G. ahmedova, I. Xolbayev
Download 4.51 Kb. Pdf ko'rish
|
- Bu sahifa navigatsiya:
- Mas’ul muharrir
- KIRISH Atom tuzilishi to‘g‘risidagi tasavvurlarning rivojlanishi.
|
G.AHMEDOVA, I.XOLBAYEV, O.B.MAMATQULOV ATOM FIZIKASI Oliy o‘quv yurtlarining fizik-bakalavr ta’lim yo‘nalishi uchun o‘quv qo‘llanma Toshkent – 2012 2 UDK 539.1 G.Ahmedova, I.Xolbayev, O.B.Mamatqulov. Atom fizikasi. Oliy o‘quv yurtlari talabalari uchun o‘quv qo‘llanma. – 2012 yil. ____ b. Ushbu o‘quv qo‘llanma O‘zbekiston Respublikasi Vazirlar Mahkamasining “Uzluksiz ta’lim tizimini darslik va o‘quv adabiyotlari bilan ta’minlashni takomillashtirish to‘g‘risida”gi 2009-yil 5-yanvar 4-son qaroriga muvofiq O‘zbekiston Respublikasi Oliy va o‘rta maxsus ta’lim vazirligi tomonidan 27-iyul 2006-yilda tasdiqlangan fizik-bakalavr yo‘nalishlari uchun atom fizikasidan dastur asosida tayyorlandi. O‘quv qo‘llanma oliy o‘quv yurtlarining fizik-bakalavr mutaxassisligi bo‘yicha ta’lim olayotgan talabalarga, umuman, fizik mutaxassislarga mo‘ljallangan. Ushbu o‘quv qo‘llanmada atom fizikasi fanining taraqqiyot bosqichlari, yutuqlari, issiqlik nurlanishi, elektromagnit nurlanishning korpuskulyar xususiyatlari, zarralar va to‘lqinlar, vodorod atomining Bor nazariyasi, kvant mexanikasining asoslari, bir elektronli va ko‘p elektronli atomlar, rentgen spektrlari, atom tashqi kuchlar maydonida, molekulalar xususiyatlariga oid ma’lumotlar bayon qilingan. O‘quv qo‘llanmadan oliy o‘quv yurtlari fizik-bakalavrlari, magistrantlar, tadqiqotchilar, o‘qituvchilar hamda akademik liseylar, kasb- hunar kollejlari talabalari, umuman, atom fizikasi faniga qiziquvchilar foydalanishlari mumkin. Mas’ul muharrir: O‘zbekiston Milliy universiteti qoshidagi amaliy fizika ilmiy tekshirish instituti direktori, O‘zFA akademigi, fizika- matematika fanlari doktori, professor T.M.Mo‘minov Taqrizchilar: O‘zR FA akademigi, fizika-matematika fanlari doktori, O‘zbekiston Milliy universiteti yadro va nazariy fizika kafedrasi professori M.M.Musaxonov, Samarqand davlat universiteti atom va yadro fizikasi kafedrasi mudiri, fizika-matematika fanlari doktori, professor R.M.Ibodov. © G.Ahmedova, I.Xolbayev, O.B.Mamatqulov, 2012 3 SO‘Z BOSHI Hozirgi kunda Respublikamiz universitetlarida bakalavr kadrlar tayyorlanmoqda. Shuning uchun ham bakalavrlar o‘quv dasturlari asosida yozilgan zarur o‘quv adabiyotlari yaratish Respublikamiz Kadrlar tayyorlash Milliy dasturini amalga oshirishdagi muhim chora-tadbirlardan biri hisoblanadi. Zamonaviy fizika kursining asosiy bo‘limlaridan biri bo‘lgan atom fizikasidan bugungi kungacha fizik-bakalavrlar o‘quv dasturi va Davlat ta’lim standarti asosida Davlat tilida yozilgan va dastur bo‘limlarini to‘lasincha qamragan o‘quv adabiyotlari mavjud emas deyish mumkin. Atom fizikasidan Davlat tilida yozilgan adabiyotlar juda kam bo‘lib, kursning u yoki bu bo‘limlariga tegishlidir yoxud xorijiy tillarda yozilgan. Bakalavrlar uchun davlat tilida yozilgan, dastur bo‘limlarini to‘liq qamragan darsliklar, o‘quv qo‘llanmalar tayyorlash ularning ushbu fanni puxta