Ўзбекистон республикаси фанлар академияси ўзбек тили, адабиёти ва фольклори институти қўлёзма ҳуқуқида

Тадқиқотнинг мақсади Ўзбекистон халқ ёзувчиси Ойбекнинг Хао Гуанг Жонг ва Ванг Женг Жонглар томонидан хитой тилига ўгирилган “Навоий” романи таржималарини аслият билан қиёслаб, унда тарихий-миллий колоритнинг сақланиши, аслиятга монандлиги, шунингдек, русча таржималарини ҳам аслият ва хитой тилидаги намуналари билан қиёсан солиштириш, таржимонлар маҳоратини тадқиқ этишдан иборат.
Тадқиқотнинг вазифалари:
бадиий таржимани кўп босқичли жараён сифатида ўрганиш мобайнида таржиманинг ўзига хос жиҳатларини белгилаш, ижодий ва лисоний тафаккур мутаносиблиги, аслият ва таржима орасидаги уйғунлик ва тавофутларни аниқлаш;
“Навоий” романи таржималарини ўрганиш, уларда мутаржимлар принциплари ва маҳоратини, матн стурктураси тузилишини таҳлилий-қиёсий ёритиш;
таржималарда этнопсихологик омилларнинг бадиий-эстетик қийматини белгилаш, этнопсихологик омилларни беришда таржимон ёндашувини аниқлаш ва илмий асослаш;
Романда вақт бирликлари ифодаси, уларнинг таржимада фонетик ва транслитерация усулида акс этишини аслият билан солиштириш, фарқ ва айирмаларни аниқлаш;
Таржимада тарихий-миллий колоритни сақлаш, мутаржим изоҳи ва бадиий эстетик аҳамиятини кўрсатиш, изоҳларини бериш масаласида хитой ва рус таржимонлари ёндашувини қиёсан солиштириш орқали белгилаш.
Тадқиқотнинг объекти. Тадқиқотда “Навоий” романининг аслиятдаги нашр варианти (1954 й), романнинг таржимонлар Хао Гуанг Жонг (Хитой. 1999 й) ва Ванг Женг Жонг (Хитой. 2005 й) томонидан ўгирилган хитой тилидаги таржималари, ҳамда таржимонлар М.Салье (1955 й) ва П.Слётов (1961 й) томонидан ўгирилган рус тилидаги таржималари объект сифатида олинган.
Тадқиқотнинг предметини “Навоий” романининг хитой тилидаги, (зарурият туғилганда уйғурча ва русча) таржималарининг асл матн билан қиёсий таҳлили, таржимада тарихий-миллий колоритни сақлаш муаммоларини ўрганиш ва уларга ечимлар бериш ташкил этади.
Тадқиқотнинг усуллари. Диссертация мавзусини очиб беришда қиёсий-типологик, қиёсий-тарихий, тарихий-функционал, статистик таҳлил усулларидан фойдаланилди.