Gara Seýitliýew Saýlanan eserler

223
GÖZ BILEN
Hindi gözellerniň iň humar çagy
Näzden dolup dumanlar gara gözlerniň agy.
Inçe uzyn kirpikler kölge salsa gözlere,
Alar akyl-huşuňy, goýmaz seni sözläre.
Humar-humar süzende hindi gyzy gözlerin,
Sözsüz-de düşünersiň onuň ýürek sözlerin.
Hindistanyň, ilinde köp synladym özlerin,
Göz bilen beýan edýär olar söýgi sözlerin.
Bu pikiri toslamady oturyp, özi Gara.
Ol ýerde-de söýgi hakda taryhyň ýüzi gara.
Hindi gyzy aýdyp bilmän söýgüsini söz bilen,
Taryh boýy däp bolupdyr beýan etmek göz bilen.
GÖZLERIŇ
Hindiniň şahyr gyzy gara gözli Amrita,
Göz süzüp gazal okaňda, gözlerňe batmak hata.
Düşmesem-de okanyňda gazalyňa sözüňden
Söýgi hakda okanyňy ýürek duýdy gözüňden.
Sen maňa oka diýýäň tarypyny gözleriň.
Manysyny duýar bolsaň gözlerimden sözleriň,
Diňle, aýdaýyn aýdymny men söýgüli gözleriň.

---

224
OWADAN
Iki ýüz ýyl mundan ozal Pyragy
Wasp edipdir seniň hindi halyňy.
Dünýämiz dostlukda parlaýan çagy
Gelip gördüm seniň gül jemalyňy.
Hindi gyzy, gül jemalyň owadan.
Owadandan söz ýok dilde owadan.
Şahyr bolsa gerek seni ýaradan
Ýaňaklarňa hal düzüpdir owadan.
Ýaňaklarňa hal düzüpdir owadan.
Hala aşyk zülpleriňi tow eden.
Şahyr bolsa gerek seni ýaradan
Bagt ol şahyryň işin şow eden.
Bagt ol şahyryň işin şow eden.
Zergär şahyr hindi halyň gowy eden.
Bu aýdymyň adyn goýdum owadan
Owadan söz, ýok dilde owadan.

---

225
«ÝYLAN TANSY»
Ýüregimde müň ýigrenç bar ýylana,
Has beter hem ynsan dänse ýylana...
Emma bu gudrata sen näme diýjek?!
― Häzir bakyň, «Ýylan tansy» ediljek —
Diýip, çekilende yglançy oglan,
Sen çykýarsyň göýä süňksüz ýylan.
Ýylanda beýle näz bolarmy, jenan?
Seniň gudratyňa galdym men haýran!
Sen ýylany şeýle gözel görkezdiň.
Şeýle gözel, şeýle gözel görkezdiň.
Oýnuň owsun ýaly özüne çekdi.
Ýylana ýigrenjim ýadymdan çykdy.
Ýylany söýdürýän sen gözel apat,
Seniň sungatyňa bolsun, müň şöhrat!
Taryp üçin aýytmaýan bu sözi,
« Ýylan tansyň» görse, ýylanlaň özi
Ýylanlygny bes ederdi ýylanlar,
Saňa baky sežde ederdi ynsanlar!

---