o‘zlashtirishlariga imkon yaratishi mumkin. Shundan kelib chiqib, mualliflar O‘zbekiston Respublikasi Oliy va o‘rta maxsus ta’lim vazirligi tomonidan fizik- bakalavr yo‘nalishi uchun atom fizikasidan tasdiqlangan dastur asosida atom fizikasi kursidan mavjud bo‘lgan davlat tilida va xorijiy tillarda yozilgan adabiyotlardan foydalangan holda hamda Samarqand davlat universiteti fizika fakulteti talabalariga ko‘p yillar o‘qigan ma’ruzalari, ish tajribalari asosida ushbu o‘quv qo‘llanmani yozishga qaror qildilar. Mualliflar o‘quv qo‘llanmada har bir mavzuni imkoni boricha tajribalar sxemalari, grafiklari orqali oddiy tushunarli tilda yoritishga harakat qildilar. O‘quv qo‘llanmada mikrodunyoda fizik kattaliklarning o‘lchov birliklari, talabalarning mustaqil ishlashlari uchun har bobning oxirida nazorat savollari, masalalar, test savollari va javoblari berilgan. Albatta, mazkur o‘quv qo‘llanma birinchi marta chop etilmoqda. Shuning uchun ayrim kamchilik va noaniqliklarga ega bo‘lishi mumkin. Mualliflar kitobxonlarning kamchiliklarni tuzatish, o‘quv qo‘llanmani takomillashtirish to‘g‘risidagi bildirgan fikr va mulohazalarini mamnuniyat bilan qabul qiladilar. 4 KIRISH Atom tuzilishi to‘g‘risidagi tasavvurlarning rivojlanishi. Atom fizikasi hozirgi zamon umumiy fizika kursining asosiy bo‘limlaridan biri hisoblanadi. Atom fizikasi moddaning eng kichik zarrasi bo‘lgan atom elektron qobiqlarining tuzilishini, ularning xususiyatlarini va ulardagi jarayonlar tufayli yuz beradigan hodisalarni o‘rganadigan fandir. Atom fizikasi XIX asr oxiri va XX asr boshlarida yuzaga keldi. Lekin bu davrgacha, ya’ni atom fizikasi alohida fan sifatida yuzaga kelganiga qadar moddalar tuzilishi, materiyaning cheksiz bo‘linishlari va atom nazariyasi to‘g‘risida qadimgi yunon faylasuflari tomonidan turli fikrlar ilgari surildi, ko‘pgina olimlar tomonidan tajribalar o‘tkazilib, fizik hodisalar kashf qilindi. Tajribalaradan to‘plangan fizik hodisalarni, kashfiyotlarni ilmiy jihatdan asoslash, ularni tushuntirish atom fizikasini rivojlantirishni talab qilar edi. Bu esa atom fizikasining taraqqiy etishiga, alohida fan sifatida yuzaga kelishiga olib keldi. Qadimgi yunon faylasufi Anaksagor (eramizgacha 500-428) fikricha materiya asosida juda kichik bo‘lgan zarralar moddaning urug‘lari turadi, ularning sifatlari ham cheksizdir deb hisobladi. Anaksagorning aytishicha hamma narsada, hamma narsaning ulushi bor, qaysi narsaning ulushi ko‘p bo‘lsa, har bir alohida narsa o‘sha narsaga ko‘proq o‘xshaydi. Tabiatdagi har qanday o‘zgarish abadiy va doimiy bo‘lgan modda urug‘lari munosabatining o‘zgarishi natijasidir. Atomistik materializm asoschilari bo‘lgan qadimgi yunon faylasuflari Levkipp (eramizgacha V asr) va Demokritlar (eramizgacha 460-370) atom nazariyasini ilgari surdilar. Bu nazariyaga ko‘ra, har bir modda bo‘linmaydigan mayda zarralardan, ya’ni atomlardan tuzilgan. Ularning fikricha, atomlar mutlaq bo‘lib, ularda bo‘shliq yo‘q. Ular cheksiz fazoda bir-biridan alohida ajratilgan bo‘lib, tashqi shakli, o‘lchami, holati, tartibi