Yuqori haroratda boradigan jarayonlar reja: Ishlab chiqarishda yuqori haroratdan foydalanish. Hozirgi zamon sanoat pechlari

Hozirgi zamon sanoat pechlari. Ishlab chiqarishlarda yuqori haroratli jarayonlar turli pechlarda, kontakt apparatlar, avtoklavlar, bug`latuvchi apparatlar, qozonlar va shunga o`xshash apparatlarda sodir bo`ladi.
Asosiy yuqori haroratli jarayonlar sanoat pechlarida o`tkaziladi. Sanoat pechlarida issiqlik (yuqori harorat) yoqilg`ining yonishi, ekzotermik kimyoviy reaksiyalar, elektr energiyasining issiqlik energiyasiga aylanishi hisobiga hosil bo`ladi. Sanoat pechlarining o`ziga xos xususiyati shundaki, ularda reaksion apparat (ma`lum texnologik jarayonlarni o`tkazish uchun zarur bo`lgan jihozlar yig`indisi) hamda energetik qurilmalar (issiqlikni hosil qilish va ishlatish jihozlari) bir agregatga joylashtiriladi. Sanoat pechlarini loyihalashda ular quyidagi talablarga javob berishi lozim:

1. 
   Issiqlik energiya manbaidan qizdirilayotgan material, mahsulot yoki reaksion aralashmaga iloji boricha jadal ravishda o`tsin;
   
2. 
   Issiqlik yo`qotilishi (isrofi) minimal darajaga keltirilgan holda imkoni boricha, regeneratsiya ussullaridan foydalangan holda, issiqlikdan foydalanish koeffitsiyenti maksimal qiymatga yetsin;
   
3. 
   Yuqori sifat ko`rsatkichlarini saqlagan holda mahsulotning maksimal chiqishiga erishish;
   
4. 
   Ularning konstruksiyasi oddiy va mustahkam bo`lishi kerak;
   
5. 
   Pech ishidagi barqarorlik;
   
6. 
   Pechning ishini mexanizatsiyalash va avtomatlashtirish oson bo`lishi lozim.
   

Sanoat pechlari o`zlarining turli ko`rsatkichlariga asosan klassifikatsiyalanadi: sanoat tarmoqlarida ishlatilishiga ko`ra, issiqlik energiyasi manbaiga ko`ra, isitish usuliga ko`ra, texnologik vazifasiga ko`ra, xom ashyolar bilan to`ldirish usuliga ko`ra va h.k.
Issiqlik energiyasi manbaiga ko`ra:

1. 
   Issiqlik pechlari – qattiq, kukun holdagi, suyuq va gazsimon yoqilg`ilardan foydalaniladi;
   
2. 
   Elektr pechlari – issiqlik manbai elektr energiyasidan iborat;
   
3. 
   Qolgan pechlar – ularda zarur bo`lgan haroratga o`tayotgan reaksiyalarning issiqligi hisobiga (kolchedan va boshqa oltingugurtli rudalarni kuydirish pechlari, domna pechlari, metallar eritish uchun qo`llaniladigan konvertorlar) erishiladi.