Turistlarga havo transportida xizmat ko‘rsatish xususiyatlari

TURISTLARGA HAVO
TRANSPORTIDA XIZMAT
KO‘RSATISH XUSUSIYATLARI
Reja:
1.Havo transportida yo‘lovchi tashishni tartibga solishning huquqiy asoslari.
2.Xalqaro aviatashuvlarni huquqiy jihatdan ta’minlash.
3.Havo transportida yo‘lovchi yoki yuk tashish to‘g‘risidagi shartnoma.

Havo transportida yo‘lovchi tashishni tartibga solishning huquqiy asoslari

Aviatashuvlar boshqa transport vositalari bilan xizmat ko‘rsatishga nisbatan bir qancha o‘ziga xos xususiyatlarga ega. Bu, eng avvalo, ob-havo sharoitiga bog‘liqligi hamda samolyotlarning uchish va qo‘nish joylaridagi landshaft bilan bog‘liq. Aviatashuvlar o‘zining asosiy ustunligi — manzilga juda tez eltib qo‘yishi bilan yer usti va suv transporti bilan jiddiy raqobatlashadi.

Asosiy tushunchalar
Ichki aviatashuv — jo‘nash joyi, borish manzili hamda barcha qo‘nish joylari bir davlat hududida joylashgan bo‘lib, havoda yo‘lovchi va yuk tashish.
Xalqaro aviatashuv — jo‘nash joyi va borish manzili ikki davlat hududida; agar boshqa davlat hududida qo‘nish nazarda tutilgan bo‘lmasa, bir necha davlat hududida joylashgan havoda yo‘lovchi va yuk tashishdan iborat.
Tashish davri quyidagilarni o‘z ichiga oladi: yo‘lovchi tashishda – yo‘lovchi aeroport perroniga havo kemasiga chiqish uchun kirgan paytdan boshlab u perronni tashuvchining vakolatli shaxslari kuzatuvida tark etgunga qadar davri.
Aviatashuvlarni tartibga solish xalqaro qonunchilik (agar tashuv xalqaro xususiyatga ega bo‘lsa) yoki milliy qonunchilik (agar tashuv ichki xususiyatga ega bo‘lsa) asosida amalga oshiriladi.

Xalqaro fuqaro aviatsiyasi sohasidagi dastlabki huquqiy hujjatlardan biri 1929 yilda qabul qilingan «Xalqaro aviatashuvlarga daxldor ayrim qoidalarni unifikatsiya qilish to‘g‘risida»gi Varshava konvensiyasidir. Ushbu normativ hujjatda quyidagilar o‘z ifodasini topgan:

xalqaro aviatashuvlar ta’rifi;
aviatashuvchilar tomonidan havoda yo‘lovchi va bagaj tashish tartibi;
tashish shartnomasini tasdiqlovchi asosiy tashish hujjatlari;
tashuvchining javobgarligi tartibi;
ushbu konvensiyaga davlatlarning qo‘shilishi tartibi.