Diktant tu’rleri ha’m metodikasi

YADTAN JAZIW DIKTANTI
Shın dos ju’rekten aytadı.

Quyash hawanı ısıtsa,

Doslıq ju’rekti ısıtadı.

Dos-dostın’ aynası.

AYTIW DIKTANTI
Aq altın
Awılımız atızlarında paxta egiledi. Gu’zde jer traktor menen o’z waqtında su’riledi. Qısta atızg’a to’gin beriledi. Japlar tazalanadı. Atız egiske tayarlanadı. Diyqanlar ba’ha’r keliwi menen shigitlerin egedi. Shigit o’nip shıqqannan son’, suwg’arıladı, ta’rbiya beriledi ha’m birlenedi. Ha’zir sentyabr ayı. Paxtanın’ g’umshaları ashıla baslag’an. Jaqında «aq altın» du’rdanaları jıynap-terip alınadı. Paxta elimiz baylıg’ı.


DO’RETIWSHILIK DIKTANT
Oqıtıwshı, jaz, lager, dene ta’rbiyası, shug’ıllan, kinofilm, ko’r, o’mir, du’z, jaqın, sayaxat, tu’rli japıraqlar, bala, suw, muzday, maza, dem alıs, kewilli, o’tker.


ERKIN DIKTANT


Tu’lki menen tırna
1. Tu’lki tırnanı miymang’a mira’t etti. Uzın tumsıq tırna tu’lkinin’ u’yine keldi. Tu’lki onı tabaqqa salıng’an sorpa menen miyman qıldı. Tırna qanshelli urınbasın, sorpanı ishe almadı. Tırna u’yine qapa bolıp qayttı.
2. Ertesine tırna tu’lkini miymang’a shaqırdı. Onın’ aldına gu’ze menen sorpa qoydı. Tu’lki gu’zedegi sorpanı ishe almadı, sebebi gu’zenin’ awzı ju’da’ kishkene bolıp, tek tırnanın’ tumsıg’ı sıyar edi.
3. Keyin ne bolg’anın jazın’.


BILIMLENDIRIWSHI DIKTANT


Suw – biybaha baylıq
Ta’biyatta suwdı asıraw nızamı bar. Suw azıq-awqat islep shıg’arıwda, den sawlıqtı saqlawda insanlar za’ru’r.
Suw Jer sharının’ 70 protsentten ko’birek maydanın iyeleydi. Mag’lıwmatlarg’a qarag’anda Jer sharında barlıq suwdın’ 97 protsenti okean ha’m ten’izlerde toplang’an shor suw esaplanadı. 2 protsenti bolsa muz halında ha’m tek g’ana 1 protsentinen ishimlik suwı maqsetinde paydalanıladı.
Usı 1 protsent suwdın’ qanshelli za’ru’rligi, onı u’nemlew kerekligi haqqında bir oylap ko’rin’. Biraq suwdı ısırap qılmawg’a ha’mme de a’mel qılıp atırma?
Balalar, bul haqqında o’z pikirlerin’izdi bayan etip jazın’, ba’lkim qımbatlı pikirler aytarsız. En’ jaqsı bayanlar bahalanadı.