bilan farq qiladi. Atomlar ma’lum vaqtlarda turg‘un birikmalarga birlashib turli jismlarni hosil qiladi. Demokritning atomistik qarashlari Epikur (eramizgacha 341-270) tomonidan rivojlantirildi. Uning fikricha, atomlar bir-biridan massalari bilan ham farq qiladilar, atomlarning 5 qismlari mavjud. Epikur tabiatda har xil shakldagi atomlar soni cheksiz, shakllar soni esa chekli deb tushuntirdi. Qadimgi yunon atomistlari tushunchalarining kuchsiz tomonlari Aristotel (eramizgacha 384-322) tomonidan butun atomizm konsepsiyasining tanqid qilinishiga sabab bo‘ldi. Aristotel fikri va atomistlarning farazlari, atomlarning mutloq o‘zgarmas ekanligi, deformasiya, siqiluvchanlik, jismlarning issiqlikdan kengayishi, ularning o‘zaro ta’siri kabi hodisalarning mavjudligini tushunishga imkon bermaydi. O‘rta asrlarda atom to‘g‘risidagi ta’limotlar sezilarli rivojlanmadi. Keyinchalik atom to‘g‘risidagi Levkipp, Demokrit, Epikurlarning atom to‘g‘risidagi tasavvurlari fransuz faylasuf materialisti P.Gassendi (1592-1655) tomonidan rivojlantirildi. Uning faoliyati I.Nyutonga (1643-1727) va R.Boyllarga (1627-1621) ta’sir ko‘rsatdi. I.Nyuton o‘z ishlarida materiya g‘ovak bo‘lib, bo‘shliqqa joylashtirilgan alohida zarralardan iborat, degan fikrni bayon qildi. Nyuton qattiq jismlar o‘zaro ta’sirining tabiatini qarab chiqib, shunday xulosaga keldi: zarralarning birlashishi ularning qandaydir kuch bilan tortishishidir, zarralar bir-biriga tekkanda, bu kuchlar katta qiymatga ega bo‘ladi. Bu davrda issiqlik hodisalarini tushuntirishda ikki xil tushuncha paydo bo‘ldi: birinchisining asosida atomlarning harakati haqidagi tasavvurlar yotadi, ikkinchisida esa teplorod tushunchasi yotadi. R.Broyl va uning shogirdi R.Guk (1635-1703) issiqlik, bu modda zarralarining mexanik harakati natijasidir, degan fikrni aytdilar. Bu fikr D.Bernulli (1700-1782) tomonidan quvvatlandi. D.Bernulli gazlar bosimi gaz molekulalarining idish devoriga urilishlari ta’siri natijasidir, deb tushuntirdi. Lekin keyinchalik J. Blek (1728-1799) ishlari asosida teplorod tushunchasi keng tarqaldi. XIX asr boshlarida atom nazariyasi Dalton va M.Lomonosovning (1711-1765) buyuk xizmatlari tufayli muhim ahamiyat kasb eta boshladi. M.Lomonosov teplorod nazariyasiga qarshi chiqdi. U o‘zining tekshirishlari asosida issiqlik modda zarralarining aylanma harakati natijasidir degan xulosaga keldi. Bu nazariyadan XIX asrda gazlar kinetik nazariyasini tuzishda G.Devi (1778-1829) va J.Joul (1818-1889) foydalandilar. Dalton turli elementlarni o‘zaro ta’sir qildirib kimyoviy birikmalar hosil qilish usullarini kuzatdi. U har bir element atomlardan tuzilgan, atom esa moddaning bo‘linmas birligidir, deb tushuntirdi. Uning fikricha, bir xil kimyoviy element atomlari boshqa 6 xil kimyoviy element atomlaridan farq qiladi. Hozirgi vaqtda yuzdan ortiq kimyoviy element bor, Dalton nazariyasiga ko‘ra esa elementar zarralar soni ham shuncha bo‘lishi kerak, lekin buni to‘g‘ri deb bo‘lmaydi. 