Ватан таянчи” болалар ва ўсмирлар ҳарбий-ватанпарварлик ҳаракати отрядларининг Қоида ва тамойиллари

Биринчидан, ҳаракатнинг лагерь йиғинида анъанавий ётоқхоналар, ошхоналар бўлмайди. Лагерь йиғини асосан дала шароитида чодирли майдонда ўтказилади. Ҳаракат аъзоларининг ҳар бири мустақил равишда ўзининг яшаш шароитини яратади. Ташкилотчилар томонидан ҳаракат аъзоларига ичимлик суви, озиқ-овқат маҳсулотлари, транспорт, тиббий хизмат кўрсатиш таъминлаб берилади. Таом тайёрлаш учун махсус ажратилган жойлар белгилаб берилади. Йиғин иштирокчиларининг хавфсизлик талабларига риоя этишлари назоратга олинади. Шунингдек, машғулот ва синовларни ўтказиш учун инструкторлар ажратилади. Вилоятлардан келган отрядлар рахбарлари лагерь йиғинларида назоратчи, йўриқчи ва ёрдамчи куч сифатида иштирок этадилар.
Табиийки, бундай лагерь йиғинларига отрядларнинг барча аъзолари жалб этилмайди. Бундай лагерь йиғинида энг яхши тайёргарликка эга, барча ўтган машғулотларда, машқларда, дала чиқишларида, саёҳатларда, жамоат ишларида ўзини интизомли ва мустақил ҳаракат қила олишини кўрсатган, жисмоний ва ахлоқий-руҳий ҳолати мустаҳкам бўлган ҳаракат аъзолари иштирок этиш имкониятига эга бўладилар. Бундан ташқари, албатта иштирокчининг шахсий зарурий анжомлари ва тўлиқ жиҳозланган юк қопи бўлиши шарт. Бу ҳаракат аъзосини ўзини қанчалик ҳурмат қилиши, шахсий гигиена талабларига қай даражада риоя қилиши, экстремал ва ностандарт ҳолатларни қай даражада тасаввур қила олиши билан боғлиқ бўлади.
Иккинчидан, анъанавий болалар оромгоҳлари асосан дам олиш ва кўнгилочар тадбирлар асосида ташкил этилади. “Ватан таянчи” ҳаракатининг лагерь йиғини эса асосан ҳарбий-ватанпарварлик ва ҳарбий-спорт йиғини сифатида ташкил этилади. Бунда ёшларни ўқув йили мобайнида Ватан тарихи, унинг қахрамонлари, маҳаллий халқ орасидаги бугунги кундаги замонавий қахрамонлар тўғрисидаги билимлари, тўгараклар ва машғулотларда ўзлаштирган кўникма ва маҳоратлари, спорт соҳасидаги ютуқлари, мустақил фикрлаш ва ҳаракатлана олиш сифатлари, бошланғич ҳарбий таълим фанида олган билим ва кўникмалари, ёш жангчи курсининг бошланғич билимлари, уларнинг уддабуронликлари синовдан ўтказилади.
Лагерь йиғинлари фақатгина синов ва имтиҳонлар асосида ўтказилмайди. Йиғинлар давомида турли хил бадиий ҳаваскорлик чиқишлар, қувноқлар ва зукколар ўйинлари, заковот интеллектуал ўйинлари, жамоаларни шакллантиришга қаратилган турли хил ўйинлар ҳам ташкиллаштирилади. Бундан ташқари, лагерь йиғинлари ўтказиладиган вилоятда жойлашган музей, муқаддас қадамжоларга экскурсиялар ҳам ташкиллаштирилиши мумкин. Ташкилотчилар томонидан ўсмирларнинг хавфсизлик талабларига риоя этишлари назорат қилиб борилади, зарур ҳолларда уларга кўмаклашадилар ва керакли маслаҳатлар бериб борадилар.
Энг муҳими бу йиғинлар саф бўлиб чегараланган, чизиб қўйилган стандартлардан йироқ бўлади.
Йиғинларда иштирок этиб қайтган ўсмирлар ўз тенгдошларига “Ватан таянчи” ҳаракатига аъзо эканликларини фахр ва ифтихор билан сўзлаб беришлари, кўплаб дўстлар орттирганликлари, бутун республика бўйлаб бир мақсад остида ўсиб-улғаяётган тенгдошлари борлиги, Ватанга бўлган муҳаббати янада ортганлигини тарғиб қиладилар. Йиғинлар давомида кўп нарсаларни ўрганганликлари, мароқли дам олганликлари, ўзларига ишончлари ошганликлари, Ватан ҳимояси ишончли қўлларда эканлиги ва улар ёш Ватан ҳимоячиси эканликларини ғурур билан айтиб беришади.