Ózbekstan respublikasi joqari HÁm orta arnawli bilim ministrligi berdaq atindaǵİ qaraqalpaq mámleketlik universiteti «Ózbekstan hám qaraqalpaqstan tariyxi»

Izertlew metodları: Materiallardı sistemalastırıw, kompleksli keń kólemli qatnas, tariyxıy-salıstırıw analizi hám xronologiyalıq metod, tariyxıylıq, obektivlik principi hám jańa Ózbekstan tariyxın jaratıwdıń koncepciyası.
Izertlew nátiyjeleriniń ilimiy hám ámeliy áhmiyeti. Keń kólemli faktlıq maǵlıwmatlardı esapqa alıw, jańa metodologiyalıq qatnaslar negizinde transkontinental jollardıń boyında jaylasqan xalıqlardıń úrp-ádetlerin hám dástúrlerin, milliy qadriyatların úgit násiyat etiwde hám óz-ara almasıwda Ullı jipek jolınıń tutqan ornın anıqlaw, onı qayta qayta tiklew menen baylanıslı aktual máseleler hár tárepleme úyrenildi.
Ullı jipek jolın tiklew, respublikamızda turizmdi rawajlandırıw baǵdarında Prezident Pármanları hám húkimet qararlarınıń qabıl etiliwi hám olardı orınlaw boyınsha ámelge asırılıp atırǵan jumıslar ilimiy jaqtan analiz etildi.
Izertlew nátiyjeleri Ullı jipek jolınıń tariyxı boyınsha arnawlı kurslardı islep shıǵıw barısında, sonday-aq tariyxıy-mádeniy miyraslardı úyreniwde hám úgit násiyat etiwde, Qaraqalpaqstanda turizmdi rawajlandırıwda ham jańa turistlik baǵdarlardı shólkemlestiriwde paydalanılıwı múmkin.
Dissertaciyanıń dúzilisi. Jumıs kirisiwden, úsh baptan, juwmaqlaw, paydalanǵan derekler hám ádebiyatlar diziminen ibarat.
Kirisiwde izertlep atırǵan temanıń aktuallıǵı tiykarlanadı, mashkalanıń izertleniw dárejesi analiz etiledi, jumıstıń maqset hám wazıypaları anıqlastırıladı, izertlewdiń obekti hám predmeti kórsetiledi, jumıstıń metodologiyalıq tiykarına sıpatlama beriledi, onı alıp barıwdıń metodları, nátiyjeleriniń ilimiy jańalıǵı hám ámeliy áhmiyeti ashıp beriledi.
Birinshi bap «Ullı jipek jolın qayta tiklew máselesiniń kóteriliwi hám xalıq aralıq birge islesiwler», dep atalıp, ol eki paragraftan: «Ullı jipek jolın qayta tiklew ideyasııń payda bolıwı, onıń áhmiyeti», «Ullı jipek jolın tiklew boyınsha xalıqaralıq birge islesiwler» ibarat bolıp, onda XX ásirdiń 70-shi jıllarınan baslap Qıtaydaǵı reformalardan soń dúnya jámáátshiliginiń bul mámleketke itibarınıń kúsheyiwi, nátiyjede Evraziya aymaǵındaǵı transkontinental jollardı qayta tiklew boyınsha ideyalardıń payda bolıwı, hár qıylı variantlardıń hám kóz qaraslardıń qáliplesiwi, kóplegen baǵdarlamalardıń islep shıǵılıwı haqqında materiallar beriledi.
Ekinshi bap «Ullı jipek jolın tiklew boyınsha Evropa Awqamınıń alıp barǵan jumısları», dep atalıp, ol eki paragraftan: «Evropa Awqamınıń TRASEKA joybarı hám onıń áhmiyeti», ««Ullı jipek jolı – birge islesiw jolı» baǵdarlamasınıń qabıl etiliwi hám onıń áhmiyeti» ibarat bolıp, onda Ullı jipek jolın máselesine Evropa Awqamı mámleketleriniń belsene qatnasıwı, kóplegen ilajlardıń ótkeriliwi, «Ullı jipek jolı-qarım qatnas jolı» baǵdarlamasınıń qabıl etiliwi, onı ámelge asırıw boyınsha islenip atırǵan háreketler aykın faktlıq materiallar negizinde korsetiledi.
Úshinshi bap «Ózbekstan Respublikasınıń Ullı jipek jolın tiklew boyınsha jumıslarda qatnasıwı», dep atalıp, ol eki paragraftan: «Ózbekstannıń Ullı jipek jolın tiklew máselesinde dúnya elleri menen birge islesiwi», «Ózbekstan «Ullı jipek jolında - turizm» ideyasınıń watanı» ibarat bolıp, bunda Oraylıq Aziya, sonıń ishinde Ózbekstannıń transport kommunikaciya sistemasında áhmiyetiniń artıp barıwı, Qıtay hám basqa Shıǵıs elleri menen menen sawda-ekonomikalıq baylanıslardıń ósip barıwı, Ullı jipek jolın qayta tiklewde Ózbekstannıń qatnasıwı, házirgi dáwirde Qıtay tárepinen usınıs etilgen «Bir mákan –bir jol» baǵdarlaması, onı dúnyanıń kóplegen mámleketleriniń qollap-quwatlawı, elimizde turizmdi rawajlandırıw baǵdarında islenip atırǵan jumıslar haqqında maǵlıwmatlar beriledi.
Juwmaqlawda qoyılǵan wazıypalardan kelip shıǵa otırıp izertlew nátiyjeleri, juwmaqları hám usınısları beriledi.
Magistrlıq dissertaciya jumısınıń sonında paydalanǵan derekler hám ádebiyatlar dizimi keltiriledi.