1816 yilda Prout ilgari surgan nazariyaga asosan barcha element atomlari aynan bir turdagi atomlardan, chunonchi vodorod atomlaridan tuzilgan, bu esa qadimgi yunonlarning birlamchi materiyasiga to‘g‘ri keladi. Prout hamma elementlarni atom og‘irliklari butun sondan iborat bo‘lib, vodorod atom og‘irligiga qoldiqsiz bo‘linadi, degan fikrda bo‘lgan. Atom og‘irliklarini o‘lchashda shu fikrga suyanilgan. Tajribalarning ko‘rsatishicha, atom og‘irliklari kasr sonlar bilan ham ifodalanadi, masalan, Cl (35,457); Cu (63,54). Ma’lum vaqtdan so‘ng Prout nazariyasi ham noto‘g‘ri bo‘lib chiqdi. Lekin 100 yildan so‘ng bu nazariya o‘zgartirilgan holda yana tiklandi. Uning tiklanishiga radioaktiv hodisalarning ochilishi va atomning bo‘linuvchanligi haqidagi fikrlar sabab bo‘ldi. Bu davrda kimyoviy moddalar atomlari orasidagi ta’sir kuchlarining tabiati qanday, degan savollar paydo bo‘ldi. Elektroliz hodisasini birinchi bo‘lib kuzatgan olim Devi atomlar orasidagi ta’sir kuchlari, bu elektrostatik kuchlar ekanligini ko‘rsatdi. 1933-34-yillarda Devining ishlarini davom ettirgan Faradey elektroliz hodisasining miqdoriy qonunlarini kashf qildi. Faradey o‘z tajribalari asosida ma’lum sharoitlarda atom elektr zaryadiga ega bo‘lishligini ko‘rsatdi. Lekin o‘sha davr fizikasi bunday hodisalarni tushuntirishga qodir emas edi. Atom haqidagi tasavvurlarning rivojlanishi davomida atomistlar materialistik nuqtai-nazarda turdilar. Jumladan, Anaksagor fikricha dunyodagi harakatlarni aql boshqaradi. Atomistik tasavvurlarga qarshi chiqqan R.Dekart (1596-1650) idealistik tasavvurlarni rivojlantirdi. E.Max (1838-1926) va V.Ostvold (1853-1932)lar atom va molekulalarning mavjudligini inkor qildilar, ular filosofiyadagi energetizm yo‘nalishi tarafdorlari edilar. Atomistik tasavvurlarning rivojlanishida 1869-yilda D.Mendeleev tomonidan kimyoviy elementlar davriy tizimining kashf etilishi muhim o‘rin tutdi. D.Mendeleev davriy qonuni asosida hali ma’lum bo‘lmagan yangi elementlarning mavjudligini, ularning fizik va kimyoviy xossalarini oldindan ayta oldi. Lekin bu tizim ham ko‘p yillar davomida ilmiy jihatdan tushuntirilmadi. XIX asr oxirida moddalar tuzilishi haqidagi fikrlarni tasdiqlovchi bir qator hodisalar, 7 tajribalar ma’lum bo‘ldi. Yorug‘likning elektromagnit xossalari kashf qilindi, ayrim gazlar spektrida empirik qonunlar ixtiro qilindi va moddalar atomlardan tuzilgan degan nazariya to‘g‘ri ekanligi asoslandi. Atomlar eng kichik zarralardan tuzilganligi ko‘rsatildi. Vakuum texnikasida past bosimlarni hosil qilish usullari kashf etildi. Past bosimli gazlarda elektr razryadlarini kuzatishga imkoniyat tug‘ildi. Past bosimli gazlardan elektr tokining o‘tishini o‘rganish bo‘yicha Goldshteyn, Krukslar tadqiqot ishlarini olib bordilar. J.Tomson (1856-1940) tomonidan katod nurlari va uning xossalari o‘rganildi. Tomson tomonidan o‘tkazilgan tadqiqotlar jarayonida atomdan ham bir necha marta kichik bo‘lgan elektron mavjudligi aniqlandi. Elektron massasi vodorod atomi massasidan 1837 marta kichikligi va uning elektr zaryadi mavjud bo‘lgan elektr zaryadlardan eng kichikligi ko‘rsatildi. Elektronning zaryadi va masssasi