11- маьруза Савдо, умумий овқатланиш ва коммунал хизмат муассасаларининг ҳажмий-тархий ечимлари ва қўйиладиган талаблар

Маиший хизмат кўрсатиш муассасалари

Маиший хизмат кўрсатиш муассасаларининг сиғими ишчи ўринларининг (қабул қилувчиларни ҳам қўшиб) сони билан аниқланади ва улар таркибида қуйидаги хоналар гуруҳи хисобга олинади:

- ташриф буюрувчилар учун : -вестибюл, буюртмаларни қабул қилиш ва қайтариш зали, сартарошхона ва гўзаллик салонлари, намойиш этиш ёки виставка заллари, ўлчаб кўриш хоналари, сурьатга олиш заллари ва х.к. лар;

- ишлаб чиқариш учун; - ателье, турли хил устахоналар ва х.к. лар;
- ёрдамчи-омборхоналар учун: - хом ашё махсулотлари, инвентар ва тайёр махсулотларни сақлаш хоналари ва х.к. лар;
- маьмурий-маиший хизмат учун: -хизматчилар учун идора ва маиший хоналар, гардероб, санитар шахобчаси, душ хоналари ва х.к. лар.
Вестибюллар ва ташриф буюрувчиларни қабул қилиш майдонлари 1 қабул қилувчи учун 12 кв.м. дан, буюртмаларни қабул қилиш ва қайтариш майдонлари билан бирга лойиҳалаганда 15 кв.м. дан кам бўлмаслиги лозим.
Кутиш жойлари 1 кутувчи учун 2-3 кв.м. миқдорда қабул қилинади. Ателье вестибюлларида ўлчаб кўриш кабиналари лойиҳаланади (1,7x2,0 м).
Сартарошхоналар ва гўзаллик салонларида 1 ишчи ўрни 6 кв.м. дан, маникюр залларида 5 кв.м. дан, педикюр ва косметика кабинетларида 8-9 кв.м. дан кам қабул қилинмайди, агар кабинетлар алоҳида лойиҳаланса майдонлар 12 кв.м. дан кам бўлмаслиги зарур.
Турли хил таьмирлаш устахоналари- майда таьмирлаш, тикув цехларида 1 ишчи ўрни учун 6 кв.м., катта габаритли маиший техникаларни таьмирловчи устахоналарда 1 ишчи ўрни учун 8-9 кв.м. қабул қилинади. Устахоналарнинг майдонлари қоида бўйича 15 кв.м. дан кам бўлмаслиги лозим.
Квартираларни таьмирлаш, мебел, устки кийимлар, оёқ кийимлари, трикотаж махсулотлари тайёрловчи маиший хизмат муассаларида майдони 25-30 кв.м. ва ундан кўпроқ майдонларга эга бўлган виставка заллари лойиҳаланади. Намойиш залининг майдони (намойиш майдончаси билан бирга) 60 кв.м. дан кам қабул қилинмайди.
Маиший хизмат кўрсатиш муассасаларининг маьмурий-маиший бинолари хоналар таркиби ва майдонлари жами ишчи ўринлари ва бир сменада ишловчи ходимлар сонидан келиб чиқиб, 2.09.04-09 “Ишлаб чиқариш корхоналарининг маьмурий бинолари” ШНҚ лари талаблари бўйича лойиҳаланади.