Электр энергетикаси тўғрисида

11. Савол: Кучланиш трансформаторларининг функциялари?
11. Жавоб: Кучланиш трансформаторлари бу – бирламчи кучланишни иккиламчи кучланишга айлантирувчи статик аппарат.
Кучланиш трансформатори юқори кучланишни стандарт 100 В ёки 100/√3В қийматигача камайтиришга ва ўлчаш ҳамда релейли ҳимоя занжирини бирламчи юқори кучланиш занжиридан ажратиш учун ишлатилади. Номиналь трансформация коэффициенти қуйидаги ифода билан аниқланади: η_т = U_1н/U_2н
Бунда:
U_1н – бирламчи номиналь кучланиш;
U_2н – иккиламчи номиналь кучланиш.
12. Савол: Электр ускуналарини заминлашдан (заземление) мақсад ва унга қўйилган талаблар.
12. Жавоб: Электр қурилмаларнинг нормаль ҳолларда кучланиш остида қолмайдиган, лекин изоляциясига шикаст етганда кучланиш остида қолиши мумкин бўлган ҳамма металли қисмлари ерга уланиши керак. Бундай ерга уланиш ҳимояловчи деб аталади, чунки бундай ҳимоя хизмат кўрсатувчи ходимни ҳавфли кучланишга тегиб кетишидан сақлайди.
500В ли ва ундан юқори кучланишли ҳамма электр қурилмаларида, шунингдек кучланиши 36В дан юқори бўлган юқори ҳавфли, ўта ҳавфли хоналарда ва ташқи қурилмаларда ерга уланиш бўлиши шарт.
Заминлаш қурилмаси деб – заминлагич ва заминловчи ўтказгичлар йиғиндисига айтилади.
Электр қурилмаларида қуйидагилар ерга уланадилар:
- электр машиналар,
- трансформаторлар,
- аппаратларнинг қобиғлари,
- ўлчаш трансформаторларнинг иккиламчи чулғамлари,
- электр аппаратларнинг юритмалари,
- тақсимловчи шитлар,
- пультлар,
- шкафларнинг каркаслари,
- тақсимловчи қурилмаларнинг металли конструкциялари,
- кабель муфталарининг металл қобиғлари,
- кабелларнинг қопламаси ва брони,
- электр ускуналарнинг қурилмалари билан боғлиқ бўлган симлари
- бошқа металли конструкциялари.