o‘zgarmasligi aniqlandi. Elektron emissiyasi hosil bo‘ladigan uch xil hodisa aniqlandi. Birinchisi, fotoelektrik effekt, bu hodisa metallarni ultrabinafsha nurlar bilan nurlantirganda hosil bo‘ladi. Ikkinchisi, termoelektron emissiya, bu hodisa agar metall tola yuqori haroratda qizdirilsa, undan elektronlar ajralib chiqa boshlaydi. Uchinchisi, radioaktiv elementlarning o‘z-o‘zicha beta- nurlar (elektronlar) chiqarishidir. Elektronlar qaysi usulda hosil qilinishidan qat’iy nazar, ularning barchasi bir xil xossaga, bir xil miqdordagi elektr zaryadiga va massaga ega. Elektronlar maydalanmaydigan elementar qism deb qaraladi, ular manfiy zaryadlangan. Atomlar esa normal holatda neytral bo‘ladi. Atomlarning o‘ziga xos chastotali yorug‘likni chiqarish yoki yutish xossalari ularda elektr zardlarining borligini ko‘rsatadi. Siyraklashtirilgan gaz va qizigan metall bug‘larining atomlari turli rangdagi chiziqlardan iborat spektrni beradi. Shuning uchun, bu spektrlar chiziqli spektrlar deyiladi. Atom spektrini o‘rganish atom tuzilishini bilishda muhimdir. Atom spektridagi chiziqlar tartibsiz joylashmay, balki chiziqlar seriyasi deb ataluvchi guruhlarga ma’lum bir qonuniyatlar asosida birlashishi aniqlandi. XX asr boshlarida atom tuzilishining turli modellari taklif qilindi. 1901-yilda Tomson tomonidan atom tuzilishining dastlabki modeli taklif qilindi. Tomson modeliga asosan atom musbat zaryadlangan shar bo‘lib, manfiy zaryadlangan elektronlar shu sharda taqsimlangan. Shardagi musbat zaryad miqdori elektronlar zaryadi yig‘indisiga teng va atom neytral hisoblanadi. Elektronlarning o‘z 8 muvozanati atrofida kichik tebranishlari natijasida atom yorug‘lik chiqaradi. Lekin keyinchalik bu modelning asossizligi aniqlandi. Shunday bo‘lsada, bu model Lorens tomonidan tajriba bilan to‘g‘ri keladigan ko‘pgina nazariyalarning yaratilishiga asos bo‘ldi. Lorens elektromagnit to‘lqinlarning moddalar bilan o‘zaro ta’siri, harakatdagi muhit elektrodinamikasi nazariyalarini qarab chiqdi. Shu bilan u A.Eynshteynning (1879-1955) nisbiylik nazariyasiga zamin yaratdi. 1905-yilda A.Eynshteynning nisbiylik nazariyasi, 1926 yilda kvant mexanikasi yuzaga keldi. Kvant mexanikasining rivojlanishi murakkab va davomli bo‘ldi. 1900-yilda M.Plank ishlarida mikrodunyoning birinchi asosiy postulati – fizik kattaliklarning kvantlanishi prinsipi asoslandi. Plank tomonidan absolyut qora jism muvozanatli nurlanishi spektrida energiyaning taqsimlanishi haqidagi qonunini ifodalaydigan formulani chiqarishda nurlanishning modda bilan o‘zaro ta’siri haqidagi klassik fizika tasavvurlariga zid bo‘lgan gipoteza aytildi: chastotasi ω bo‘lgan yorug‘lik to‘lqini bilan ta’sirlashadigan moddaning atomi yoki molekulasi energiyaning istalgan porsiyasini chiqarmaydi ham yutmaydi ham, balki energiyaning butun sondagi elementar ħ ω porsiyalarini chiqaradi yoki yutadi. Bu bilan Plank atom yoki molekula chiqaradigan yoki yutadigan energiya kvantlanganligini ko‘rsatdi. Bunda proporsionallik doimiysi Plank doimiyligi deb nomlandi. Uning tajribada aniqlangan qiymati