Túsindiriw xatí

Qánigelestirilgen bilimlendiriw mákemeleri agentligi janındaǵı mekteplerdiń 9-klass pitkeriwshilerine qaraqalpaq tili hám ádebiyatı páninen Juwmaqlawshı mámleketlik attestaciya ushın dúzilgen soraw hám tapsırmalarǵa

TÚSINDIRIW XATÍ

9-klaslar ushın Juwmaqlawshı mámleketlik attestaciya materiallarınıń tayarlanıwı barısında qaraqalpaq tili hám ádebiyatı páninen 7,8,9-klaslarda úsh jıl dawamında ótilgen temalar tiykar etip alındı.
Juwmaqlawshı attestaciya materialları ushın qaraqalpaq tili hám ádebiyatı pánleriniń integraciyasın támiyinlew maqsetinde optimallastırılǵan halda kórkem ádebiy stilge tiyisli tekstler tańlap alındı. 8-klass ádebiyat sabaqlıǵında qosıq qurılısına baylanıslı poeziyalıq dóretpelerdiń talqılanıwı, sonday-aq, 9-klass ádebiyat sabaqlıǵında prozalıq dóretpelerdiń talqılanıwı berilgen, sol sebepli Juwmaqlawshı attestaciya materiallarında da qosıq qatarları hám prozalıq dóretpelerden úzindiler alındı.
Ádebiyat páni boyınsha tańlanǵan shıǵarmalar 7,8,9-klass sabaqlıqlarınan alınǵan bolıp, oqıwshılar bul shıǵarmalar haqqında maǵlıwmatqa iye. Ádebiyat páni boyınsha sorawlar oqıp túsiniw, pikir bildiriw, erkin pikirlew kompetenciyaları tiykarında dúzildi.
7-klass qaraqalpaq tili sabaqlıǵında Morfologiya (Tekstte kómekshi sózler, tańlaq, modal sóz, eliklewish sózlerden paydalanıw) temasına saatlar ajıratılǵanı ushın hárbir varianttıń 4-sorawı morfologiya bólimindegi temalar boyınsha tayarlandı.
7-klass qaraqalpaq tili sabaqlıǵında gáp aǵzaları, 8-klasta bolsa sóz dizbegi, gáp hám tekst sintaksisi temalarına saat ajıratılǵanı ushın variantlardaǵı 5-soraw gápti sintaksislik tallaw islewge baǵdarlandı.
9-klasta qospa gáp sintaksisi temasına saatlar ajıratılǵanı esapqa alınıp, 6-soraw teksttegi qospa gápti tallanıwına baǵdarlandı.
Sonday-aq, 9-klass aqırında irkilis belgileri temasına saat ajıratılǵanı sebepli, 7-soraw teksttegi irkilis belgileriniń qollanılıwı boyınsha berildi.
Juwmaqlap aytqanda, variantlardaǵı sorawlar sanı hám qıyınlıq dárejesi birdey bolıwına óz aldına itibar berildi.