсия этиладиган чегаралари
		Dу, мм	Ру, МПа	T, ^оС
1.	Картон, резина	3000	0,6	-300 дан +100 гача
2.	Резинали мато	3000	1,0	-30 дан +100 гача
3.	Асбестли картон	3000	1,6	+500 гача
4.	Пластикат, полиэтилен	3000	4,0	-30 дан +60 гача
5.	Паронит	3000	10,0	-200 дан +400 гача
6.	Фторопласт	1000	10,0	-200 дан +250 гача
7.	Алюминий, мис, латунь, монель, қўрғошин, никель	800	40,0	-200 дан +300 гача
8.	Углеродли, легирланган ва юқори легирланган пўлатлар	1600	20,0	-200 дан +540 гача

7-расмда энг кўп қўлланиладиган қистирмаларнинг кўндаланг кесимлари келтирилган. Тўғри тўртбурчак шаклли қистирмалар исталган материалдан ясалиши мумкин. Думалоқлар – металлдан; эллипс ва саккиз бурчакли кўндаланг кесимли, гофрирланган қистирмалар эса – пўлатлардан ясалади.