ħ=1,054 ⋅ 10 –34 J ⋅ s. Kvantlash g‘oyasining keyingi rivojlanishi Eynshteyn (1905) tomonidan davom ettirildi. Eynshteyn gipotezasiga asosan yorug‘likni to‘lqin sifatida emas, balki har birining energiyasi E=ħ ω va P=ħ ω /c bo‘lgan kvantlar (fotonlar) oqimi sifatida qaraladi. Bu gipoteza mikrodunyo fizikasining korpuskulyar-to‘lqin dualizmi haqidagi ikkinchi asosiy prinsipini tasdiqladi. Bundan esa Plank doimiyligi ħ kvantlash prinsipi va korpuskulyar-to‘lqin dualizmi bilan bog‘liq ekanligi ko‘rinadi. Bunday faqat mikrodunyo fizikasida ikki fundamental prinsiplarning ichki birligini ko‘rsatadi. 1913 yilda daniyalik fizik olim N.Bor energiyaning kvantlanishini atomning yadroviy modeliga tatbiq qildi. Bor elektronlarning atomdagi harakatini xarakterlaydigan kvant postulatlarini taklif qildi. Bor nazariyasi klassik elektrodinamika 9 qonunlarini atomning ichidagi hodisalarga tatbiq etish mumkin emasligini, ikkinchi tomondan esa mikrodunyo fizikasida fizik kattaliklarning kvantlanganligini ko‘rsatdi. Bor nazariyasi atom tuzilishi nazariyasining rivojlanishida yirik yutuq hisoblanadi. Lekin rentgen spektrlarini, ishqoriy metallar spektrlarini vodorod atomi spektrining nozik strukturasi, Shtark va Zeyeman effektlarini tushuntirishdagi muvaffaqiyatlar Bor nazariyasining chegaralanganligini ko‘rsatdi. Yangi kvant prinsiplarining ochilishi va rivojlanishi murakkab davrlardan o‘tdi va nihoyat, 1926-yilda kvant mexanikasi yaratilishi bilan mikrodunyoning nazariyasi yuzaga keldi. Atom tuzilishining ikkinchi modeli atomning planetar modeli bo‘lib, bu model to‘g‘risidagi dastlabki tushunchalar 1903-yilda Kelvin va X.Nagaoka tomonidan aytilgan edi. Atomning planetar modeliga asosan atomning markazida musbat zaryad joylashgan bo‘lib, elektronlar uning atrofida yopiq orbitalarda harakatlanadi. Ammo atom tuzilishini tushuntirishda bu ikki model ham ma’lum qiyinchiliklarga uchradi. Atom tuzilishini tushuntirish uchun tajribalar o‘tkazish talab qilinar edi. Bunday tajribalar 1911-yilda Rezerford tomonidan o‘tkazildi. U alfa-zarralarning yupqa metall folgalarda sochilishi ustida bir qator tajribalar o‘tkazdi. Rezerford o‘tkazgan tajribalari asosida atom tuzilishining planetar modelini taklif qildi. Atomning planetar modeliga asosan atom quyidagicha tuzilgan: atom musbat zaryadlangan yadro va uni o‘rab olgan manfiy zaryadli elektronlar qobig‘idan iborat. Elektronlar yadro atrofida doiraviy orbitalar bo‘ylab harakatlanadi. Elektronlarning to‘lik manfiy zaryadi yadroning musbat zaryadi miqdoriga teng bo‘lib, atom neytral holda bo‘ladi. Yadroning o‘lchami 10 –13 -10 –12 sm, atomning o‘lchami esa 10 –8 -10 –7 sm dir. Atomning asosiy massasi (99,95%) yadroda joylashgan. Atomning planetar modelini matematik tahlil qilish, unda ma’lum qarama qarshiliklar borligini ko‘rsatdi. Yadro atrofida elektronlarning orbitalardagi harakatida elektromagnit to‘lqinlar chiqarilishi kerak. Bunda elektronning energiyasi kamaya borib, oxiri elektron yadroga tushib qolishi mumkin. Demak, atomning Rezerford taklif qilgan modeli