Гулистон давлат университети бошланғич ва мактабгача таълим методикаси кафедраси

Назорат саволлари
1. Идеал ўқитувчи ҳақидаги ўз фикр ва мулоҳазаларини эркин баён этинг.
2. Ёшлигингизда ўзингиз ҳавас қилган ўқитувчи-тарбиячилар, уларнинг ибратли фазилатлари, касбий маҳорат, интеллектуал салоҳият, илмий дунёқарашлари ҳақида сўзлаб беринг.
3. Педагогик характерга эга бўлган бадиий асарларда ўқитувчи шахси ўз ифодасини топган қаҳромон образлар, уларнинг ижобий фазилатлари, шунингдек салбий хислатларига муносабат билдиринг.
4. Ўқитувчининг шахсий сифатлари ҳақида буюк мутафаккир-олимлар, шунингдек ўз қарашларингизни баён этинг.
5. Ўқитувчи-тарбиячининг шахсий сифатларини санаб ўтинг ва уларнинг ҳар бирига изоҳ беринг.
6. Ўқитувчи-тарбиячининг касбий сифатлари таркибига нималар киради?
7. Ўқитувчи-тарбиячининг касбий билимдонлиги деганда нималарни тушунасиз?
8. Ўқитувчи-тарбиячининг педагогик кўникмаларига нималар киради?
9. Ўқитувчи педагогик маҳоратининг таркибий қисмларини санаб ўтинг.

ГЛАССАРИЙ

Давлат таьлим стандарти – таълим соҳаси бўйича норматив-ҳуқуқий хужжат бўлиб, таълим муассасасини битирувчи кадрларнинг умумкасбий билим, кўникма ва малакаларига давлат томонидан қўйиладиган минимал талабларни ифода этади.
Малака талаблари – муайян бакалавриат таълим йўналиши ёки магистратура мутахассислигини битирувчи кадрларнинг касбий компетентлик даражасига қўйиладиган минимал талабларни ифода этувчи норматив-ҳуқуқий хужжат ҳисобланади.
Ўқув режа – ДТС ва малака талаблари асосида ишлаб чиқилган норматив-норматив-ҳуқуқий давлат таълим хужжати бўлиб, муайян бакалавриат таълим йўналиши ва магистратура мутахассислиги талабалари ўзлаштиришлари зарур бўлган фанлар блоки, уларнинг таркиби, хажми ва даврини ўзида ифода этади.
Компетенция – бирор бир соҳа эгасининг ўз касбий фаолиятига лаёқати, унинг касбий билим, кўникма, малака ва қобилиятлари, шахсий сифат ва фазилатлари синтези, интеграциясидир.
Касбий фаолият соҳаси - таълим тизимида МТМ тарбиячиси лавозимларида ишлаш, ижтимоий-гуманитар йўналишдаги илмий-тадқиқот ташкилотларда ходим бўлиб ишлаш, нодавлат нотижорат ва жамоат ташкилотларида ҳамда бошқа муассасаларда ишлаш, мутахассислиги доирасида педагогик фаолият билан боғлиқ комплекс масалалар мажмуасини қамраб олади.