Toshkent davlat yuridik universiteti iqtisodiy protsessual huquq

8-BOB. IQTISODIY PROTSESSDA DALILLAR VA ISBOTLASH
1. Dalillar tushunchasi va tasnifi
Dalillar tushunchasini to'g'ri aniqlash - haqiqatni bilish, qo'llaniladigan choralarning asosli va qonuniyligini ta’minlashning muhim sharti hisoblanadi. Qonun talabiga ko‘ra sudning u yoki bu nizo bo‘yicha qabul qilingan qarori aniq dalillarga asoslangan va qonuniy bo‘lishi lozim.
Taqdim etilgan dalillarga to‘g‘ri baho berish, zarur dalillarni talab qilib olish va mavjud dalillar asosida nizoni hal etish bevosita sud qarorlarining barqarorligini ta’minlovchi muhim omil hisoblanadi.

Dalil bu - ish uchun ahamiyatli bo'lgan faktik holatlarni o'zida muj assamlashtirgan ma'lumotlardir. Bunday ma'lumotlarning haqiqiyligi sud tomonidan faktik ma'lumotlarni tahlil qilish orqali tekshirilishi lozim. Dalil sifatida keltirilgan ma'lumotlarning haqiqiyligiga sud hal qiluv qarorini qabul qilishda baho beradi.		Dalil bu - sud tomonidan ish uchun ahamiyatli bo'lgan taraflarning talablari, e'tirozlari va boshqa holatlarni mavjud yoki mavjud emasligini o'rnatish asosi hisoblangan faktik ma'lumotlardir. Dalil ishni to'g'ri hal qilish uchun ahamiyatga ega bo'lgan faktlar haqidagi ma'lumotlarni o'zida muj assamlashtiradi, shuningdek, ish uchun ahamiyatli faktlarni o'rnatish vositasi bo'lib xizmat qiladi.