birinchidan, atomlarning barqarorligini, ikkinchidan, atom spektrlarining chiziqliligini va undagi qonuniyatlarni tushuntira olmadi. Bu qiyinchiliklarni bartaraf etishda 1913-yilda daniyalik fizik N.Bor klassik nazariyaga zid bo‘lgan farazlarni ilgari surdi. Bu 10 farazlar Borning kvant postulatlari deb yuritildi. Borning ikki postulatida atomda energetik sathlarining mavjudligi, ularning diskretligi va elektronning yuqori energetik sathdan pastki energetik sathga o‘tganida atom energiya chiqarishi ko‘rsatildi. Bor nazariyasi vodoroddan keyingi element geliy atomi spektridagi qonuniyatlarni mutlaqo tushuntira olmadi. Bor nazariyasi yarim klassik va yarim kvant nazariya edi. Lekin Bor nazariyasi fan rivojlanishida muhim o‘rin tutdi, mikrodunyo hodisalariga klassik fizika qonunlarini qo‘llash mumkin emasligini ko‘rsatdi. 1905-yilda A.Eynshteyn tomonidan elektromagnit nurlanishlarning kvantlanishi kiritildi. 1924-yilda Lui de-Broyl elektron va boshqa zarralarning to‘lqin xossasiga ega ekanligi to‘g‘risida o‘z gipotezasini taklif qildi. 1926-yilda esa E.Shredinger de-Broyl gipotezasi asosida to‘lqin mexanikasini rivojlantirdi va o‘zining to‘lqin tenglamasini taklif qildi. Bu tenglama Shredinger tenglamasi deb ataldi. To‘lqin mexanikasi mikrodunyo hodisalarini klassik nuqtai nazardan tushuntirib bo‘lmasligini ko‘rsatdi. To‘lqin mexanikasi bilan parallel ravishda V.Geyzenberg tomonidan kvant mexanikasi matrisa shaklida rivojlantirildi. Shredinger bu ikki shaklning ham ekvivalentligini isbotladi. Kvant mexanikasi atom to‘g‘risidagi tasavvurlarni chuqurlashtirdi, va hozirgi zamon atom tushunchalariga yaqinlashtirdi. Atom to‘g‘risidagi tasavvurlarning keyingi rivojlanishi 1928- yilda P.Dirak tomonidan to‘lqin tenglamasini relyativistik umumlashtirishi natijasida rivojlandi. Dirak nazariyasi musbat elektron – pozitronning mavjudligini ko‘rsatdi. Pozitron 1932-yilda K.Anderson tomonidan kashf qilindi. Dirak nazariyasidan vodorod atomi uchun kelib chiqadigan xulosalarning tajribada tekshirilishi nazariya bilan tajriba natijalari orasida oz bo‘lsada farq borligini ko‘rsatdi. Bu farq 1947-yilda U.Lemb va E.Rezerford tomonidan o‘lchandi va unga Lemb siljishi deb nom berildi. Lemb siljishi 1947-yilda G.Bete tomonidan tushuntirildi. Atom to‘g‘risidagi tasavvurlarning rivojlanishi bilan birga atomni tashkil qilgan zarralar elektron, neytron, proton xossalari ham o‘rganila bordi. Yangi elementar zarralar tizimi ochildi. 11 Atom fizikasi rivojlanishiga D.I.Bloxinsev, L.D.Landau, D.D.Ivanenko, A.A.Sokolov, V.A.Fok, Ya.I.Frenkel va boshqa olimlar salmoqli hissa qo‘shdilar. Atom tuzilishini va uning xossalarini o‘rganishda hozirgi zamon fizikasi katta muvaffaqiyatlarga erishdi. Bu muvaffaqiyatlar atom elektrostansiyalarining, zarralar tezlatkichlarining, lazerlarning yaratilishiga va boshqa ko‘pgina fan olamidagi muvaffaqiyatlarga olib keldi. Atom fizikasi hozirgi kunda elementar zarralarning tuzilishi va xossalarini o‘rganish asosida jadal qadamlar bilan rivojlanmoqda. Download 4.51 Kb. Do'stlaringiz bilan baham: 
|